Isaias 57 - Ti Biblia (1973)

Ti maipapan iti panagrucbab cadagiti didiosen.

¹ Ti nalinteg mapucaw, ket awan ti tao a mangicascaso; ket dagiti manangaasi a lallaki maiccatda, awan ti mangotob a ti nalinteg maiccat iti sangoanan ti dakes nga umay.

² Isu sumrec iti talna; isuda aginanada, cadagiti iddada, tunggal maysa a magna iti kinalintegna.

³ Ngem umasidegcayo ditoy, dacayo annac a lallaki ti managanito, putot ti mannakicamalala ken balangcantis.

⁴ Asino ti rinabrabacyo? siasino ti pangingangaanyo ita ngiwat, ken pangidilatanyo ita dila? saan aya a dacayo dagiti annac ti panaglabsing, maysa a putot ti kinaulbod;

⁵ Dacayo a mangpasged cadagiti bagbagiyo iti tengnga dagiti robles iti siroc ti tunggal narucbos a cayo; a mamapatay cadagiti annac cadagiti loblobong, iti siroc dagiti rengrengngat dagiti batbato?

⁶ Iti baet dagiti nalinis a batbato ti lobong isu ti biangmo: isuda, isuda ti gasatmo; cadacuada met laeng ti nangibucbocam ti daton a mainum, sica nagirucbabca iti daton. Makicappiaacto aya cadagitoy a banbanag?

⁷ Iti rabaw ti nangato ken natayag a bantay insaadmo ti iddam; idiay met simmang-atca a mangidatag ti daton,

⁸ Ket iti licudan dagiti ruruangan ken dagiti adadigi insaadmo ti pacalaglagipan: ta sica imparangmo ti bagim iti sabali a saan a siac, ket simmang-atca; pinadackelmo ti iddam, ket nakitulagca cadacuada: sica inayatmo dagiti iddada iti sadinoman a nacakitaam.

⁹ Sica napanca iti ari nga incuyogmo ti lana, ket pinawadwadmo dagiti bangbanglom, ken imbaonmo dagiti babaonem iti adayu, ket minulitam ta bagim agingga met laeng ken Tanem.

¹⁰ Sica nabannoganca iti pagatiddugan ti dalanmo; nupay casta dica kinuna, Barengbareng: sica nacasaracca iti mangpakired ita pigsam; gapuna a dica napacsuyan.

¹¹ Ket iti siasino ti nacapabutngam ken iti pagbutngam, tapno sica agulbodca, ket dinac linagip wenno dinac impapuso? diac aya nagtalna iti nabayag a pannawen, ket sica dica nagbuteng caniac?

¹² Ipalawagconto ti kinalintegmo; ket no maipapan cadagiti ar-aramidmo, isuda saandanto a macagunguna kenca.

¹³ Intono umasugca, dagiti inurnongmo icanawadaca coma; ngem ti angin alaennanto ida, maysa a puyot ipanawnanto ida amin: ngem ti agcamang caniac tagicuaennanto ti daga, ken tawidennanto ti nasantoan a bantayco.

¹⁴ Ket isu cunaennanto, Gaburanyo, gaburanyo, saganaenyo ti dalan, iccatenyo ti pacaitibcolan iti dalan ti ilic.

¹⁵ Ta castoy ti cuna ti Nangato ken Natan-oc nga agnaed iti agnanayon, a ti naganna Santo; Agnaedac iti nangato ken nasantoan a disso, agraman iti daydiay addaan iti maysa nga espiritu a napagbabawi ken napacumbaba, tapno biagec manen ti espiritu ti napacumbaba ken tapno biagec manen ti puso ti napagbabawi.

¹⁶ Ta diacto makisusic iti agnanayon, diacto met agpungtot iti agnanayon; ta ti espiritu mapacsuyan coma iti sangoanac, ken dagiti carcararua nga inaramidco.

¹⁷ Maipuon iti kinadangkes ti apalna nagpungtotac; ket isu kinabilco: inlingedco ti rupac ket nagpungtotac; ket isu nagtuloy a nagbawing iti dalan ti pusona.

¹⁸ Nakitac dagiti daldalanna, ken isu agasacto: isu idalanconto met, ken isublicto dagiti liwliwa kencuana ken cadagiti agdung-aw kencuana.

¹⁹ Agparsuaac iti bunga dagiti bibig: Talna, talna, iti daydiay nga adda iti adayu ken iti daydiay nga adda iti asideg, cuna ni Jehova; ket isu agasacto.

²⁰ Ngem dagiti nadangkes casda la iti mariribuc a taaw; ta dina mabalin ti aglinac ket dagiti danumna mangipurruacda iti pitac ken lued.

²¹ Awan ti talna, cuna ti Diosco, cadagiti nadangkes.