Isaias 34 - Ti Biblia (1973)

Ti pungtot ti Dios a maibusor cadagiti nasnacion nangnangrona iti Edom.

¹ Umasidegcayo a dumngeg dacayo a nasnacion; ken timudenyo, dacayo nga il-ili dumngeg coma ti daga, ken ti linas-udna, ti lubong, ken amin a tumaud kencuana.

² Ta ni Jehova adda pungtotna cadagiti amin a nasnacion, ken rungsotna iti amin a buyotda: isu dinadaelna ida a tinalipupus, inyawatna ida iti pagpapatayan.

³ Dagiti minatayda maibellengdanto met, ket ti buyoc dagiti bangcayda umulinto; ken dagiti banbantay marunawdanto iti darada.

⁴ Ket amin a buyot ti langit mawarawaranto, ken dagiti langlangit malucotlucotdanto a cas maysa a libro a linucot; ket amin a buyotda malaylaydanto, a cas iti bulong a malaylay a naisina iti uvas, ken cas maysa a bulong nga aglaylay nga aggapu iti cayo ti higos.

⁵ Ta ti campilanco imminum a napnec sadi langit: adtoy, umulogto iti rabaw ti Edom, ken iti rabaw ti umili ti panangilunodco, tapno maocom.

⁶ Ti campilan ni Jehova napno iti dara, isu napalucmeg iti taba, iti dara dagiti cordero ken calding, iti taba dagiti beckel dagiti carnero a lallaki; ta ni Jehova adda maysa a datonna idiay Bosra, ken maysa a dackel a panagpapatay iti daga ti Edom.

⁷ Ket dagiti vacvaca nga atap makipagsalogdanto cadacuada, ken dagiti urbon a calakian agraman cadagiti toro: ket ti dagada mabartecto iti dara, ken ti tapocda mapalucmegto iti taba.

⁸ Ta ni Jehova addaan maysa nga aldaw a panangbales, maysa a tawen ti gunguna a maipaay iti panggep ti Sion.

⁹ Ket dagiti carcarayan ti Edom agbalindanto nga alquitran, ken ti tapocna azufre, ket ti dagana agbalinto nga agdardarang nga alquitran.

¹⁰ Isu dinto maiddep iti rabii wenno aldaw; ti asucna agpangatonto nga agnanayon; manipud iti caputotan agingga iti caputotan aglangalangto; awanto ti lumasat kencuana iti agnanayonen.

¹¹ Ngem ti pelicano ken ti animal a bassit a natirad ti dutdutna isu tagicuaendanto; ket ti puec ken ti wac agtaengdanto idiay; ket yunnatnanto iti rabawna ti paltic ti pannacariru, ken ti tinnag ti kinaongaong.

¹² Ayabandanto dagiti natacnengna iti pagarian, ngem awanto ti agyan idiay; ket amin a panguloenna awandanto.

¹³ Ket dagiti calunay tumubodanto cadagiti palaciona, camcamiring ken cascasumba cadagiti sarikedkedna; ket isunto ti maysa a pagyanan dagiti chacal; maysa a paraangan a maipaay cadagiti avestruz.

¹⁴ Ket dagiti atap nga an-animal iti let-ang sumaracdanto cadagiti lobo, ken ti atap a calding awagannanto ti caduana; wen, ti pagkigtotan iti rabii agsaadto sadiay, ket isu masaracannanto ti maysa a disso a paginanaan nga agpaay kencuana.

¹⁵ Idiay ti pagaramidanto ti uleg a nasiglat iti umocna, ken pagitloganna, ken pagucopanna, ken pagurnonganna iti siroc ti linongna, wen, idiay maurnongdanto dagiti sawi, tunggal maysa agraman caduana.

¹⁶ Sapulenyo nga aggapu iti libro ni Jehova, ket basaenyo: cadagitoy awanto ti agcurang, awanto ti mangsapul iti caduana; ta isu ti imbilin ti ngiwatco, ken ti Espirituna inurnongna ida.

¹⁷ Ket nakiginnasanggasat gapu cadacuada, ken iti imana isu ti pinangbingayna cadacuada a bininnatog isu ti tagicuaendanto nga agnanayon; manipud caputotan agingga iti caputotan agtaengdanto kencuana.