Isaias 51 - Ti Biblia (1973)

Ti panangisalacanna maiparangto iti casacbayan a cas idi nalabes.

¹ Denggendac, dacayo a sumursurot iti kinalinteg, dacayo nga agsapsapul ken ni Jehova: cumitacayo iti bato a nacatippinganyo, ken iti abut a nacacalianyo.

² Cumitacayo ken ni Abraham nga amayo, ken casta met ken ni Sara a nangipasngay cadacayo; ta idi isu maymaysa pay laeng, isu inayabac, ket isu binendicionac ken pinaaduc.

³ Ta ni Jehova liniwliwana ti Sion, isu liniwliwana dagiti amin a dissona a nalangalang, ken inaramidna dagiti let-angna a cas la Eden, ken ti cadaratan a tay-acna a cas minuyongan ni Jehova; rag-o ken ragsac masaracanto idiay, panagyaman ken ti timec ti canta.

⁴ Ipangagdac, O ilic; ken timudendac, O nacionco: ta maysa a bilin ti agtaudto caniac, ket isaadconto ti kinalintegco a maipaay a silaw dagiti inilin-ili.

⁵ Ti kinalintegco asideg, ti panangisalacanco rimmuaren, ken dagiti tackiagco ocomendanto dagiti inilin-ili dagiti purpuro urayendacto, ken agtalecdanto cadagiti tackiagco.

⁶ Itangadyo dagiti matayo cadagiti langlangit, ken cumitacayo iti baba ditoy daga, ta dagiti langlangit mapucawdanto a cas la asuc, ken ti daga marunut a cas iti pagan-anay; ket dagiti agtaeng kencuana mataydanto met a casta: ngem ti panangisalacanco agnanayonto, ket ti kinalintegco saanto a maiccat.

⁷ Dumngegcayo caniac, dacayo a macaammo ti kinalinteg, dagiti tattao a ti pusoda adda ti lintegco; dicayo agbuteng iti panangumsi dagiti tattao, ket dicayo met agcullayaw cadagiti panaguyawda.

⁸ Ti sanga ibusennanto ida a cas pagan-anay, ken ti igges lamutenna ida a cas lupot a de lana; ngem ti kinalintegco agnanay-onto ken ti panangisalacanco agpaay iti amin a caputotan.

⁹ Agriingca, agriingca, iyusongmo ti kinabileg, O tackiag ni Jehova; agriingca, a cas cadagidi al-aldaw idi unana, dagidi caputotan idi ugma. Saan a sica aya ti nangrangcay ken ni Rahab, a nangduyoc idi olimaw?

¹⁰ Saan a sica aya ti nangpamaga iti baybay, dagiti dandanum iti yuyeng; nga aramidem ti kinaadalem ti baybay a maysa a dalan a ballasiwan dagiti nasubbot?

¹¹ Ket dagiti sinubbot ni Jehova agsublidanto, ken umayda nga agcancanta agingga iti Sion; ket ti agnanayon a rag-o; agtaengto iti rabaw dagiti oloda: magunuddanto ti ragsac ken rag-o: ket ti ladingit ken sainnec agtalawdanto.

¹² Siac, siac met laeng, daydiay mangliwliwa cadacayo: siasinoca, a mabutengca iti tao a matayto, ken iti anac ti tao a maaramidto a cas la root;

¹³ Ket nalipatamon ni Jehova a Nangaramid kenca, isu a nangisacnap cadagiti langlangit, ken nangisaad iti pamuon ti daga; ket umamacca a cancanayon a gapu iti rungsot ti mamarigat, intono agsagana a mangdadael? ket sadino ti yan ti rungsot ti mamarigat?

¹⁴ Ti nacayawan a nayadayu iti ilina madagdagusto a maibulos; ket isu saanto a matay ket saanto a bumaba iti dariwangwang, ket dinto met macurangan iti taraonna.

¹⁵ Ta siac ni Jehova a Diosmo, a mangkibur iti baybay, tapno dagiti dalluyonna agungorda: Jehova dagiti buybuyot ti naganna.

¹⁶ Ket incabilco dagiti saoc iti ngiwatmo, ken lininonganca iti aniniwan ti imac, tapno maipasdecco dagiti langlangit, ken maisaadco dagiti pamuon ti daga, ken cunaec iti Sion, Sica ti ilic.

¹⁷ Agriingca, agriingca, bumangonca, O Jerusalem, sica nga imminum iti copa ti pungtot ni Jehova nga adda iti imana; sica imminumca iti malucong ti copa ti panagibar-ibar, ket isu ti impaaruyotmo.

¹⁸ Awan uray maysa a mangiturong kencuana cadagiti amin nga annacna nga impasngayna; ket awan met ti mangibin kencuana cadagiti amin nga annacna a tinagibina.

¹⁹ Dagitoy dua a banag napasamacda kenca; asino ti mangdung-aw kenca? panaglangalang, ken pannacadadael, bisin ken campilan, casano ti panangliwliwacto kenca?

²⁰ Dagiti annacmo nagtalimudawda, naidalitda iti oloanan dagiti amin a calcalsada, a casda la ugsa iti uneg ti bateng; napnoda iti pungtot ni Jehova, ti panangtubngar ti Diosmo.

²¹ Gapuna a denggem ita daytoy, sica a marigrigat, ken nabartec, ngem saan nga iti arac:

²² Castoy ti cuna ni Apom a Jehova, ken Diosmo a mangsalacnib iti biang ti ilina, Adtoy, iniccatco ita imam ti copa ti panagibar-ibar, uray pay ti malucong ti copa ti pungtotco; isu dicanto inumenen:

²³ Ket icabilconto iti ima dagiti mamarigat kenca, a nagcuna iti cararuam, Agcul-obca, tapno lumabascami; ket sica insaadmo ta bucotmo a cas la daga, ken cas la calsada, cadagiti lumabas.