Isaias 30 - Ti Biblia (1973)

Ti kinaubbaw ti panagtalec iti Egipto. Ti kinanam-ay umayto laeng gapu iti naanus a panaguray iti parabur ni Jehova. Ti panagballigi ni Jehova iti Asiria.

¹ Asida pay dagiti annac a nasukir, cuna ni Jehova, nga umawat iti patigmaan, ngem saan nga aggapu caniac; ken ti mangaramid iti maysa a timpuyog, ngem saan a ti agtaud iti Espirituc, tapno pagnanayonenda ti basol ken basol;

² Nga agrubbuatda a sumalog idiay Egipto, ket dida nagsaludsod iti ngiwatco; tapno bumilegda nga isuda met laeng iti pigsa ni Faraon, ken agcamangda iti salinong ti Egipto!

³ Gapuna a ti pigsa ni Faraon isunto ti pacaibainanyo, ken ti panagcamang iti salinong ti Egipto isunto ti riribucyo.

⁴ Ta dagiti panguloenda addada sadi Zoan, ken dagiti embajadorda dimmanonda sadi Hanes.

⁵ Mababainandanto amin gapu iti maysa nga ili a dina mabalin a gungunaan ida, ta saan a macatulong ken di-met macagunguna no di ket pacabainan ken pacaumsian.

⁶ Ti sagabaen dagiti an-animal ti Abagatan. Iti daga ti riribuc ken ladingit, a pagtaudan ti leon a cabaian ken leon a lalaki, ti carasaen ken ti narungsot nga uleg nga agtayab, ipaawitda dagiti kinabacnangda iti abaga dagiti urbon nga asno, ken dagiti gamengda iti bucot dagiti camello, nga agpaay iti maysa nga ili a saanto a manggunguna cadacuada.

⁷ Ta ti Egipto tumulong nga awan ti capapaayanna, ken barengbareng: gapuna nga isu ti ninaganac iti Rahab nga agtugaw nga agtalna.

⁸ Inca ngarud ita, isu ti isuratmo iti sangoananda iti maysa a tapi, ket ilanadmo iti maysa a libro, tapno isu ti maipaay coma iti tiempo a sumungad, iti agnanayon nga awan inggana.

⁹ Ta isu nasukir nga umili, annac a managulbod, annac a dida cayat a denggen ti linteg ni Jehova;

¹⁰ Isuda nga agcuna cadagiti macakita iti masacbayan, Dicayo cumita; ken cadagiti mammadto, Dicayo mangipadto cadacami cadagiti nalinteg a banbanag, mangisawangcayo cadacami cadagiti naalumamay a banbanag, mangipadtocayo cadagiti al-allilaw,

¹¹ Baybay-anyo ti dalan, sinaanyo ti dana, pasardengenyo ti caadda ti Santo ti Israel iti sangoananmi.

¹² Gapuna a castoy ti cuna ti Santo ti Israel, Agsipud ta uyawenyo daytoy a sao, ken agtaleccayo iti panangparigat, ken kinaulpit, ken isuda ti nagcammatalcanyo;

¹³ Gapuna a daytoy a kinadangkes isunto cadacayo ti maysa a gutbaw a sidadaan a margaay, agtantanaw iti nangato a bacud, a ti pannacarbana umay a kellaat iti apagdaricmat.

¹⁴ Ket isu maburacto a cas pannacaburac ti maysa a caramba ti agdamdamili, nga isu ti burakenna nga awan ti mailiclic; iti casta nga awan ti masaracanto cadagiti narumec a maysa a tipping isu a pangala iti apuy iti dalican, wenno pangtaco iti danum iti tangke.

¹⁵ Ta castoy ti cuna ni Apo Jehova, ti Santo ti Israel, Iti panagsubli ken panaginana maisalacancayto; iti kinatalna ken iti panagtalec isunto ti pigsayo. Ket dicayo kinayat:

¹⁶ Ngem kinunayo, Saan, ta agtalawcaminto a sicacabayo; ngarud agtalawcayonto: ken, Agsacaycamto iti nasiglat; gapuna a dagiti mangcamat cadacayo nasiglatdanto.

¹⁷ Maysa a ribu agtalawto iti pananglayat ti maysa: iti pananglayat ti lima agtalawcayonto: agingga iti mabaticayo a cas maysa a farola iti tuctoc ti bantay, ken cas maysa a wagayway iti rabaw ti turod.

¹⁸ Gapuna nga agurayto ni Jehova, tapno macaasiannacayo; ket iti casta maitan-octo; tapno isu maaddaan iti panangngaasi cadacayo: ta ni Jehova isu ti Dios ti kinajusticia; nagasat dagiti isu-amin nga agpannuray kencuana.

¹⁹ Ta dagiti umili agtaengdanto idiay Sion sadi Jerusalem; dicanto agsangiten; dinto bumurong a mangngaasi kenca gapu iti timec ti panangawagmo; intono mangngegna, sungbatannacanto.

²⁰ Ket uray no ited ti Apo cadacayo ti tinapay ti pammarigat ken ti danum ti pammaldaang, nupay casta saandanto a mailemmengen dagiti manursuro kenca, no di ket dagiti matam makitadanto dagiti mannursuro kenca.

²¹ Ket dagiti lapayagmo macangngegdanto iti maysa a sao iti licudam, a cunana, Isu daytoy ti dalan, magnacayo kencuana; intono agbawingcayo iti macanawan, ken intono agbawingcayo iti macatigid.

²² Ket rugitanyonto ti calupcup a pirac dagiti kinitikitan a ladladawan, ken ti naidigus a balitoc cadagiti sinocog a ladladawan: ibellengmonto ida a cas banag a narugit; cunaemto, Agtalawcayo ditoy.

²³ Ket isu itednanto ti tudo a maipaay iti bin-im nga imulamto iti daga; ket ti tinapay agtaud iti bunga ti daga, ket isunto ti nalucmeg ken nawadwad. Iti dayta nga aldaw agarabto dagiti animalmo cadagiti nalawa a pagaraban;

²⁴ Casta met dagiti vacvaca a lallaki ken dagiti urbon nga as-asno nga agarado iti daga, mangandanto iti nananam a taraon a nadalusan babaen ti soplad ken caraid.

²⁵ Ket addanto iti rabaw ti amin a bantay a natayag, ken iti rabaw ti amin a turod a nangato, dagiti waig ken baresbes ti danum, iti aldaw ti dackel a panagpapatay, intono dagiti torre marsuodda.

²⁶ Maysa pay ti lawag ti bulan caslanto la lawag ti init, ket ti lawag ti init maminpitonto, a cas iti lawag dagiti pito nga aldaw, iti aldaw a panangpatapat ni Jehova iti dunor ti ilina, ken ti panangpaimbagna cadagiti birri ti sugatda.

²⁷ Adtoy, ti nagan ni Jehova sumungad nga aggapu iti adayu, nga agdardarang iti pungtotna, ken iti napuscol nga agpangato nga asuc: dagiti bibigna napnoda iti unget, ken ti dilana isu ti cas mangrunaw nga apuy;

²⁸ Ken ti angesna isu ti cas maysa a layus, a danonenna ti tengnged, a manggasagas cadagiti nasnacion iti gasagasan ti pannacarba: ket maysa a freno a mangpaallilaw addanto iti ngiwat dagiti tattao.

²⁹ Maaddaancayto iti maysa a canta a cas iti rabii no ngilinen ti maysa a nasantoan a rambac; ken ragsac ti puso, cas no ti maysa mapan agraman flauta iti bantay ni Jehova, iti Bato ti Israel.

³⁰ Ket ni Jehova ipangngegnanto ti nagloriaan a timecna, ket ipakitananto ti kimat iti baba ti tackiagna, iti kinarungsot ti pungtotna, ken ti darang ti maysa a mangrunaw nga apuy, iti maysa a daranudor ken bagio, ken uraro.

³¹ Ta iti panagtimec ni Jehova agcullayawto ti Asirio; isu cabilennanto iti pang-orna.

³² Ket iti tunggal panangcabil ti sarucod a natudingan, a ni Jehova yablatnanto kencuana, mapacuyuganto iti aweng dagiti pandereta, ken ararpa; ket cadagiti gubgubat ti pananglayat ti tackiagna makidangadangto cadacuada.

³³ Ta maysa a pagpuuran naisagana pay laeng idi; wen, ta ti ari naisaganan; isu inaramidna a nauneg ken dackel; ti dalusonna isu ti apuy ken adu a cayo; ti sang-aw ni Jehova, cas maysa nga ayus ti azufre, isu ti pasgedanna.