Isaias 48 - Ti Biblia (1973)

Pannacatubngar ti di panagtalec ti Israel. Maicari ti pannacaispal iti Babilonia.

¹ Denggenyo daytoy, O balay ni Jacob, a mapanaganan iti nagan ti Israel, ken nagtaud cadagiti dandanum ti Juda; dacayo nga agsapata iti nagan ni Jehova, ken mangipalagip iti Dios ti Israel, ngem saan nga iti kinapudno ken saan met nga iti kinalinteg,

² (Ta naganenda ti bagida a tattaoda iti santo nga ili, ken agsadagda iti Dios ti Israel; Jehova dagiti buybuyot ti naganna):

³ Impablaacco dagiti immuna a banbanag nanipud idi damo; wen, rimmuarda iti ngiwatco, ken iparangco ida; pinnetatco ida nga inaramid, ket natungpalda.

⁴ Agsipud ta ammoc idi a natangkenca, ket ti tengngedmo piskel a landoc, ket ti mugingmo gambang;

⁵ Gapuna nga isu ti impablaacco kenca nanipud idi unana; idi saan pay a naaramid impakitacon kenca; di la ket ta cunaem coma, Ti diosec inaramidna ida, ken ti kinitikitan a ladawan ken ti sinocog a ladawan a cucuac imbilinda ida.

⁶ Sica isu ti nangngegmo; mamatmatanyo amin daytoy; ket dacayo, dicayo aya ipablaac? impakitac kenca dagiti babbaro a banbanag manipud itoy a pannawen, nga isuda dagiti naitalimeng a banbanag, a dica ida naammoan.

⁷ Caparparsuada ita, ket saan a nanipud idi damo; ket idi sacbay daytoy nga aldaw dica ida nangngegan; di la ket ta cunaem coma, Adtoy, ammoc ida idin.

⁸ Wen, dica nangngegan; wen, dica naammoan; wen, nanipud idi unana ti lapayagmo saan idi a naluctan: ta ammoc idi a nagaramidca a sililiput unay, ket nanagananca iti maysa a managsukir nanipud iti aanacan.

⁹ Gapu iti naganco pagtantanec ti ungetco, ken gapu iti dayawco gawidac kenca, tapno saanca pay a keltayen.

¹⁰ Adtoy, siac ginugoranca, ngem saan a cas iti pirac; siac pinilica iti horno ti pacarigatan.

¹¹ Gapu caniac, gapu caniac, isu ti aramidecto; ta casano ti pannacatulaw coma ti naganco? Ket ti dayagco diacto ited iti sabali.

¹² Dumngegcayo caniac, O Jacob, ken Israel nga inayabac: Siac daydiay: siac ti umuna, siac met ti maudi.

¹³ Wen, ti imac insaadna ti pamuon ti daga, ken ti imac a canawan isacnapna dagiti langlangit: no ayabac ida, sangsangcagiddanda a tumacder.

¹⁴ Agtatallaongcayo, dacayo amin, ket denggenyo; asino cadacuada ti mangipablaacto cadagitoy a banbanag? Daydiay dungdungoen ni Jehova aramidennanto ti pagayatanna iti Babilonia, ken ti tackiagna maipatayto cadagiti Caldeos.

¹⁵ Siac, siac met laeng sinaoc, wen, isu ti inayabac; isu ti inyegco, ket isu aramidennanto a narang-ay ti dalanna.

¹⁶ Umasidegcayo caniac, denggenyo daytoy; nanipud idi punganay; saanac a nagsao iti linged; nanipud idi pannawen a kinaaddana, addaac idiay: ket ita ni Apo Jehova imbaonnac, ken ti Espirituna.

¹⁷ Castoy ti cuna ni Jehova, ti Mannubbotmo, ti Santo ti Israel: Siac ni Jehova a Diosmo, a mangisuro kenca a maipaay iti gungunam, a mangiturong kenca iti dalan a papanam coma.

¹⁸ O no dinengngegmo coma dagiti bilbilinco! iti casta ti talnam cas coma iti maysa a carayan, ken ti kinalintegmo cas la coma daldalluyon ti baybay:

¹⁹ Ti bin-im cas met la coma darat, ken ti putot ti tianmo casda la coma iti caadu ti darat; ti nagana saan coma a makeltay di-met mapucaw iti sangoanac.

²⁰ Magnacayo manipud Babilonia, italawanyo dagiti Caldeos; ipablaacyo babaen ti timec ti panagcanta, ibagayo daytoy, ipuccawyo agingga iti pungto ti daga: cunaenyo, Ni Jehova sinubbotna ni adipenna a Jacob.

²¹ Ket dida nawaw idi inturongna ida nga inlasat cadagiti langlangalang: isu pinaayusna dagiti dandanum a naggapu iti bato a maipaay cadacuada; pinisina met ti bato ket nagsayasay dagiti dandanum.

²² Awan ti talna iti nadangkes, cuna ni Jehova.