Isaias 37 - Ti Biblia (1973)

Ni Ezekias paayabanna ni Isaias. Ti ipacdaar ni Sennakerib ken Ezekias. Ti cararag ni Ezekias. Ti macaliwliwa a sungbat ni Jehova. Ni Sennakerib mariribuc ken mapapatay.

¹ Ket naaramid, idi nga isu ti nangngeg ni ari Ezekias, a pinigisna dagiti pagan-anayna, ken nagcumut iti lupot a nakersang, ket simrec iti balay ni Jehova.

² Ket imbaonna ken ni Isaias a mammadto nga anac ni Amoz, da Eliakim a mayordomo, ken ni Sebna nga escriba, ken dagiti panglacayen dagiti papadi, a sicucumutda iti lupot a nakersang.

³ Ket kinunada kencuana, Castoy ti cuna ni Ezekias, Daytoy nga aldaw isu ti aldaw ti rigat, ken ti babalaw, ken ti umsi; ta dagiti annac dumtengdan iti pannacayanac, ket awan ti pigsa nga agipasngay.

⁴ Nalabit a ni Jehova a Diosmo denggennanto dagiti sasao ni Rabsaces, nga imbaon ti ari ti Asiria nga apona a mangcarit iti Dios a sibibiag, ket tubngarennanto dagiti sasao a nangngeg ni Jehova a Diosmo: gapuna nga ipangatom ti cararagmo a maipaay iti tidda a nabati.

⁵ Iti casta immay dagiti ad-adipen ni ari Ezekias ken ni Isaias.

⁶ Ket ni Isaias kinunana cadacuada, Castoyto ti cunaenyo ken apoyo, Castoy ti cuna ni Jehova, Dica agbuteng cadagiti sasao a nangngegmo, isuda a dagiti ad-adipen ti ari ti Asiria pinangtabbawda caniac.

⁷ Adtoy, icabilconto kencuana ti maysa nga espiritu, ket macangngegto cadagiti damdamag, ket agsublinto iti dagana met laeng: ket pagpasagecto iti campilan idiay dagana met laeng.

⁸ Iti casta ni Rabsaces nagsubli, ken nasaracanna ti ari ti Asiria a manggubgubat iti Libna; ta nangngegna idin nga isu pimmanaw idiay Lakis.

⁹ Ken nangngegna a masasao iti maipapan ken ni Tirhakah nga ari ti Etiopia, Isu rimmuar a makibacal kenca. Ket idi nga isu nangngegna, nangibaon cadagiti babaonen ken ni Ezekias, a kinunana,

¹⁰ Castoyto ti saoenyo ken ni Ezekias nga ari ti Juda, a cunaenyo, Dinaca coma allilawen ti Diosmo isu a pagtalcam, nga agcuna, Ti Jerusalem dinto maited iti ima ti ari ti Asiria.

¹¹ Adtoy, nangngegmo no ania ti inaramid dagiti ar-ari ti Asiria cadagiti isu-amin a dagdaga, iti panangdadael cadacuada a tinalipupus: ket sica maispalcanto aya?

¹² Dagiti didios dagiti nasnacion inispalda aya ida, dagidiay a dinadael idi dagiti ammac, ti Gozan, ken ti Haran, ken ti Rezef, ken dagiti annac ti Eden nga agyanda idi idiay Thelazar?

¹³ Sadino ti yan ti ari ti Amath, ken ti ari ti Arpad, ken ti ari ti ili ti Sefarvaim, ti Hena ken ti Iva?

¹⁴ Ket ni Ezekias inawatna di surat iti ima dagiti nabaon, ket binasana; ket ni Ezekias immuli idi balay ni Jehova, ket isu ti inyucradna iti sango ni Jehova.

¹⁵ Ket ni Ezekias nagcararag ken ni Jehova, a kinunana,

¹⁶ O Jehova dagiti buybuyot, Dios ti Israel, nga agtugaw iti ngatoen dagiti querubin, sica ti Dios, sicsica la a maymaysa, cadagiti isu-amin a pagarian iti lubong; sica inaramidmo ti langit ken daga.

¹⁷ Yallingagmo ta lapayagmo, O Jehova, ket denggem; luctam dagiti matam, O Jehova, ket kitaem; ken denggem amin dagiti sao ni Sennakerib, isu a nagbaon a mangcarit iti Dios a sibibiag.

¹⁸ Kinapudnona, Jehova, a dagiti ar-ari ti Asiria pinaglangalangda dagiti amin a nasnacion ken ti dagada,

¹⁹ Ken impurruacda dagiti didiosda iti apuy; ta isuda saanda a dios, no di ket aramid dagiti im-ima dagiti tattao, cayo ken bato; gapuna a dinadaelda ida.

²⁰ Ita ngarud, O Jehova a Diosmi, ispalennacami iti imana, tapno isu-amin dagiti pagpagarian iti lubong ammoenda coma a sica ni Jehova, sicsica laeng.

²¹ Idin ni Isaias nga anac ni Amoz nangibaon ken ni Ezekias, a kinunana, Castoy ti cuna ni Jehova a Dios ti Israel, Idinto a nagcararagca caniac a maibusor ken ni Sennakerib nga ari ti Asiria,

²² Daytoy ti sao a ni Jehova insaona a maipapan kencuana: Ti virgen nga anac a babai ti Sion, linaisnaca ken kinatawaannaca a rinabngis; ti anac a babai ti Jerusalem inngilangilna ti olona kenca.

²³ Siasino ti kinaritmo ken tinabbaawam? ket asino ti pacaibusoran ti natbag a timmecmo, ken nangitangadam cadagita matam iti nangato? maibusor met laeng iti Santo ti Israel.

²⁴ Iti pannacaaramat dagiti ad-adipenmo kinaritmo ti Apo, ket kinunam, Iti kinaadu dagiti lugluganco simmang-atac iti tapaw dagiti banbantay, cadagiti caunegan ti Libano; ket pucanecto dagiti natayag a cantingenna, ken dagiti casayaatan a parwana; ket sumrecacto iti cangatoan a tapawna, ti bakir ti nabunga a talonna;

²⁵ Nagcaliac ken imminumac iti danum, ket iti dapan dagiti sacsacac pagmagaecto dagiti isu-amin a carcarayan ti Egipto.

²⁶ Dica nangngeg aya no casano ti inaramidco idi nabayagen, ken ti binalabalac cadagidi ugma? ita isu ti tinungpalco, tapno cucuam coma a pangrebba cadagiti nasarikedkedan nga il-ili iti ginabgabsuon dagiti narnarba.

²⁷ Iti casta dagiti nagnaed cadacuada bassit ti pannacabalinda, nagcullayawda ken nariribucda, cacasda la idi iti root idiay away, ken cacasda la iti nalangto a nateng, cas iti root cadagiti toctoc ti balay, ken cas maysa a bangcag a namulaan nga aglaylay casacbayan ti panagbungana.

²⁸ Ngem ammoc ti panagtugawmo, ken ti panagruarmo ken ti panagserrecmo, ken ti panagpungtotmo a maibusor caniac.

²⁹ Gapu iti panagpungtotmo a maibusor caniac, ken agsipud ta ti kinacuspagmo immuli cadagiti lapayagco, gapuna nga icabilconto ti callawitco ita agongmo, ken ti frenoc cadagiti bibigmo, ket pagsubliencanto iti dalan nga immayam.

³⁰ Ket daytoyto ti pagilasinan kenca: mangancayto itoy a tawen iti daydiay a tumubo lat ta, ket iti maicadua a tawen iti daydiay sagibona met laeng; ket iti maicatlo a tawen agmulacayo, ket aganicayo, ket agmulacayo cadagiti cauvasan, ket mangancayo iti bungana.

³¹ Ket ti matda a mailiclic iti balay ni Juda agramutto manen iti agpauneg, ket agbunganto iti agpangato.

³² Ta rumuarto ti maysa a tidda iti Jerusalem, ken rumuarda iti bantay Sion dagiti macalisinto. Ti regta ni Jehova dagiti buybuyot aramidennanto daytoy.

³³ Gapuna a castoy ti cuna ni Jehova a maipapan iti ari ti Asiria, Isu dinto umay itoy nga ili, ket dinto met mangibiat iti maysa a pana sadiay, ket dinto met umay iti sangona a sicacalasag, ket dinto met mangaramid iti pagsalingdan a maibusor kencuana.

³⁴ Iti dalan nga immayanna, isu ti pagsubliannanto met laeng, ket dinto dumteng iti daytoy nga ili, cuna ni Jehova.

³⁵ Ta siac ispalecto daytoy nga ili tapno isu isalacanco, a gapu caniac met laeng, ken gapu ken ni David nga adipenco.

³⁶ Ket ti angel ni Jehova rimmuar, ket kinabilna iti pacarso dagiti Asirios ti sangagasut walopulo ket lima a ribu; ket idi bimmangon dagiti tattao iti agsapa, adtoy, dagitoy bangcayda amin.

³⁷ Iti casta ni Sennakerib nga ari ti Asiria pimmanaw ket napan ken nagsubli, ket nagtaeng idiay Ninive.

³⁸ Ket naaramid, idi nga isu agcarcararag iti balay ni Nisroc a diosna, a da Adremelec ken Sarezer nga annacna a lallaki isu ti kinabilda iti campilan; ket nagtalawda agingga iti daga ti Ararat. Ket nagari a simmucat kencuana ni Esarhadon nga anacna.