Isaias 4 - Ti Biblia (1973)

Ti matda a mailiclic.

¹ Ket pito a babbai tengngelendanto ti maysa a lalaki iti dayta nga aldaw, a cunaenda, Canenminto ti tinapaymi met laeng, ken agcawescamto ti pagan-anaymi met laeng; isuna laeng a mainaganan ti naganmo cadacami; iccatem ti pannacaibabainmi.

² Iti dayta nga aldaw ti saringit ni Jehova nasayaatto ken nadayag, ket ti bunga ti daga mangnibinibinto ken nataerto unay a maipaay cadagiti nailiclic iti Israel.

³ Ket maaramidto, a ti mabati idiay Sion, ken ti matda idiay Jerusalem, managananto a nasantoan, ti tumunggal maysa a naisurat cadagiti agbibiag idiay Jerusalem;

⁴ Intono ugasan ti Apo ti rugit dagiti annac a babbai ti Sion, ket intono gugurannan ti dara ti Jerusalem iti tengngana, babaen ti espiritu ti kinajusticia, ken babaen ti espiritu a sumsumged.

⁵ Ket ni Jehova parsuaennanto iti rabaw ti amin a pagtaengan iti bantay Sion, ken cadagiti gimgimongda, ti maysa nga ulep ken asuc iti aldaw, ken ti raniag ti apuy iti rabii; ta addanto abbong a mayucrad iti rabaw ti amin a dayag.

⁶ Ket addanto abbong a paglinongan iti aldaw a mangilisi iti pudot, ken pagsalindegan ken paglinongan no agbaguio ken agtudo.