Isaias 33 - Ti Biblia (1973)

Ni Jehova ti mangsaranay iti pacarigatan. Ti kinatalged dagiti nalinteg. Ti naparabur a panagari ni Jehova.

¹ Asica pay a mangdadael, ket sica saanca a nadadael; ken agaramidca a sililiput, ket saandaca a nagaramidan a sililiput! Intono maminggaca a mangdadael, madadaelcanto, ket intono agpatinggaca nga agaramid a sililiput, pagaramidandacanto a sililiput.

² O Jehova, mangngaasica coma cadacami; agpannuraycami kenca: sica coma ti pannacatackiagmi iti binigambigat, salacanmi met iti tiempo ti pacarigatan.

³ Dagiti umili nagtalawda iti daranudor ti arimbangaw; iti itatacdermo met laeng nawarawara dagiti nasnacion.

⁴ Ket dagiti samsamyo maurnongdanto a cas ti panagguornong ti arabas: cas ti panaglagto dagiti lucton ti panaglagtonto dagiti tattao kencuana.

⁵ Ni Jehova maitanoc; ta agyan sadi ngato; isu pinunnona ti Sion iti kinajusticia ken kinalinteg.

⁶ Ket addanto kinabileg cadagiti tiempom, kinawadwad ti pannacaisalacan, sirib ken pannacaammo: ti panagbuteng ken ni Jehova isu ti gamengmo.

⁷ Adtoy, dagiti maingelda agickisda iti ruar; dagiti embajador ti cappia agsangitda a sipapait.

⁸ Dagiti calcalsada madadaelda, ti agbariw-as a tao agsardeng, ti cabusor rinacracna ti tulag, inuyawna dagiti il-ili, dina patgen ti tao.

⁹ Ti daga agpanes ken aglupoy; ti Libano mariribuc ket magango; ti Saran isu ti cas la maysa a let-ang; ket ti Basan ken Carmelo regregenda dagiti bulongda.

¹⁰ Tumacderacto ita, cuna ni Jehova; itag-ayconto ita ti bagic met laeng; maitan-ocacto ita.

¹¹ Aginawcayto iti taep, yanacyonto ti punget ti garami: ti yangesyo isu ti maysa nga apuy a mangalun-un cadacayo.

¹² Ket dagiti inilin-ili casdanto la cadagiti pagpuuran ti apug cascasda la sisiit a pinucan ken pinuuran iti apuy.

¹³ Denggenyo, dacayo nga adda iti adayu, ti inaramidco; ket dacayo nga asideg, bigbigenyo ti pigsac.

¹⁴ Dagiti managbasol sadi Sion mabutengda; dagiti awan diosda agpigergerda: Asino cadatayo ti macabalin a makipagtaeng iti mangalun-un nga apuy? asino cadatayo ti macabalin a makipagtaeng iti awan inggana a pannacapupuur?

¹⁵ Daydiay magna a sililinteg, ken ti agsao a sipupudno; ti mangumsi iti sapul dagiti managparigat, ti mangiwagteng cadagiti im-imana ta dina cayat nga awaten ti pannocsoc, ti mangapput cadagiti lapayagna tapno di macangngeg iti dara, ken mangikidem cadagiti matana tapno saan a macakita iti dakes:

¹⁶ Isu agtaengto sadi ngato; dagiti bacud a binato isudanto ti pagcamanganna, ti tinapay maitedto kencuana; dagiti danumna manamnama.

¹⁷ Dagiti matam makitadanto ti ari iti kinasayaatna: mabuyadanto ti maysa a daga a dumanon iti adayu.

¹⁸ Ti pusom agpanunotto iti naca-amamac: Sadino ti yan daydiay nangbilang, sadino ti yan daydiay nangtimbeng iti buis? sadino ti yan daydiay nangbilang cadagiti tortorre?

¹⁹ Dicanto makita ti narungsot nga umili, umili a nauneg ti pagsasaona a dica maawatan, maysa a pagsasao a gangannaet a dica maawatan.

²⁰ Kitaem ti Sion, ti ili ti kinadaegtayo: dagiti matam makitadanto ti Jerusalem maysa a natalingenngen a pagyanan, maysa a tolda a saanto a mayalis, dagiti pasocna uray caano saandanto a maparuten, ket di met mapugsot dagiti lubidna.

²¹ No di ket ni Jehova makipagyan cadatayo sadiay iti kinadayagna, maysa a disso dagiti nalawa a carcarayan ken ay-ayus, nga awanto ti dumanon a bilog a sigagaud idiay, ket awanto met ti nalibnos a barco a lumabas sadiay.

²² Ta ni Jehova isu ti ocomtayo, ni Jehova isu ti mangmangted iti linteg cadatayo, ni Jehova isu ti aritayo; isalacannatayo.

²³ Dagiti tali nga arciam nalucayda; saanda a napalagda iti puon dagiti paloda, dida nayucrad ti layag: iti casta ti tinucmaan a dackel a samsam nabingbingay; ti pilay nangala iti sinamsam.

²⁴ Ket ti agtaeng dinanto cunaen, Masakitac: dagiti umili nga agtaeng sadiay mapacawanto ti kinadangkesda.