Isaias 58 - Ti Biblia (1973)

Ti naimbag ken dakes a panagayunar. Ti panangngilin iti aldaw a panaginana.

¹ Umkisca iti natbag, dica medmedan agtimecca iti natbag a cas maysa a tangguyob, ket ipalawagmo iti ilic ti ilalabsingna, ken iti balay ni Jacob dagiti basbasolna.

² Nupay casta isuda birukendac iti inaldaw, ken agrag-oda nga umammo cadagiti dalanco: cas maysa a nacion a nagaramid iti kinalinteg, ket dina indian ti impaannurot ti Diosda, agdawatda caniac iti nalinteg a panangocom; agrag-oda nga umadani iti Dios.

³ Apay aya a nagayunarcami, cunada, ket dica cumita? apay aya a pinaladingitmi ti cararuami, ket dica incascaso? Adtoy, iti aldaw ti panagayunaryo sarakenyo ti ragsacyo met laeng, ken kiddawenyo amin a pagtrabajoanyo.

⁴ Adtoy, dacayo agayunarcayo a maipaay iti panagsususic ken panagsusubang, ken tapno cumabil iti gemgem ti kinadakes: ti panagayunaryo itoy nga aldaw saan a tapno maipangag ti timecyo idiay ngato.

⁵ Casta aya ti panagayunar a pinilic? ti aldaw aya maipaay iti tao a pangpaladingitna iti cararuana? Irucnoyna ti olona a cas iti maysa a lidda, ken yucradna ti lupot a nakersang ken dapdapu iti babana? naganemto daytoy iti panagayunar, ken maysa nga aldaw a maawat ken ni Jehova?

⁶ Saan a daytoy aya ti panagayunar a pinilic: tapno pangketta cadagiti galut ti kinadangkes, tapno pangwarwar cadagiti patapat ti sangol, ket tapno pagwayawayaen ti mailuplupit, ken tapno bungtolenyo coma ti tunggal sangol?

⁷ Saan aya a tapno iwarasmo ti tinapaymo iti mabisin, ken ti panangalam iti balaymo iti napanglaw a napagtalaw? no makitam ti silalamolamo, tapno isu cawesam: ket dica coma baybay-an ti lasagmo met laeng?

⁸ Iti casta agbannawagto ti lawagmo a cas iti agsapa, ket ta isasalun-atmo sumantacto a sisisiglat unay; ket ta kinalintegmo mapanto iti sangoanam; ti dayag ni Jehova isunto ti agaywan iti malicudam.

⁹ Iti casta umawagcanto, ket ni Jehova sumungbatto; umkiscanto, ket isu cunaennanto, Addaac ditoy. No sica iccatem iti tengngam ti sangol, ti panangitudo iti ramay a panglais, ken panagsao a sidadangkes;

¹⁰ Ket no ta cararuam mangngaasi, iti mabisin, ket bussogem ti cararua a mapaladingit: iti casta tumangcayagto ta lawagmo iti casipngetan, ket ta kinacudrepmo cas la iti matoon;

¹¹ Ket ni Jehova idalannacanto a cancanayon, ken pennekennanto ta cararuam idiay naticag a disso, ken papigsaennanto dagiti tultulangmo; ket mayarigcanto iti nadanum a minuyongan, ken cas iti ubbog ti danum, a dagiti dandanumna saanda nga agatian.

¹² Ket dagidiay nga adda kenca bangonendanto dagiti cadaanan a disdisso a narba; patacderemto dagiti pamuon dagiti adu a caputotan; ket managancanto iti Managtarimaan iti gutbaw, Mangpabaro cadagiti daldalan tapno pagnaedan.

¹³ No ibawingmo ta sacam iti aldaw a panaginana, iti panagaramid iti ragsacmo iti aldawco a nasantoan; ket naganem ti aldaw a panaginana a maysa a rag-o, ken nasantoan ni Jehova a nadayag; ket isunto ti dayawem, dica aramiden dagiti daldalanmo met laeng, dica sapulen ti ragsacmo met laeng, dica saoen dagiti saom met laeng;

¹⁴ Iti casta agrag-ocanto ken ni Jehova; ket apasacayencanto cadagiti nangato a disdisso ti daga; ken taraonancanto iti tawid ni Jacob nga amam: ta insao ti ngiwat ni Jehova.