Isaias 59 - Ti Biblia (1973)

Ti pannacaipudno dagiti kinadangkes ti umili.

¹ Adtoy, ti ima ni Jehova saan a napaababa, tapno dina mabalin ti mangisalacan; ti lapayagna saan met a nabannog, tapno dina mabalin ti dumngeg:

² Ngem dagiti kinadangkesyo namagsinada cadacayo ken iti Diosyo, ket dagiti basbasolyo inlemmengda ti rupana cadacayo, iti casta dinto mangipangag.

³ Ta dagiti imayo narugitanda iti dara, ken dagiti ramayyo iti kinadangkes; dagiti bibigyo nagsaoda cadagiti ulbod, ti dilayo nagdayamudom iti dakes.

⁴ Awan ti makicalintegan a sililinteg, ket awan ti mangsalacnib iti kinapudno: agtalecda iti kinaubbaw, ken agsaoda cadagiti ulbod; sicugenda ti dakes, ket agipasngayda iti kinadangkes.

⁵ Isuda agucupda cadagiti itlog ti uleg, ken agabelda iti catay ti lawalawa: ti mangan cadagiti itlogda matay; ket ti mapandagan agpessa ket rumuar ti maysa a carasaen.

⁶ Dagiti abelda didanto agbalin a pagan-anay, dindanto maabbongan dagiti bagida met laeng cadagiti aramidda: dagiti aramidda isuda dagiti aramid ti kinadangkes, ket ti aramid ti panagrabsut adda cadagiti im-imada.

⁷ Dagiti sacada agtarayda iti dakes, ket agpardasda a mangibucboc iti dara nga awan ti basolna: dagiti panunotda isuda dagiti panunot ti kinadangkes; pannacarba ken pannacadadael dagiti adda cadagiti daldalanda.

⁸ Ti dalan ti talna dida ammo; ket awan ti kinajusticia cadagiti pagnaanda: inaramidda ida a nakillo a daldalan; uray asino a mapan idiay dina ammo ti talna.

⁹ Gapuna a ti kinajusticia adayu cadacami, ti kinalinteg dinacami met macamacam: sapulenmi ti lawag, ngem, adtoy, ti kinasipnget: ken iti kinaraniag, ngem magnacami iti kinacudrep.

¹⁰ Dacami agararicapcami iti diding a cas iti bulsec; wen, dacami agar-aricapcami a cas cadagiti awan matada: dacami maitibcolcami iti matoon a cas iti sumipnget; iti tengnga daydiay nabileg dacami cascami la natay a tattao.

¹¹ Agungorcami amin a cas cadagiti oso, ken agunnoycami iti nasaem a cas cadagiti calapati: sapulenmi ti kinajusticia, ngem awan; ken ti pannacaisalacan, ngem isu adayu cadacami.

¹² Ta dagiti salungasingmi umaduda iti sangoanam, ket dagiti basolmi manacsida iti maibusor cadacami; ta dagiti labsingmi addada cadacami, ket no maipapan cadagiti kinadangkesmi, ammomi ida:

¹³ Ilalabsing ken panangilibac ken ni Jehova, ken isisiasi iti isusurot iti Diosmi, panagsao iti pammarigat ken yaalsa, panagpakinakem ken panagsao iti puso cadagiti sasao ti kinaulbod.

¹⁴ Ti kinajusticia mapasunud, ket ti kinalinteg agtacder iti adayu; ta ti kinapudno maipasag iti dalan, ket ti kinalinteg dina mabalin ti sumrec.

¹⁵ Wen, ti kinapudno awan; ket daydiay nga italawanna ti kinadangkes maaramid met laeng a kinayawan. Ket ni Jehova nakitana, ket namapungtot kencuana, ta awan idi ti kinajusticia.

¹⁶ Ket nakitana nga awan idi ti tao, ket nasdaaw nga awan idi ti mangibabaet: gapuna a ti met laeng tackiagna ti mangyeg ti pannacaisalacan kencuana; ket ti kinalintegna, ti nangtengngel kencuana.

¹⁷ Ket incawesna ti kinalinteg a cas maysa a cabal, ken maysa a cabal ti pannacaisalacan iti rabaw ti olona; ket nagcawes iti ibabales a pannacapagananayna, ket naabbongan iti regta a cas maysa a cagay.

¹⁸ Cas cadagiti aramidda, iti mayanatop manggungunanto, ti pungtot cadagiti casupadina, supapacannanto dagiti cabusorna; cadagiti purpuro itdennanto ti gunguna.

¹⁹ Iti casta agbutengdanto iti nagan ni Jehova manipud iti laud, ket ti dayagna manipud iti leleggacan ti init; ta isu umayto a cas maysa a napegges nga ayus ti danum, nga ipugso ti bang-es ni Jehova.

²⁰ Ket maysa a Mannubbot umayto iti Sion, ken cadagidiay putot ni Jacob, isuda nga aglicud iti panaglabsing, cuna ni Jehova.

²¹ Ket ti maipapan caniac, daytoy isu ti tulagco cadacuada, cuna ni Jehova: ti Espirituc nga adda kenca, ken dagiti saoc nga incabilco ita ngiwatmo, didanto pumanaw ita ngiwatmo, uray iti ngiwat ti putotmo, uray iti ngiwat ti putot ti putotmo, cuna ni Jehova, manipud ita ken iti agnanayon.