Isaias 47 - Ti Biblia (1973)

Maipadto ti panangocom ti Dios a maipapan iti Babilonia. Ti kinamaelna awan capapaayanna.

¹ Umulogca, ken agtugawca iti tapoc, O virgen nga anac ti Babilonia; agtugawca iti daga nga awan trono, O anac a babai dagiti Caldeos; ta sica saancanton a managanan naganus ken nalami.

² Alaem dagiti bato a paggilingan, ket aggilingca iti bellaay; iccatem ta dulongdongmo, ucsobem ti pasinggayadmo, lislisam ta gurongmo, payacyacam dagiti carcarayan.

³ Ti kinalamolamom malucasanto, ket ti ibainmo makitanto: bumalesacto, ket awanto ti iliclicco a tao.

⁴ Ti mannubbot cadatayo, Jehova dagiti buybuyot ti naganna, ti Santo ti Israel.

⁵ Agtugawca a siuulimec, ken sumrecca iti kinasipnget, O anac a babai dagiti Caldeos; ta saancanto a managananen Ti apo dagiti pagpagarian.

⁶ Nagungetac iti ilic, minulitac ti tawidco, ken intedco ida ita imam: dica ida pinakitaan iti panangngaasi; iti lacay impataymo a nadagsen unay ti sangolmo.

⁷ Ket kinunam, Siacto ti apo iti agnanayon; iti casta a dica impapuso dagitoy a banbanag, ket dica met linagip ti maud-udi a pagtungpalanna.

⁸ Ita ngarud denggem daytoy, sica a mayawat cadagiti ragragsac, nga agtugawca a sitatalged, a cunam ita pusom, Siac, ket awanen ti sabali no di la sisiac; saanacto nga agtugaw a cas maysa a balo a babai, ket diacto met maammoan ti pannacapucaw dagiti annac:

⁹ Ngem dagitoy, dua a banag dumtengdanto kenca a kellaat iti maysa nga aldaw, ti pannacapucaw dagiti annac, ken ti pannacabalo: iti amin a kinaananayda dumtengdanto kenca, iti kinaadu ti panagan-anitom, ken nawadwad unay a kinabaglanmo.

¹⁰ Ta sica nagtalcam ti kinadangkesmo; sica kinunam, awan ti macakita caniac; ti kinasiribmo ken ti pannacaammom inallilawdaca; ket sica kinunam ita pusom, Siac, ket awanen ti sabali no di la sisiac.

¹¹ Gapuna a ti dakes rumabawto kenca; dicanto maammoan ti pagleggacanna: ket ti ranggas agpasagto kenca; dicanto mabaelan nga iccaten; ken ti pannacawarawara dumtengto kenca a kellaat, a dica maammoan.

¹² Tumacderca ita agraman cadagiti kinabaglanmo, ken iti kinaadu dagiti panagan-anitom, nga isuda dagiti nagbannogam nanipud idi kinaubingmo; bareng no macagun-odca iti gunguna, bareng no macaatiwca.

¹³ Nabannogca iti kinaadu ti patigmaanmo; tumacder coma ita a mangisalacan kenca cadagiti banbanag a dumtengto kenca dagiti astrologos, dagiti agpaliiw cadagiti bitbitwen, dagiti agpacta iti binulanbulan.

¹⁴ Adtoy, casdanto la punget; ti apuy uramennanto ida; didanto macalisi iti pigsa ti darang: awanto ti matda a beggang a paginudoan, wenno apuy nga iti sangona pagtugawan.

¹⁵ Castoyto ti pagmaayanda kenca dagiti banbanag a nagbanbannogam: dagiti nagtagtagilaco kenca nanipud idi kinaubingmo agtawtawatawdanto tunggal maysa iti naggapuanna; awanto ti mangicaluya kenca.