Isaias 35 - Ti Biblia (1973)

Ti masacbayan a ragsac ti Sion.

¹ Ti let-ang ken ti namaga a daga naragsacdanto; ket ti tay-ac a lang-alang agragrag-onto, ken agsabongto a cas iti rosa.

² Isu agsabongto iti nawadwad, ken agrag-onto a buyogan pay ti ragsac ken cancanta; ti dayag ti Libano maitedto kencuana, ti kinadeggang ti Carmelo ken Saron: makitadanto ti dayag ni Jehova, ti kinadaeg ti Diostayo.

³ Patibkerenyo dagiti napacsuyan nga im-ima, ket pakirdenyo dagiti nacapuy a tumtumeng.

⁴ Cunaenyo cadagiti managbutbuteng a puso, Bumilegcayo, dicayo agbuteng: adtoy, ti Diosyo umayto iti panangibales, iti panangsupapac ti Dios; isu umayto ken isalacannacayo.

⁵ Iti casta maluctanton dagiti mata ti bulsec, ken dagiti lapayag ti tuleng maluctandanto.

⁶ Iti casta aglagtonto ti pilay a cas maysa nga ugsa, ken ti dila ti umel agcantanto; ta iti let-ang pumsuacto dagiti dandanum, ken barbaresbes iti tay-ac a langalang.

⁷ Ket ti sumilsilap a darat agbalinto a libtong, ken ti mawaw a daga agbalinto nga ub-ubbog ti danum: iti pagyanan dagiti chacal, isu a pagiddaanda, rootto agramang runruno ken badobadoc.

⁸ Ket addanto idiay ti maysa a calsada, ken maysa a dalan, ket managanto Iti dalan ti kinasanto; ti saan a nadalus saanto a magna kencuana; no di ket isu maipaayto iti nasubbot; dagiti agbariwas a tattao, wen tattao a maag, didanto mayawawan idiay.

⁹ Awan ti leon nga agyanto idiay, awan met ti narungsot nga animal a sumang-at idiay: saandanto a masaracan idiay; no di ket ti nasubbot magnanto idiay:

¹⁰ Ket dagiti sinubbot ni Jehova agsublidanto, ken umayda idiay Sion a mabuyogan iti cancanta; ket agnanayon a rag-o ti agtaengto iti rabaw dagiti oloda: magunoddanto ti ragsac ken rag-o, ket ti ladingit ken sasainnec agtalawdanto.