Isaias 42 - Ti Biblia (1973)

Ti cari ni Jehova iti adipenna. Panagdayaw ken ni Jehova a gapu iti mannacabalin a panangispalna. Ti Israel matubngar gapu iti kinatangkenna.

¹ Adtoy, ti adipenco, isu a salacnibac; ti pinilic, a pagayayatan toy cararuac: incabilco ti Espirituc kencuana; isu yegnanto ti kinalinteg cadagiti Gentiles.

² Isu saanto nga agickis, ket dina met ipigsa ti timecna, ket dina met ipangngeg iti calsada.

³ Ti maysa a runo a naparpar dinanto bungtolen, ket ti maysa a micha a sumsumged a silulubed dinanto iddepen: isu pataudennanto ti kinalinteg iti kinapudno.

⁴ Isu saanto a cumapuy ket di met maupay agingga iti maisaadna ti kinajusticia iti daga; ken dagiti purpuro urayendanto ti lintegna.

⁵ Castoy ti cuna ti Dios a Jehova, isu a namarsua cadagiti langlangit, ken nangisacnap cadacuada; isu a nangpalawa iti daga ken ti agtaud kencuana; isu a mangited ti anges cadagiti tattao iti rabawna, ken ti espiritu cadagiti magna kencuana:

⁶ Siac, ni Jehova, inayabanca iti kinalinteg, ken petpetacto ta imam, ken aywanancanto, ken itedcanto a maipaay a maysa a tulag cadagiti tattao, maipaay a maysa a silaw dagiti Gentil;

⁷ Tapno luctam dagiti bulsec a mata, tapno iruarmo dagiti nabalud iti nailet a pagbaludan, ken dagiti agtutugaw iti nasipnget a pagbaludan iruarmo ida.

⁸ Siac ni Jehova, dayta ti naganco; ket ti dayagco diacto ited iti sabali, ket diac met ited ti dayawco cadagiti kinitikitan a ladladawan.

⁹ Adtoy, dagiti umuna a banbanag mapasamacdan, ket babbaro a banbanag ti ipablaacco; iti sacbay ti itutuppuarda ibagac cadacayo ti maipapan cadacuada.

¹⁰ Icantaanyo ni Jehova iti maysa a baro a canta, ken ti dayawna manipud iti pungto ti daga; dacayo a bumaba iti baybay, ken amin dagiti adda kencuana, dagiti purpuro, ken dagiti agnaed kencuana.

¹¹ Ti let-ang ken dagiti il-ilina ipigsada coma ti timecda, dagiti purpuroc a pagyanan ti Cedar; agcanta coma dagiti taga Sela, agriawda coma iti ragsac manipud iti tapaw dagiti banbantay.

¹² Mangtedda coma ti dayaw ken Jehova, ken ipablaacda ti dayawna cadagiti purpuro.

¹³ Ni Jehova rumuarto a cas maingel a tao; papigsaenna ti regtana a cas maysa a tao ti gubat: isu agickisto, wen, isu agriawto; aramidennanto a sipipigsa a maibusor cadagiti cabusorna.

¹⁴ Nabayagen a nagtalnaac; nagulimecac, ken ginawidac ti bagic: ita agickisacto a cas maysa a babai nga agpasical; agangsabacto ken agal-alacto met.

¹⁵ Rebbaecto dagiti banbantay ken turturod, ken gangoecto amin a rorootda; ken dagiti carcarayan pagbalinecto ida a purpuro, ken paabbatecto dagiti liblibtong.

¹⁶ Ken yegconto ti bulsec iti maysa a dalan a dida ammo: cadagiti dandana a dida ammo ti pangidalanacto cadacuada; ti sipnget aramidecto a lawag iti sangoananda, ken palintegec ti nakillo a disso. Dagitoy a banbanag aramidecto, ken diacto ida baybay-an.

¹⁷ Mapasublidanto, maibabaindanto unay, dagiti agtalec cadagiti kinitikitan a ladladawan, nga agcuna cadagiti sinocog a ladladawan, Dacayo dagiti diosmi.

¹⁸ Denggenyo, dacayo a tuleng; ken matmatanyo, dacayo a bulsec, tapno makitayo.

¹⁹ Siasino ti bulsec, no di ti adipenco? wenno ti tuleng, cas iti babaonec nga imbaonco? asino ti bulsec a cas daydiay nakicappia caniac, ken bulsec a cas iti adipen ni Jehova?

²⁰ Sica makitam dagiti adu a banbanag, ngem sica dica paliiwen; dagiti lapayagna nacalucatda, ngem isu saan a macangngeg.

²¹ Isu ti macaay-ayo ken ni Jehova, gapu iti kinalintegna, a pamadackel iti linteg, ken padayawenna.

²² Ket daytoy isu ti maysa nga ili a natacawan ken nasamsaman; isuda amin naipalab-ogda cadagiti ab-abut, ket addada a nailemmeng iti balay a pagbaludan: maipaayda a cayaw, ket awan ti mangisalacan; maipaayda a maysa a samsam, ket awan ti agcuna, Isubliyo.

²³ Siasino cadacayo ti mangipangagto iti daytoy? a mangtimudto ken dumngeg a maipaay iti pannawen a mapasungad?

²⁴ Asino ti nangyawat ken ni Jacob a maysa a samsam, ken ti Israel cadagiti tulisan? saan aya a ni Jehova? isu a maibusor kencuana nagbasoltayo, ken dagiti dalanna dida kinayat a nagnaan, ken dida met nagtulnog iti lintegna.

²⁵ Gapuna nga isu ibucbocna kencuana ti kinarungsot ti ungetna, ken ti pigsa ti gubat, ket isu pinasgedna iti aglicmut, ket dina pay inammo; ken isu pinuuranna, ket isu dina pay impapuso.