Isaias 5 - Ti Biblia (1973)

Ti pangngarig a cauvasan. Ti panangay-ay cadagiti nadangkes. Ti pammales ni Jehova iti pannacaaramat dagiti nasnacion.

¹ Agcantaac coma a maipaay ken ayayatec unay iti maysa a canta ti ayayatec a maipapan iti cauvasanna. Ti ayayatec unay adda idi maysa a cauvasanna iti maysa a nabunga unay a turod:

² Ket isu kinalina ken iniccatna dagiti batbatona, ket minulaanna iti napili nga uvas, ken namatacder iti maysa a torre iti nagtengngaanna, ken nangtaga met iti pagpespesan iti arac idiay: ket inurayna nga agpataudto coma cadagiti uvas, ket nagpataud cadagiti uvas nga atap.

³ Ket ita, O dacayo nga agnaed iti Jerusalem ken tattao ti Juda, dawatec nga ipatoyo man ti maipapan caniac ken ti cauvasac.

⁴ Ania aya ti nabalin a naaramid pay coma iti cauvasac, a diac inaramid kencuana? ania ti gapuna, nga idi nga ur-urayec a mangpataud coma cadagiti uvas, isu namataud cadagiti uvas nga atap?

⁵ Ket ita ibagac cadacayo ti aramidecto iticauvasac: iccatecto ti aladna, ket maibusto, rebbaecto ti bacudna, ket isu mapayatpayatto:

⁶ Ket baybay-acto a madadael; saanto a maparaspasan ket di-met magabion; no di ket pagtuboanto dagiti cascasumba ken calcalunay: ket ibilinconto met cadagiti ul-ulep tapno dida tinnagan iti tudo iti rabawna.

⁷ Ta ti cauvasan ni Jehova dagiti buybuyot isu ti balay ti Israel, ket dagiti tattao ti Juda isuda dagiti nacaay-ayo a mulana: ket nagsapul ti kinajusticia, ngem, adtoy, ti pammarigat; ken ti kinalinteg, ngem, adtoy, ti maysa a riaw.

⁸ Asi pay dagiti mamagtitipon iti balay ken balay, ken mamagtitipon ti talon ken talon agingga iti awan pagdissoan, ket maaramidcayo nga agtaeng a dacdacayo iti tengnga ti daga!

⁹ Iti lapayagco cuna ni Jehova dagiti buybuyot, Iti kinapudnona, adu a balbalay ti agongaongto, uray no dackel ken nasayaat, awanto ti agnaed kencuana.

¹⁰ Ta ti uppat nga hectaria ti cauvasan mangtedto iti lima a litro, ket ti tallo cavan a bin-i mangpataudto laeng iti sangapulo salup.

¹¹ Asi pay dagiti bumangon a masapa iti bigat, tapno sumurotda iti naingel nga inumen; nga idiayda a marabiian unay, agingga iti paggilayaben ida ti arac!

¹² Ket cadagiti rambacda adda arpa, gitarra a bassit, pandereta, pito ken arac; ngem dida imatangan ti aramid ni Jehova, ket dida met otoben dagiti panagaramid dagiti imana.

¹³ Gapuna a ti ilic napan iti pannacacayaw agsipud ti kinakirang ti isip; ket dagiti natan-ocda a tattao nabisinanda, ket ti caaduanda mawawda unay.

¹⁴ Gapuna a ni Tanem pinadackelna ti tarigagayna, ken linuctanna ti ngiwatna a di marucod; ket ti dayagda, ken ti caaduanda, ken ti rambacda, ken ti makipagragsac cadacuada, umologda itoy a Tanem.

¹⁵ Ket ti nababa a tao maparucnoy, ket ti natan-oc a tao mapaemma, ket dagiti mata ti nangato mapaalumamayda:

¹⁶ Ngem ni Jehova dagiti buybuyot maitanoc iti kinajusticia, ket ti Dios a Santo masantificar iti kinalinteg.

¹⁷ Iti casta agarabton dagiti cordero a cas addada iti pacapastoranda, ket dagiti disso a langalang dagiti nalucmeg canento ti agtawtawataw.

¹⁸ Asi pay dagiti agguyod ti kinadakes iti taltali ti kinatiri, ken basol a cas la iti pannacaaramat ti maysa a guyodan ti pasagad;

¹⁹ A cunaenda, Agsiglat coma, dardarasenna coma ti aramidna, tapno isu makitatayo; ken ti patigmaan ti Santo ti Israel umasideg coma ken dumteng, tapno isu maammoantayo!

²⁰ Asi pay dagiti mangnagan naimbag iti dakes, ken dakes iti naimbag; nga icabilda a sipnget ti lawag, ket lawag ti sipnget; nga icabilda a napait ti nasam-it, ket nasam-it ti napait!

²¹ Asi pay dagiti mamasirib cadagiti matada met laeng, ken dagiti manakem iti imatangda met laeng!

²² Asi pay dagiti mamaingel nga aginum iti arac, ken tattao a napigsa a mamaglalaoc iti naingel nga inumen;

²³ A mangjustificar iti maysa a managdacdakes a gapu iti maysa a pannocsoc, ket pucawenda ti kinalinteg iti nalinteg.

²⁴ Gapuna a cas iti gil-ayab, ti apuy ibusenna ti punget ti garami ken cas iti nagango a root a marunaw iti gil-ayab, castanto ti ramutda a cas iti pannacalungtot, ket ti sabongda tumayabto a cas iti tapoc; agsipud ta inwacsida ti linteg ni Jehova dagiti buybuyot, ken inuyawda ti sao ti Santo ti Israel.

²⁵ Gapuna a ti pungtot ni Jehova simged a maibusor iti ilina, ken inunnatna ti imana a maibusor cadacuada, ken kinabilna ida; ket dagiti banbantay nagkintayegda, dagiti bangbangcay addada a cas rugit iti tengnga dagiti calcalsada. Iti amin daytoy di pay mapatuckiad ti pungtotna, no di ket ti imana adda pay laeng a silalayat.

²⁶ Ket isu mangitayagto iti maysa a wagayway cadagiti nasnacion iti adayu, ket sultipannanto ida manipud iti pungto ti daga; ket, adtoy, umaydanto a sigaganat ken napardas.

²⁷ Awanto ti mabannog wenno maitibcol cadacuada; awanto cadacuada ti agdungsa ket awan met ti maturog; ket di met maiccat ti barikes iti lomoda, ket di met mapugsat ti cordon dagiti zapatosda:

²⁸ A dagiti panada natarumamis, ken sibibiat dagiti ba-ida; ket dagiti cuco dagiti cabayoda maibilangdanto a cas la pamulinawen, ken dagiti pilid dagiti lugluganda cacasda la maysa nga alawig:

²⁹ Ti ungorda cas la iti leon a cabaiyan, agungordanto a cas cadagiti ur-urbon ti leon; wen, agungordanto, ken tucmaanda ti samsam, ket ipanawda a dida maanano, ket awanto a pulos ti mangisalacan.

³⁰ Ket agungordanto a bumosor cadacuada ti dayta nga aldaw a cas iti ungor ti baybay: ket no ti maysa cumita iti daga, adtoy, ti sipnget ken rigat; ket ti lawag napasipnget cadagiti ululepna.