Isaias 43 - Ti Biblia (1973)

Ni Jehova ti maymaysa a mangisalacan. Ti pannacaispal ti Israel iti Babilonia. Ti panaglabsing ti ilina.

¹ Ngem ita castoy ti cuna ni Jehova a namarsua kenca, O Jacob, ken isu a nangbukel kenca, O Israel; Dica agbuteng, ta siac sinubbotca; siac inayabanca nga innaganan, sica ti cucuac.

² Intono ballasiwem dagiti dandanum, addaacto kenca; ket iti pannacaballasiw dagiti carcarayan didacanto layusen: intono magnaca a lumasat iti apuy, saancanto a mapuuran, ket dinaca met silmutan ti darang.

³ Ta siac ni Jehova a Diosmo, ti Santo ti Israel, a Mangisalacan kenca; intedco ti Egipto a cas subbotmo, naisucat kenca ti Etiopia ken Seba.

⁴ Agsipud ta napategca idi iti imatangco, ken madaydayaw, ket dinungdungngoca; gapuna nga itedconto dagiti tattao a sucatmo, ken dagiti il-ili a sumandi iti biagmo.

⁵ Dica agbuteng; ta addaac kenca: yegconto ti bin-im nga igapu iti daya ken urnongencanto nga igapu iti laud;

⁶ Cunaecto iti amianan, Ibbatam; ken iti abagatan, Dica igawid; yegmo dagiti annacco a lallaki manipud iti adayu, ken dagiti annacco a babbai manipud iti pungto ti daga;

⁷ Tunggal maysa a magaladan iti naganco, ken daydiay pinarsuac a maipaay iti dayagco, isu a binukelco, wen, daydiay inaramidco.

⁸ Iparangmo dagiti bulsec a tattao nga adda matada, dagiti tuleng nga adda lapayagda.

⁹ Maurnong coma dagiti amin a nasnacion, ken dagiti inilin-ili matipontiponda coma: asino cadacuada ti macabalin a mangipalgac itoy, ken mangiparang cadagiti im-mun-una a banbanag cadatayo? yegda coma dagiti sacsida, tapno majustificarda; wenno, denggenda coma, ken cunaenda, Isu ti pudno.

¹⁰ Dacayo dagiti sacsic, cuna ni Jehova, ken ti adipenco a pinilic; tapno maammoanyo ken patiendac, ken maawatanyo a siac daydiay: awan idi ti nabukel a Dios nga im-mun-una ngem siac, ket awanto met iti sumaruno caniac.

¹¹ Siac, siac met laeng ni Jehova; no saan a siac awan ti mangisalacan.

¹² Impablaacco, ken insalacanco, ken impakitac; ket awan ti sabali a gangannaet a dios cadacayo: gapuna a dacayo dagiti sacsic, cuna ni Jehova, ket siac ti Dios.

¹³ Wen, nanipud pannacaadda ti aldaw siac daydiay; ket awan a pulos ti macalapsut iti imac: agaramidac, ket asino ti macatiped?

¹⁴ Casta ti cuna ni Jehova, a Mannubbotyo, ti Santo ti Israel: Gapu cadacayo nagbaonac idiay Babilonia, ket yulogconto ida amin a cas agtalaw, uray pay dagiti Caldeos, cadagiti sasacayan ti panagragrag-oda.

¹⁵ Siac ni Jehova a Santoyo, ti Namarsua iti Israel, ti Ariyo.

¹⁶ Casta ti cuna ni Jehova, a mangaramid ti dalan iti taaw, ken maysa a dana cadagiti mannacabalin a dandanum;

¹⁷ Isu a mangiruar iti lugan ken cabayo, ti buyot ken ti maingel a tao (agpasagdanto amin, saandanto a bumangon; mapucawda, maiddepda a cas iti micha):

¹⁸ Dicayo laglagipen dagiti immun-una a banbanag, ket dicayo met panunoten dagiti daan a banbanag.

¹⁹ Adtoy, agaramidacto iti baro a banag; tumpuarto itan; dicayto aya maammoan? mangicabilacto pay iti maysa a dalan iti let-ang, ken carcarayan iti langalang.

²⁰ Dagiti animal iti away dayawendacto, dagiti chacal ken dagiti avestruz; gapu ta itdec dagiti danum iti let-ang, ken carcarayan iti langalang, tapno uminum ti ilic a pinilic,

²¹ Ti umili a binukelco a maipaay caniac met laeng, tapno iparangarangda coma ti pannacadayawco.

²² Nupay casta sica dinac inawagan, O Jacob; no di ket sica napacsuyanca caniac, O Israel.

²³ Sica dica nangyeg caniac ti naggapu cadagiti carnerom a maipaay a mapuuran a datdaton: dinac met dinayaw cadagiti datdatonmo. Siac saanca a pinaawitan cadagiti maidatdaton, saanca a pinacsuyan iti incienso.

²⁴ Sica dinac ingatangan ti unas gapu iti pirac, ket dinac met pinennec iti taba dagiti datonmo: no di ket sica pinadagsenannac cadagiti basbasolmo, sica binannognac cadagiti kinadangkesmo.

²⁵ Siac, siac met laeng daydiay nangpunas cadagiti labsingmo gapu caniac met laeng; ket diacto lagipenen dagiti basbasolmo.

²⁶ Ipalagipmo caniac; agsinnurutanta: iparangmo ti panggepmo tapno mapalintegca.

²⁷ Ti immuna nga amam nagbasol, ket dagiti mangisursuro kenca simmalungasingda caniac.

²⁸ Gapuna a tulawacto dagiti panguloen ti santuario; ket pagbalinecto ni Jacob a lunod, ken ti Israel a pacaibabainan.