Isaias 52 - Ti Biblia (1973)

Ti Sion maiccatto iti pannacacayaw.

¹ Agriingca, agriingca, yusongmo ti pigsam, O Sion; yusongmo ti nasayaat a pagan-anaymo, O Jerusalem, ti nasantoan nga ili: ta manipud ita saanto a sumreken kenca ti di nacugit ken ti di nadalus.

² Pampagem ta bagim iti tapoc; tumacderca, agtugawca iti tronom, O Jerusalem: bucaem dagiti galut ti tengngedmo, O nacayawan a babai nga anac ti Sion.

³ Ta castoy ti cuna ni Jehova, Nalacocayo nga awan ti ngina; ket masubbotcayo nga awan ti pirac.

⁴ Ta castoy ti cuna ni Apo Jehova, Ti ilic simmalog sadi Egipto idi unana, tapno agtaeng sadiay: ket ti Asirio pinarigatna ida nga awan ti gapgapuna.

⁵ Ita ngarud, ania ti aramidec ditoy, cuna ni Jehova, idinto ta ti ilic nayadayu nga awan ti bayadna? dagiti agturay cadacuada agtaguobda, cuna ni Jehova, ken ti naganco patinayon a matabbaawan iti agmalmalem.

⁶ Gapuna a ti umili maammoannanto ti naganco; iti casta maammoandanto iti dayta nga aldaw a siac daydiay nga agsao; adtoy, siac.

⁷ Naglibnosen cadagidiay banbantay dagiti sacsaca ti mangyeg cadagiti naimbag a damdamag, a mangiwarnac iti talna, a mangyeg cadagiti naimbag a damdamag ti kinaimbag, a mangiwarragawag iti pannacaisalacan, a cunana iti Sion, Ti Diosmo agari!

⁸ Ti timec dagiti agbanbantay kenca! ipigsada ti timec, agcantada a sangsangcagiddan; agkikitadanto iti matanmata, intono agsubli ni Jehova idiay Sion.

⁹ Pumgaaccayo iti rag-o, agcantacayo a sangsangcagiddan, dacayo a nalangalang a disso ti Jerusalem, ta ni Jehova liniwliwana ti ilina, sinubbotna ti Jerusalem.

¹⁰ Ni Jehova linislisanna ti tackiagna a nasantoan cadagiti matmata dagiti amin a nasnacion; ken amin nga pungto ti daga nakitada ti panangisalacan ti Diostayo.

¹¹ Pumanawcayo, pumanawcayo, rumuarcayo sadiay, dicayo mangsagid iti aniaman a banag a di nadalus; pumanawcayo iti tengngana; dalusanyo ti bagiyo dacayo nga agawit cadagiti al-alicamen ni Jehova.

¹² Ta saancayto a pumanaw nga agganganat, ket dicayto met mapan nga agtartaray: ta ni Jehova mapanto iti sangoananyo; ken ti Dios ti Israel isunto ti agbantay iti licudyo.

¹³ Adtoy, ti adipenco agaramidto a sisisirib, maitan-octo ken maibayog, ken isu natan-octo unay.

¹⁴ Cas iti kinaadu ti nagmalmalanga kenca (ti langana napalaad unay adadda pay ngem iti asinoman a tao, ken ti tabasna adadda pay ngem cadagiti annac a lallaki dagiti tattao),

¹⁵ Casta ti panangwarsinanto cadagiti adu a nasnacion; dagiti ar-ari apputendanto dagiti ngiwatda kencuana: ta dayta saan a naibaga cadacuada makitadanto; ken ti saanda a nangngeg maawatandanto.