Isaias 50 - Ti Biblia (1973)

Ni Jehova tulongannanto dagiti agtalec kencuana.

¹ Castoy ti cuna ni Jehova, Sadino ti yan ti surat ti pannakisina ni inam, nga isu ti namagtalawac kencuana? wenno asino cadagiti nacautangac ti nangilacoac cadacayo? Adtoy nailacocayo gapu cadagiti kaindangkesyo, ken gapu cadagiti panaglabsingyo napagtalaw ni inayo.

² Apay ngarud, nga idi immayac nga awan ti tao? idi immayabac, awan ti simmungbat? Napaababa aya ti imac, tapno saanna a mabalin ti manubbot? wenno awan aya ti pannacabalinco a mangisalacan? Adtoy, iti panangtubngarco paatianac ti baybay, aramidec dagiti carcarayan a let-ang: dagiti icanda agbuyocda, ta awan ti danum, ket matayda iti waw.

³ Cawesac dagiti langlangit iti kinasipnget, ken aramidec nga abbongda ti lupot a nakersang.

⁴ Ni Apo Jehova intedna caniac ti dila dagiti nasursuroan, tapno ma-ammoac coma no casano ti panagpapigsa cadagiti nabannogan babaen cadagiti sasao: isu agriing a biniganbigat, isu riingenna ti lapayagco a pagdengngeg a cas cadagiti nasursuroan.

⁵ Ni Apo Jehova linuctanna ti lapayagco, ket saanac a nasukir, ket diac met timmuckiad.

⁶ Intayac ti bucotco cadagiti mangcabil, ket dagiti pingpingco insangoc cadagiti agparparut iti booc; diac inlinged ti rupac iti pannacaibabain ken pannacatupra.

⁷ Ta ni Apo Jehova badangannacto; gapuna a diac nariribuc; iti casta insaadco ti rupac a cas pamulinawen, ket ammoc a saanacto a maibabain.

⁸ Adda nga asideg ti mangpalinteg caniac; asino ti makisusic caniac? agtacdertayo coma nga agcaycaysa: asino ti cabusorco? umasideg coma caniac.

⁹ Adtoy, ni Apo Jehova tulongannacto, asino aya dayta a mangcondenar caniac? adtoy, isuda amin casda la pagan-anay a dumaandanto: ti sanga ibusennanto ida.

¹⁰ Asino ti adda cadacayo, nga agbuteng ken ni Jehova, nga agtulnog iti timec ti adipenna? dayta magmagna iti kinasipnget, ken awan ti silawna, agtalec coma iti nagan ni Jehova, ken agsanggir iti Diosna.

¹¹ Adtoy, dacayo amin a mangpasged iti apuy, ken lawlawenyo dagiti bagiyo cadagiti aluten; magnacayo iti darang ti apuyyo, ken iti nagbaetan dagiti aluten a pinasgedanyo. Awatenyonto iti imac daytoy agiddacayto iti ladingit.