Isaias 40 - Ti Biblia (1973)

Dagiti macaliwliwa a cari. Ti saan a maipadpad a kinatan-oc ni Jehova. Ti panagpakired ti Israel.

¹ Liwliwaenyo, liwliwaenyo ti ilic, cuna ti Diosyo.

² Agsaocayo a sililiwliwa iti Jerusalem; ket ipuccawyo kencuana a ti pannakidangadangna nanungpalen, ta ti kinadangkesna napacawanen, nga isu inawatna iti ima ni Jehova iti mamindua a maipaay iti amin a basbasolna.

³ Ti timec ti maysa nga agpucpuccaw, Isaganayo iti let-ang ti dalan ni Jehova, palanasenyo iti tay-ac ti maysa a dalan a maipaay iti Diostayo.

⁴ Tunggal tanap maitan-octo, ken amin a bantay ken turod mapababadanto; ken ti lasonglasong mapalanasto, ken dagiti tibbatibbacolan a disso pagbalinem a maysa a napalanas:

⁵ Ken ti dayag ni Jehova maiparangarangto, ken amin a lasag isu ti makitadanto amin; ta ti ngiwat ni Jehova insaona.

⁶ Ti timec ti maysa cuncunana, Ipuccawmo. Ket kinuna ti maysa, Ania ti ipuccawco? Amin a lasag isu root, ken amin a kinasayaatna isu ti cas la sabong iti tay-ac.

⁷ Ti root magango, ti sabong malaylay, agsipud ta ti sang-aw ni Jehovah agpuyopoy kenkuana; pudno a dagiti tattao isuda dagiti root.

⁸ Ti root magango, ti sabong malaylay; ngem ti sao ti Diostayo mataginayonto.

⁹ O sica a mangibaga cadagiti naimbag a damdamag iti Sion, sumang-atca iti tapaw ti nangato a bantay; O sica a mangibaga cadagiti naimbag a damdamag iti Jerusalem, ipuccawmo ta timecmo a buyogen ti pigsa: ipigsam, dica abuteng; ibagam cadagiti il-ili ti Juda, Adtoy ti Diosyo!

¹⁰ Adtoy, ni Apoo Jehova umayto a cas mannacabalin, ken ti tackiagna agturayto a maipaay kencuana: Adtoy, ti panggungunana maicuyog kencuana, ken ti panupapacna adda iti sangona.

¹¹ Pagarabennanto ti arbanna a cas la maysa nga agpaspastor, urnongennanto dagiti cordero iti tackiagna, ken awitenna ida iti barucongna, ket idalannanto a nainayad dagiti adda urbonda.

¹² Asino ti nangsucat iti danum iti lucong ti imana, ken nangrucod iti langit iti danganna, ken ti nangipalaon ti tapoc ti daga iti maysa pagsucatan, ken nangganting cadagiti banbantay cadagiti pagcatian, ket dagiti turturod iti maysa a pagtimbengan?

¹³ Asino ti nangiturong iti Espiritu ni Jehova, wenno idinto ta isu ti mamalacad kencuana isu insurona?

¹⁴ Asino ti nangbalacad, ken asino ti nangisuro kencuana, ken ti nangipalawag kencuana iti dalan ti kinajusticia, ken ti nangisuro kencuana iti pannacaammo, ken ti nangiparang kencuana iti dalan ti pannacaawat?

¹⁵ Adtoy, dagiti nasnacion casda la sangcatedted ti maysa a timba, ken naibilangda a cas nalapat a tapoc ti timbengan: adtoy, isu iccatenna dagiti purpuro a cas maysa a bassit a banag.

¹⁶ Ket ti Libano di-umanay a puuran, ket di met umanay dagiti animalna a mapuuran a daton.

¹⁷ Amin dagiti nasnacion casda la awan capapayanda iti sangoananna; ibilangna ida a basbassit ngem iti awan, ken kinaubbaw.

¹⁸ Asino ngarud iti pangipadisanyo iti Dios? wenno ania a caasping ti yaspingyo kencuana?

¹⁹ Ti ladawan, maysa nga agtartrabajo ti nangsucog kencuana, ket ti mammanday iti balitoc isu ti nangcalupcup kencuana iti balitoc ket sana yaramidan cadagiti cawar a pirac.

²⁰ Ti capanglawan unay a mangirucbab iti casta a daton pilienna ti cayo a saan a bacabaken: isapulanna iti maysa a nalaing nga agtrabajo a mangbangon iti maysa ladawan a kinitikitan, a saanto a mayalis.

²¹ Dicayo naammoan aya? dicayo nangngeg aya? saan a naibaga aya cadacayo nanipud idi damo? dicayo aya naawatan nanipud idi pannacaibangon ti daga?

²² Daydiay nga agtugtugaw iti ngatoen ti nagtimbukel a daga, ket dagiti agtaeng kencuana casda la dudon; a mangibistrad cadagiti langlangit a cas maysa a bengbeng, ken mangyaplag cadacuada a cas maysa a tolda a pagyanan;

²³ A mangpucaw cadagiti pangpanguloen; isu a mangaramid cadagiti oc-ocom ti daga a cas kinaubbaw.

²⁴ Wen, isuda saanda a naimula; wen, saanda a naibunobon; wen, ti puonda saan a nagramut iti daga: nupay casta isu puyotanna ti rabawda ket magangoda, ket ti alipugpug yadayuna ida a cas la punget.

²⁵ Siasino ngarud iti pangipadisanyo caniac, tapno maipadaac coma kencuana? cuna ti Santo.

²⁶ Itangadyo dagiti matayo idiay ngato, ket kitaenyo no asino ti namarsua cadagitoy, nga babaen iti panangbilang isu iruarna dagiti buybuyotda; isu inagananna ida amin; gapu iti kinadackel unay ti kinamaingelna, ken agsipud ta napigsa iti pannacabalin, awan ti agcurang uray no maysa.

²⁷ Apay a cunaem, O Jacob, ken saoem, O Israel, Ti dalanco nailinged ken ni Jehova, ken ti kinajusticia a maiparebbeng caniac limmabas nanipud iti Diosco?

²⁸ Dica aya naammoan? dica aya nangngeg? Ti agnanayon a Dios, ni Jehova, ti Namarsua cadagiti pungto ti daga, saan a cumapuy, ket di met mabannog; awan ti macasukimat iti pannacaawatna.

²⁹ Isu ti mangpapigsa iti nacapuy: ken iti daydiay awan ti cabaelanna isu pawadwadenna iti pigsa.

³⁰ Uray pay dagiti ubbing cumapuydanto ken mabannogdanto, ken dagiti agtutubo matuangdanto a matalipupus:

³¹ Ngem dagiti agpannuray ken ni Jehova pabaroendanto ti pigsada; agpangatodanto a sipapayac a cas la aguila; agtaraydanto, ket dida mabannog; magnadanto, ket dida agcapuy.