Isaias 44 - Ti Biblia (1973)

Ni Jehova ti maymaysa a Dios. Ti kinamaag ti panagrucbab cadagiti didiosen maipalawag. Ni Jehova pacawanenna ken subbutenna ti ilina.

¹ Ita ngarud denggem, O Jacob nga adipenco, ken Israel a pinilic:

² Castoy tikinuna ni Jehova a namarsua kenca, ken nangbukel kenca nanipud iti tian, isu a mangtulongto kenca: Dica agbuteng, O Jacob nga adipenco; ken sica Jeshurun a pinilic.

³ Ta mangibucbocacto ti danum iti mawaw, ken ay-ayus ti danum iti rabaw ti namaga a daga; Iparucpocconto ti Espirituc iti putotmo, ken ti bendicionco iti caputotam:

⁴ Ket isuda tumpuardanto iti tengnga ti carootan a cas la cayo a narucbus iti denna ti danum.

⁵ Ti maysa cunaennanto, Cucuanac ni Jehova; ket ti sabali panagananto ti bagina iti nagan ni Jacob; ket ti sabali isuratnanto iti imana ti maipaay ken ni Jehova, ken galadannanto ti bagina iti nagan nga Israel.

⁶ Castoy ti cuna ni Jehova, nga ari ti Israel ken Mannubbot kencuana, Jehova dagiti buybuyot: Siac ti immuna ken ti camaudianan; ket awan ti Dios no di la sisiac.

⁷ Ket siasino, ti cas caniac, a mangayabto, ken mangipablaacto, ken mangurnosto a maipaay caniac, nanipud panangisaadco cadagiti im-mun-una a tattao? ken dagiti banbanag nga um-umay, ken dagiti banbanag a mapasamacto, ipablaacda coma.

⁸ Dicayo agbuteng, ket dicayo met umamac: diac aya impablaac kenca idi unana, ken impakita? ket dacayo dagiti sacsic? adda aya sabali a Dios a saan a siac? wen, awan ti Bato; awan ti ammoc.

⁹ Dagiti mangbukel iti kinitikitan a ladawan isuda amin ubbawda; ket dagitoy a banbanag a pagayayatanda saanto a manggunguna; ken dagiti sacsida met laeng saanda a macakita, dida met ammo: tapno dagidiay maibabaindanto.

¹⁰ Asino ti nangbukel iti maysa a dios, wenno nangsocog iti maysa a ladawan nga awan a pulos ti pagpaayanna?

¹¹ Adtoy, amin a cadduana maibabaindanto; ken dagiti agar-aramid tattaoda: maurnongda coma amin, tumacderda coma; umamacdanto, maibabaindanto a padapada.

¹² Ti mammanday mangaramid iti maysa a wasay, ken agpanday cadagiti beggang, ket ti martillo ti pangbukelna, ken aramidenna babaen iti napigsa nga imana: wen, isu agbisin ken agcurang ti pigsana: saan nga uminum ti danum ket agcapuy.

¹³ Ti allawagi mangyunnat iti maysa a paltic; ugedanna iti maysa a lapiz; iti catam ti pangtabasna, ket bukelenna iti compas, ket aramidenna a cas iti ladawan ti tao, cas mayannurot iti sayaat ti maysa a tao, tapno agtaeng iti balay.

¹⁴ Isu pucanenna cadagiti cantingen, ken alaenna ti encina ken lugo, ken patibkerenna a maipaay kencuana ti maysa cadagiti caycayo iti cabakiran: mangimula iti parwa, ket taraonan ti tudo.

¹⁵ Ket iti casta aramatento ti maysa a tao a pangpuur: ket mangala ket aginudo; wen, isu ti pasgedanna, ken agluto iti tinapay; wen, iti daydiay mangaramid iti maysa a dios, ket pagdayawanna: isu ti aramidenna a maysa a kinitikitan a ladawan, ket pagparintumenganna.

¹⁶ Puuranna ti sangcapaset ti cayo iti apuy; iti pannacaaramat ti sangcapaset mangan iti lasag; mangitono iti tinono a sidaen, ket mabussog; wen, aginudo, ken cunana, Ah, bimmaraac, nakitac ti apuy.

¹⁷ Ket ti matda kencuana aramidenna a maysa a dios, nga isu ti kinitikitan a ladawan; isu agrucbab itoy a ladawan ken agcararag, ken aglualo kencuana, ken cunana, Isalacannac; ta sica ti diosco.

¹⁸ Isuda saanda nga ammo, ken dida met utoben? ta isu inabbonganna dagiti matada, tapno dida macakita; ken dagiti pusoda, tapno dida macaawat.

¹⁹ Ken awan ti mangipalagip, ket awan ti pannacaammo ken awan met ti pannacaawat nga agcuna, Pinuurac ti cayo a nayon daytoy a ladawan iti apuy; wen, naglutoac iti tinapay iti rabaw dagiti beggangna; nangitonoac iti lasag ket sindac: ket aramidecto aya ti matda kencuana a maysa a kinarimon? agrucbabacto pay aya iti puted ti maysa a cayo?

²⁰ Isu agtaraon iti dapu; ti naallilaw a puso pinagbawingna; ket dina maisalacan ti cararuana, ken dina met cuna, Awan aya ti ulbob iti akincanawan nga imac?

²¹ Laglagipem dagitoy a banbanag, O Jacob, ken Israel; ta sica ti adipenco: siac inaramidca; sica ti adipenco: O Israel, saancanto a malipatan.

²² Siac pinucawco a cas la ulep a napuscol dagiti kinasukirmo, ken cas maysa nga ulep dagiti basbasolmo: agsublica caniac; ta siac sinubbotca.

²³ Agcantacayo, O langlangit, ta ni Jehova inaramidna daytoy; agriawcayo nababbaba a disdisso ti daga; pumgaaccayo nga agcanta dacayo a banbantay, O bakir, ken tunggal cayo kencuana: ta ni Jehova sinubbotna ni Jacob, ken mapadayawanto iti Israel.

²⁴ Castoy ti cuna ni Jehova, a Mannubbot kenca, ken nangbukel kenca nanipud iti aanacan: Siac ni Jehova a mangaramid cadagiti amin a banbanag; nga isacnapco a sisiac dagiti langlangit; ken mangpalawa iti daga (asinonto ti caduac?);

²⁵ A mangdadael cadagiti pagilasinan dagiti managulbod, ken mamagpungtot cadagiti mammadles; ken mangbalictad cadagiti mamasirib a tattao, ken mangaramid iti pannacaammoda a kinamaag;

²⁶ A mamanecnec iti sao ti adipenna, ken manungpal iti balacad dagiti babaonenna; nga agcuna iti Jerusalem, Isu matagitaoanto; ken cadagiti il-ili ti Juda, Isuda mapatacderdanto, ken bangonecto dagiti narnarba a dissona;

²⁷ Nga agcuna iti yuyeng, Agmagaca, ken pagmagaecto dagiti carcarayanmo;

²⁸ Nga agcuna maipapan ken Ciro, Pagpastorec, ken aramidennanto amin a pagayatac, maipapan met laeng iti Jerusalem, Isu mapatacderto; ken iti templo, Ti pamuonmo maisaadto.