Isaias 6 - Ti Biblia (1973)

Ti sirmata ni Isaias ken ti pannacaibaonna.

¹ Idi tawen nga ipapatay ni ari Uzias nakitac ti Apo a situtugaw iti maysa a trono, a nangato ken natan-oc; ket ti gayadan ti cawesna pinunnona ti templo.

² Iti ngatona nagtacder dagiti serafin, a ti tunggal maysa adda innem a payacna, dagiti dua pangabbongna iti rupana, ket dagiti dua pangabbongna cadagiti sacana, ket dagiti dua pagtayabna.

³ Ket nagiinnickisda ti maysa ken maysa a kinunada, Santo, Santo, Santo ni Jehova dagiti buybuyot: ti isu-amin a daga napno iti dayagna.

⁴ Ket dagiti pamuon dagiti dapian nagpigergerda iti timec daydi nagickis, ket ti balay napno iti asuc.

⁵ Idin kinunac, Asiac pay! ta madadaelac; agsipud ta taoac a narugit dagiti bibigna ket makipagtaengac cadagiti tattao a narugit dagiti bibigda: ta dagiti matac nakitada ti Ari, a ni Jehova dagiti buybuyot.

⁶ Idin timmayab nga immay caniac di maysa cadagiti serafin, nga adda maysa a beggang iti imana, nga innalana a sinipit idi altar:

⁷ Ket isu ti indeppelna iti ngiwatco, ket kinunana, Adtoy, daytoy dimmeppel cadagiti bibigmo; ket ti kinadakesmo naiccat, ken ti basolmo napacawan.

⁸ Ket nangngegco ti timec ti Apo, a kinunana, Asino ti ibaonconto, ken asino ti mapan a gapu cadatayo? Idin kinunac, Adtoyac; ibaonnac.

⁹ Ket isu kinunana, Inca, ket ibagam cadagitoy a tattao, Pudno a mangn gegyo, ngem dicayo maawatan; ken pudno a makitayo ngem dicayo mailasin.

¹⁰ Palucmegenyo dagiti puspuso daytoy nga umili, ken pagdagsenenyo dagiti lapayagda, ken pagkidemenyo dagiti matada; di la ket ta macakitada cadagiti matada, ken macangngegda cadagiti lapayagda, ken macaawatda cadagiti pusoda, ken agbabawida ket mapasalun-atda.

¹¹ Idin kinunac, Apo, casano aya ti cabayagna? Ket isu simmungbat, Agingga iti maracrac dagiti il-ili nga awan matagtagitao, ken dagiti balbalay nga awan tattaoda, ken ti daga aglangalang a maikisap.

¹² Ket ni Jehova iyadayuna dagiti tattao, ket umadu dagiti nabaybay-an a disso iti tengnga ti daga.

¹³ Ket no adda pay maysa nga apagcapullo kencuana, isu met iti batangna macanto: a cas maysa a cayo a terbinto ken cas maysa a lugo a ti puonda mabati, no mapucanda; casta a ti nasantoan a bin-i isu ti puonna.