Isaias 56 - Ti Biblia (1973)

Ti panangngilin iti aldaw a panaginana.

¹ Castoy ti cuna ni Jehova, Salimetmetanyo ti kinajusticia, ken agaramidcayo iti kinalinteg; ta ti panangisalacanco umasideg, ken ti kinalintegco a maiparangarang.

² Nagasat ti tao a mangaramid itoy, ken ti anac ti tao a mangsalimetmet a sibibileg kencuana; a ngilinenna ti aldaw a panaginana ket dina ipabpabareng, ken igawidna ti imana iti panangaramidna iti aniaman a dakes.

³ Castamet ti gangannaet, a nakicallaysa ken ni Jehova, di coma agsao, a cunaenna, ni Jehova isinanacto a di bumurong iti ilina; ket ti eunuco, dina met coma cunaen, Adtoy maysaac a cayo a magango.

⁴ Ta castoy ti cuna ni Jehova cadagiti eunucos nga agngilin cadagiti aldawco a panaginana, ken pilienda dagiti banbanag a macaay-ayo caniac, ken salimetmetanda ti tulagco:

⁵ Mangtedacto cadacuada iti uneg ti balayco ken iti uneg dagiti bacudco maysa a pacalaglagipan ken maysa a nagan a naimimbag ngem cadagiti annac a lallaki ken annac a babbai; iccacto ida iti maysa a nagan a mataginayon, a saanto a makeltay.

⁶ Casta met dagiti gangannaet a makicallaysa ken ni Jehova, tapno agservi kencuana, ken agayatda iti nagan ni Jehova, tapno agbalinda nga ad-adipenna, tumunggal maysa nga agngilin iti aldaw a panaginana ket dina ipabpabareng, ken sinalimetmetanna ti tulagco;

⁷ Uray isuda iyegconto ida iti nasantoan a bantayco, ken paragsakecto ida iti balayco a pagcararagan: dagiti mapuuran a datonda ken dagiti sacrificioda maawatdanto iti rabaw ti altarco; ta ti balayco managananto ti balay ti cararag a maipaay cadagiti amin nga il-ili.

⁸ Ni Apo Jehova isu a mangummong cadagiti naipanaw ti Israel, cunana, Yummongconto pay dagiti sabsabali kencuana, mainayon iti cucuana met laeng a naornongen.

⁹ Dacayo amin nga an-animal iti away umaycayo a mangalun-un, wen, dacayo amin nga an-animal ti bakir.

¹⁰ Dagiti pagwanawanenna bulsecda, isuda amin awananda iti pannacaammo; isuda amin as-asoda nga umel; dida mabalin ti agtaol; agtagtagainepda, agiddada, ayatenda ti agdungsa.

¹¹ Wen, dagiti as-aso nabuclisda, uray caano dida mapmapnec ket dagitoy isuda dagiti paspastor a dida macaawat: isuda amin nagbawingda nga agturong iti dalanda met laeng, tunggal maysa iti paggungunaanna, isuda amin.

¹² Umaycayo, cunada, mangalaacto iti arac, ket agpennectayo iti naingel nga inumen; ket intono bigat caslanto iti daytoy nga aldaw, aldaw a dackel nga aglablabes ti cadackelna.