Isaias 45 - Ti Biblia (1973)

Ni Jehova bilinenna ni Ciro a mangluc-at iti ilina. Ni Jehova ti maymaysa a mangispal.

¹ Castoy ti cuna ni Jehova iti pinulotanna, ken Ciro, a ti imana a canawan pinetpetac, a mangparucma cadagiti nasnacion iti sangoananna, ket bucraacto dagiti lomlomo dagiti ar-ari; tapno manglucat cadagiti ruruangan iti sangoananna, ket dagiti ruruangan saandanto a maripcan:

² Mapanacto iti sangoanam, ket palanasecto dagiti lasonglasong: burburakecto dagiti gambang a ruruangan, ket putdecto dagiti balbalunet a landoc;

³ Ket itedconto kenca dagiti gupgupit ti kinasipnget, ken gameng a nailemmeng cadagiti nalimed a disdisso, tapno sica maammoam a siac, ni Jehova, a mangayab kenca iti naganmo, ti met laeng Dios ti Israel.

⁴ Gapu ken ni Jacob nga adipenco, ken ti Israel a pinilic, inayabanca nga innaganan: siac ginaladanca, nupay no dinac amammo idi.

⁵ Siac ni Jehova, ket awanen ti sabali; awan ti Dios no di la sisiac. Siac baricsancanto, nupay no dinac amammo idi;

⁶ Tapno isuda maammoanda manipud iti leleggacan ti init, ken manipud iti laud, nga awan ti sabali no di la sisiac: Siac ni Jehova, ket awanen ti sabali.

⁷ Siac parnuayec ti lawag, ken parsuaec ti sipnget; aramidec ti talna ket parsuaec ti pacdacsan; siac ni Jehova a mangaramid amin cadagitoy.

⁸ Agipaaruyotcayo, langlangit manipud ngato, ken dagiti tangatang agibucbocda coma ti kinalinteg: aglucat coma ti daga tapno macapataud ti pannacaisalacan, ken aramidenna a makigiddan a tumpuar ti kinalinteg; siac ni Jehova, a namarsua kencuana.

⁹ Asi pay daydiay makiringgor iti Nangaramid kencuana! maysa a ribac cadagiti ribac iti dagaCunaento aya ti pila iti agdamili, kencuana, Ania ti aramidem? wenno ti inaramidmo, cunana kenca, Awan aya ti imana?

¹⁰ Asi pay daydiay agcuna iti amana, Apay nga agputotca? wenno iti maysa a babai, Apay nga agpasngayca?

¹¹ Castoy ti cuna ni Jehova, ti Santo ti Israel, ken ti Nangaramid kencuana: Intuodem caniac dagiti banbanag nga umayto; bilinendac a maipanggep cadagiti annacco, ken maipanggep iti aramid dagiti im-imac.

¹² Inaramidco ti daga ken pinarsuac ti tao iti rabawna: Siac, dagiti im-imac met laeng, binistradco dagiti langlangit; ket binilinco amin dagiti buybuyotda.

¹³ Isu binangonco iti kinalinteg, ket aramidecto a nalinteg amin dagiti dalanna: isu bangonennanto ti ilic, ket isu palubosannanto nga agawid, dagiti kinayawac saan a gapu iti ngina ket saan met a gapu iti gunguna, cuna ni Jehova dagiti buybuyot.

¹⁴ Castoy ti cuna ni Jehova, Ti aramid ti Egipto, ken ti tagilaco ti Etiopia, ken Sabeos, tattao a natayag, umaydanto kenca, ket cucuamto ida: sumurotdanto kenca; umaydanto a sicacawar; ket agrucbabdanto kenca, agcararagdanto kenca, a cunada, Agpayso nga adda kenca ti Dios; ket awanen ti sabali, awan ti sabali a Dios.

¹⁵ Pudno a sica ti Dios nga ilimedmo ti bagim, O Dios ti Israel, a Mangisalacan.

¹⁶ Isuda maibabaindanto, wen, ken mariruda amin; mapandanto iti pannacariru nga agcucuyog dagiti agar-aramid cadagiti didiosen.

¹⁷ Ngem ti Israel isalacanto ni Jehova iti agnanayon a pannacaisalacan: saancayto a maibabain ket dicayo met mariru iti lubong iti awan patinggana.

¹⁸ Ta castoy ti cuna ni Jehova a namarsua cadagiti langlangit, ti Dios a nangbukel ken nangaramid iti daga, isu a nangpasingked kencuana ken isu pinarsuana a saan nga ongaong, a binukelna tapno isu ti pagyanan: Siac ni Jehova; ket awan ti sabali.

¹⁹ Saanac a nagsao iti nalimed, wenno iti maysa a disso iti daga ti kinasipnget; saanco a kinuna iti bin-i ni Jacob, sapulendac nga awan ti pagmaayanna: siac, ni Jehova, agsaoac iti kinalinteg, ipablaacco dagiti nalinteg a banbanag.

²⁰ Aguornongcayo ken umaycayo; umasidegcayo nga agcucuyog, dacayo a nailiclic cadagiti nasnacion; dagidiay nga awanan pannacaammo nga agawit ti cayo ti kinitikitan a ladawanda, ken agcararagda iti maysa a dios a dina mabalin ti mangisalacan cadacuada.

²¹ Ipablaacyo, ken isu ti iparangyo; wen, agpipinnatigmaanda coma; asino ti nangipakita iti daytoy nanipud idi ugma? asino ti nangipablaac itoy idi nabayagen a pannawen? saan a siac aya, ni Jehova? ket awan ti sabali a Dios no di la sisiac, maysa a nalinteg a Dios ken maysa a Mangisalacan: awanen ti sabali no di la sisiac.

²² Kitaendac, ket maisalacancayo amin a pungto ti daga; ta siac ti Dios, ekt awanen ti sabali.

²³ Caniac met laeng nagsapataac, rimmuar iti ngiwatco ti sao ti kinalinteg, ket saanto a maisubli, a tunggal tumeng agrucbabto caniac, ken tunggal dila agsapatanto.

²⁴ Masasao a maipapan caniac, ken ni Jehova laeng ti puon ti kinalinteg ken kinapigsa; kencuana met laeng mapanto dagiti tattao; ken amin dagiti gumura kencuana maibabaindanto.

²⁵ Ken ni Jehova ti pacapalinteganto amin a bin-i ti Israel, ken paggloriaandanto.