Isaias 55 - Ti Biblia (1973)

Ti caasi nga awan baybayadna a maipaay iti isu-amin.

¹ O, tunggal mawaw, umaycayo cadagiti dandanum, ken dayta nga awanan ti pirac; umaycayo, gumatangcayo, ken mangancayo; wen, umaycayo, ken gumatangcayo nga awan ti pirac ken awan ti baybayad iti arac ken gatas.

² Apay ngarud a gastoenyo ti pirac iti saan a taraon? ken ti bannogyo iti saan a macapnec? umimdengcayo a sireregta caniac, ken canenyo daydiay naimbag, ken pagrag-oenyo coma ti cararuayo met laeng iti kinalucmeg.

³ Yallingagyo ti lapayagyo, ken umaycayo caniac; dumngegcayo, ket ti cararuayo agbiagto: ket agaramidacto iti agnanayon a tulag cadacayo, nga isu dagiti di bumurong a panangngaasi a naicari ken David.

⁴ Adtoy, isu ti intedco a maipaay a sacsi cadagiti il-ili a mangipangulo ken agturay cadagiti il-ili.

⁵ Adtoy, ayabamto ti maysa a nacion a dica amammo; ket ti maysa a nacion a dinaca pay amammo tumarayto nga umay kenca, gapu ken ni Jehova a Diosmo, ken gapu iti Santo ti Israel; ta isu intan-ocnaca.

⁶ Sapulenyo ni Jehova ita ta masaracan pay; umawagcayo kencuana ita ta asideg pay:

⁷ Ti managdacdakes bay-anna coma ti dalanna, ken ti tao a saan a nalinteg dagiti pampanunotna; ket agsubli coma ken ni Jehova, ket isu caasiannanto; ken iti Diostayo, ta isu pacawanennanto iti nawadwad.

⁸ Ta dagiti pampanunotco saanyo a pampanunot, ket dagiti daldalanyo saanda met a daldalanco, cuna ni Jehova.

⁹ Ta cas dagiti langlangit nangatngatoda ngem iti daga, casta dagiti daldalanco nangatngatoda ngem cadagiti daldalanyo, ken dagiti pampanunotco ngem cadagiti pampanunotyo.

¹⁰ Ta cas ti tudo ken ti nieve bumabada nga aggapu iti langit, ket saanda nga agsubli idiay no di ket siboganda ti daga, ken pagtuboena, ken pangtedena iti bukel cadagiti agmulmula ken tinapay iti mangan;

¹¹ Castanto met ti saoc a rumuar iti ngiwatco: isu dinto agsubli caniac nga awan ti pagmamaayanna, no di ket tungpalennanto ti pagayatac, ken rumang-ayto iti banag a pangipanac kencuana.

¹² Ta rumuarcayto nga addaan iti rag-o, ken maiturong a sitatalna: dagiti banbantay ken turturod pumgaacdanto iti sangoananyo nga agcancantada; ken amin a caycayo iti talon pagsipatendanto dagiti im-imada.

¹³ Iti saad ti calunay tumubonto ti parwa; ken iti saad ti casumba tumubonto ti arrayan: ket isunto ti maysa a nagan a maipaay ken Jehova, maysa a pagilasinan iti agnanayon a saanto a makeltay.