Isaias 38 - Ti Biblia (1973)

Ti panagsakit ni Ezekias ken ti yiimbagna. Ti cancionna a panagyaman.

¹ Cadagidi nga aldaw ni Ezekias nagsakit iti macapatay. Ket ni Isaias a mammadto nga anac ni Amoz immay kencuana, ket kinunana kencuana, Castoy ti cuna ni Jehova, Urnosem ti balaymo; ta mataycanto, ket dicanto agbiag.

² Idin ni Ezekias intaliawna ti rupana iti diding, ket nagcararag ken ni Jehova,

³ Ket kinunana, Lagipem ita, O Jehova, gumawawaac kenca, no casano ti pannagnac idi ita saclangmo iti kinapudno ken iti maysa a natarnaw a puso, ket inaramidco daydiay a naimbag ita imatangmo. Ket ni Ezekias nagsangit iti nasaem.

⁴ Idin immay ti sao ni Jehova ken ni Isaias a kinunana,

⁵ Inca, ket cunaem ken ni Ezekias, Castoy ti cuna ni Jehova, ti Dios ni David nga amam, Nangngegco ti cararagmo, nakitac dagiti luluam: adtoy, nayonac dagiti al-aldawmo iti sangapulo ket lima a tawen.

⁶ Ket ispalencanto ken daytoy nga ili iti ima ti ari ti Asiria, ken salacnibacto daytoy nga ili.

⁷ Ket daytoyto ti pagilasinan kenca nga aggapu ken ni Jehova, a ni Jehova aramidennanto daytoy a banag nga insaona:

⁸ Adtoy, aramidecto ti aniniwan cadagiti gerger, a bimmaba iti cuadrante ni Acaz iti init, nga agsanud iti sangapulo a gerger. Iti casta ti init nagsanud iti sangapulo a gerger iti cuadrante a bimmabaanna.

⁹ Ti surat ni Ezekias nga ari ti Juda, idi nagsakit, ken naimbagan iti sakitna.

¹⁰ Kinunac, Iti matoon dagiti al-aldawco innacto cadagiti ruangan ni Tanem. Naiccat caniac dagiti tidda dagiti tawenco.

¹¹ Kinunac, Diacto makita ni Jehova, ni Jehova met laeng iti daga dagiti nabiag: diac macakitan iti tao agraman cadagiti agnaed iti lubong.

¹² Ti pagtaengac mayalis, ken mayadayu caniac a cas maysa a tolda ti agpaspastor: linucotco ti biagco a cas la maysa nga agabel; lapsutennacto iti pagablan: manipud iti aldaw agingga iti rabii paggibusennac.

¹³ Nagtalnaac agingga iti bigat; a cas maysa a leon, casta ti panangbungtolna cadagiti amin a tultulangco: manipud iti aldaw agingga iti rabii met laeng pagturpusennac.

¹⁴ Cas la maysa a salsallapingaw, wenno tipor, casta ti panagit-itco; nagunonnoyac a cas la calapati; dagiti matac cumapuyda a gapu iti panangitangad: O Jehova, maparigatac, sica cadi ti talgedco.

¹⁵ Ania ti saoecto? isu nagsao caniac, ken isu met laeng inaramidna: magnaacto a sipapacumbaba iti amin dagiti tawenco gapu iti pait toy cararuac.

¹⁶ O Apo, gapu cadagitoy a banbanag dagiti tattao agbiagda; ket idiay amin ti yan ti biag ti espirituc: gapuna a paimbagennac, ken pagbiagennac.

¹⁷ Adtoy, maipaay iti talnac naaddaanac iti dackel a kinapait: ngem sica inayatmo toy cararuac insalacanmo iti dariwangwang ti panagrupsa; ta sica imbacalmo amin a basbasolco iti licudam.

¹⁸ Ta ni Tanem dinaca mabalin a dayawen, ni patay dinaca rambacan: dagiti umulog iti dariwangwang dida mabalin nga inanamaen ti kinapudnom.

¹⁹ Ti sibibiag, ti sibibiag, dayawennacanto, cas aramidec ita nga aldaw: ti ama ipacaammonanto ti kinapudno cadagiti annac.

²⁰ Ni Jehova madadaan a mangisalacan caniac: gapuna a cantaentayto dagiti cancantac agraman gamgamigam a kinuerdasan iti amin nga aldaw dagiti biagtayo iti balay ni Jehova.

²¹ Ket ni Isaias kinunana idi, Mangalada coma ti sangcatipkel nga higos, ket itapalda iti bosalina, ket umimbagto.

²² Ni Ezekias kinunana met idi, Ania ti pagilasinan a siac umuliacto iti balay ni Jehova?