Isaias 53 - Ti Biblia (1973)

Dagiti tutuoc ti adipen ni Jehova, ipapatayna ken pannacaitan-ocna.

¹ Siasino ti namati iti impadamagmi? ken iti siasino ti nacaiparangarangan ti tackiag ni Jehova?

² Ta isu dimmackel iti sangoananna a cas maysa a naganus a mula, ken cas maysa a ramut nga agtaud iti namaga a daga: isu awan ti buyana wenno sayaatna; ket no isu makitatayo, awan ti kinaimnasna, tapno tarigagayantayo coma.

³ Isu nauy-uyaw, ken binaybay-an dagiti tattao; maysa a tao ti ladladingit, ken nacaamammo iti liday: ket naumumsi a cas iti maysa a tao a kencuana dagiti tattao ilingedda ti rupada; ket ditayo impatpateg.

⁴ Pudno nga isu inturedna dagiti lidaytayo, ken inawitna dagiti ladingitayo; nupay casta isu impatotayo a nasaplit, nacabil iti Dios, ken napagsagaba.

⁵ Ngem isu nasugsugat a gapu cadagiti labsingtayo, isu napalitem a gapu cadagiti kinadangkestayo; ti dusa ti pacaicappiaantayo naipatay kencuana; ket gapu cadagiti saplitna maagasantayo.

⁶ Datayo amin castayla carcarnero a nayawawan; nagturong ti tunggal maysa cadatayo iti dalanna met laeng; ket ni Jehova impatayna kencuana ti kinadakestayo amin.

⁷ Isu naparigat, nupay idi napagsagaba dina nginanga ti ngiwatna; cas maysa a cordero a maiturong iti pagpartian, ken cas maysa a carnero a nagumel iti sangoanan dagiti mangpukis kencuana, casta dina innganga ti ngiwatna.

⁸ Gapu iti pannacaparigat ken pannacaocom isu napagtalaw; ket no maipapan iti caputotanna, asino cadacuada ti nangutob nga isu nakeltay iti daga dagiti sibibiag gapu iti panaglabsing ti ilic nga isu ti rebbengna a masaplit?

⁹ Ket iti ipapatayna inaramidda ti tanemna iti dinna dagiti managdacdakes, ken iti maysa a tao a nabacnang; idinto nga isu saan a nangaramid iti ranggas, ken awan met ti panangallilaw iti ngiwatna.

¹⁰ Nupay casta naay-ayo ni Jehova iti pinangpalitemna kencuana; isu pinalidayna: intono aramidem ti cararuana a maysa a daton a gapu iti basol, makitananto ti caputotanna, paatiddugennanto dagiti al-aldawna, ket ti pagayatan ni Jehova rumang-ayto itiimana.

¹¹ Makitananto ti panagrigat ti cararuana, ket mapnecto; gapu iti pannacaammo kencuana met laeng ti nalinteg nga adipenco palintegennanto dagiti adu; ken isu awitennanto dagiti kinadangkesda.

¹² Gapuna nga isu ibingayacto iti sangcaapag cadagiti natan-oc, ket isu bingayennanto ti samsam cadagiti napigsa; gapu ta imbucbocna ti cararuana ken patay, ket naibilang cadagiti managlabsing: nupay casta inawitna ti basol dagiti adu, ken nagaramid iti panangibabaet cadagiti managlabsing.