Isaias 49 - Ti Biblia (1973)

Maisalacanto nga agpadpada dagiti Gentil ken Judio babaen ti adipen ni Jehova. Dagiti napateg a cari iti Sion.

¹ Timudendac, O purpuro; ken dumngegcayo nga inilin-ili manipud adayu: ni Jehova inayabannac nanipud iti aanacan, nanipud iti tian ni inac nasasaon ti naganco:

² Ket inaramidna ti ngiwatco a cas maysa a campilan a natadem; liningedannac iti aniniwan ti imana: ken isu inaramidnac a maysa a napasileng nga orongan; iti taguban indulinnac:

³ Ket kinunana caniac, Sica ti adipenco; Israel a kencuana pacaidaydayawacto.

⁴ Ngem kinunac, nagbannogac nga awan ti papaayna, inibusco ti pigsac a maipaay iti awan ken iti kinaubbaw; nupay casta di bumurong ti kinajusticia a rumbeng caniac adda ken ni Jehova, ken ti pannupapac adda iti Diosco.

⁵ Ket ita cuna ni Jehova a nangaramid caniac nga adipenna nanipud iti aanacan, tapno pagsubliec kencuana ni Jacob, ken tapno ti Israel maurnong kencuana (ta natacnengac cadagiti mata ni Jehova, ken ti Diosco nagbalin a pigsac);

⁶ Wen, isu cunana, Bassit unay a banag ti panagbalinmo nga adipenco a mamangon cadagiti caputotan ni Jacob, ken mangisubli iti naigaga ti Israel: Itedcanto met a silaw cadagiti Gentil, tapno macapagbalinca a pangisalacanco agingga iti ungto ti daga.

⁷ Castoy ti cuna ni Jehova, a Mannubbot ti Israel ken Santona, isu nga umumsien ti tao, isu a guraen ti nacion, iti maysa nga adipen dagiti agtuturay: Dagiti ar-ari makitadanto ken tumacderda; dagiti panguloen, ket isuda agdayawdanto; gapu ken ni Jehova a matalec, ti Santo ti Israel, a namili kenca.

⁸ Castoy ti cuna ni Jehova, Iti pannawen a maitutup sinungbatanca, ken iti aldaw ti pannacaisalacan binadanganca; ket igagacanto, ken itedcanto a maipaay a tulag cadagiti tattao, a mamangon iti daga, ken mamagtawid cadagiti nalangalang a tawid;

⁹ A cunaem cadagiti adda a nabalud, Rumuarcayo; cadagiti adda iti kinasipnget, Agparangcayo. Agarabdanto cadagiti daldalan, ken cadagiti nalucasan a pantoc ti pagpaarabandanto.

¹⁰ Saandanto a mabisinan ken mawaw; saanto met a cabilen ida ti pudot ken init: ta daydiay adda caasina cadacuada iturongna ida, iti met denna ti ubbog ti danum ti pangidalanannanto cadacuada.

¹¹ Ket aramidecto a dalan, amin a banbantayco, ken dagiti napatac a daldalanco maitan-ocdanto.

¹² Adtoy, dagitoy dumtengdanto nga aggapu iti adayu; ket, adtoy, dagitoy manipud iti amianan ken manipud iti laud; ken dagitoy manipud iti daga ti Sinim.

¹³ Agcantacayo, O langlangit; ken agragsacca O daga; ken pumgaaccayo iti panagcanta, O banbantay; ta ni Jehova liniwliwana ti ilina, ken caasiannanto dagiti naladingit a tattaona.

¹⁴ Ngem ti Sion kinunana, Ni Jehova binay-annac, ket ti Apo nalipatannac.

¹⁵ Mabalinan aya ti maysa a babai a lipatan ti maladagana nga agsuso, a dina ket coma caasian ti anac ti aanacanna? wen, dagitoy mabalin a macalipatda, ngem saanac a macalipat kenca.

¹⁶ Adtoy, imburicca iti daculap dagiti im-imac; dagiti bacudmo addada nga agnanayon iti sangoanac.

¹⁷ Dagiti annacmo agpardasda, dagiti nangracrac kenca ken dagiti nangdadael kenca adayuandacanto.

¹⁸ Itangadmo dagiti matam iti aglicmut, ken matmatam: amin dagitoy aggournongda, ket dumtengda kenca. Cas sibibiagac, cuna ni Jehova, di bumurong nga agcawescanto cadacuada amin a cas maysa nga arcos, ken ibarikesmo ida a cas maysa a novia.

¹⁹ Ta no maipapan iti aglangalang a dissom ken ti narba a dissom, ken ti dagam a nadadael awan duadua nga ita mailetancanto unay cadagiti umili, ken dagiti nangalu-nun kenca mayadayudanto.

²⁰ Dagiti annac ti kinacacaasim cunaendanto pay cadagiti lapayagmo, Ti disso nailet unay caniac; iccannac ti pagyanan tapno macapagtaengac.

²¹ Iti casta cunaemto iti pusom, Asino ti nangipasngay cadagitoy caniac idinto a naulilaac cadagiti annacco, ken agwaywayasac, maysaac a naibelleng ken agtawtawataw a magmagna? ket asino ti nangtagibi cadagitoy? Adtoy, nabaybayanac a maymaysa; dagitoy sadino ti yanda idi?

²² Castoy ti cuna ni Apo Jehova, Adtoy, itayagconto ti imac cadagiti nasnacion, ken ibayogconto ti wagaywayco cadagiti tattao; ket yegdanto dagiti annacmo a lallaki cadagiti saclotda, ken dagiti annacmo a babbai cadagiti ababagada.

²³ Ket dagiti ar-ari isudanto dagiti mangsisiwa nga ammam, ket dagiti reina mangsisiwa nga innam: ket isuda irucbabdanto nga irucnoy iti daga dagiti ruprupada kenca, ken dilpatandanto ti tapoc dagita sacsacam; ket maammoamto a siac ni Jehova; ket dagiti agpannuray caniac saandanto a mabainan.

²⁴ Maiccatto aya ti samsam iti napigsa, wenno ti nalinteg a pannacacayawna maluc-atan?

²⁵ Ngem castoy ti cuna ni Jehova, Uray dagiti nacayawan ti napigsa maipanawto, ken ti sinamsam ti nacakigkigtot maisalacanto; ta makisuppiatacto iti dayta makisuppiat kenca, ken isalacanconto dagiti annacmo.

²⁶ Ken pacanecto dagiti mamarigat kenca iti lasagda met laeng; ken mabartecdanto iti darada met laeng, a cas nasam-it nga arac; ket amin a lasag maammoannanto a siac, ni Jehova, ti Mangisalacanmo, ken Mannubbotmo, ti Mannacabalin ni Jacob.