Isaias 29 - Ti Biblia (1973)

Ariel ken dagiti cabusorna. Pannacatubngar ti kinabulsec ken panaginsisingpet. Umadani ti pannacapabaro ti Israel.

¹ O Ariel, Ariel, nga ili a nagpacarsoan idi ni David! pagnanayonenyo ti tawen ken tawen; dagiti fifiesta umayda nga agsasaganad:

² Iti casta parigatecto ti Ariel, ket addanto panagdung-aw ken panagasug; ket cascasdi nga Ariel pay laeng caniac.

³ Ken agpacarsoacto iti aglicmut a bumusor kenca, ken lacubencanto cadagiti naisaad a buybuyot, ken mangipatacderacto iti pagsalindegan a maibusor kenca.

⁴ Ket sica maipababacanto, ken agsaocanto manipud iti daga, ket ti saom tumpuarto iti tapoc; ket ti timecmo caslanto la timec ti baglan tumpuar iti daga, ket ti saom agarasaasto a sumngaw iti tapoc.

⁵ Ngem dagiti umariwecwec a cabusormo agbalindanto a cas la namayecmec a tapoc, ken ti kinaadu dagiti nacaamamac casda la taep a pumanaw: wen, isu ti mapasamacto a kellaat iti apagdaricmat.

⁶ Isu sarungcaranto ni Jehova dagiti buybuyot a buyogan dagiti gurrood, ken gingined, ken dackel a daranudor, cadagiti alawig ken bagio, ken ti darang ti mangrunaw nga apuy.

⁷ Ken ti kinaadu dagiti amin a nasnacion a manggubat iti Ariel, isu-amin a manggubat kencuana ken iti sarikedkedna, ken dayta mamarigat kencuana, isudanto ti maysa a cas la tagtagainep, maysa a parparmata iti rabii.

⁸ Ket caslanto la iti panagtagtagainep ti tao a mabisin, ket adtoy, isu mangan; ngem mariing, ket, ti cararuana ongaong: wenno cas la iti panagtagtagainep ti mawaw a tao, ket, adtoy, isu uminum, ngem agriing, ket, adtoy, isu mapacsuyan pay laeng, ket ti cararuana mawaw: castadanto dagiti umariwecwec cadagiti amin a nasnacion, a manggubat a maibusor iti bantay Sion.

⁹ Agtactaccayo ken agsiddaawcayo; agragsaccayo, ket mabulseccayo: nabartecda, ngem saan nga iti arac; agibar-ibarda, ngem saan nga iti naingel nga inumen.

¹⁰ Ta ni Jehova imbucbocna cadacayo ti espiritu ti nargaan a turog, ken pinagkidemna dagiti matmatayo, dagiti mammadto; ken dagiti panguloenyo, dagiti macakita iti masacbayan, inabbonganna.

¹¹ Ken amin a sirmata nagbalin cadacayo a cas cadagiti sasao ti maysa a libro a naselloan, nga inyawat dagiti tattao iti maysa a nasursuroan, a cunada, Dawatec kenca, basaem man daytoy; ket isu cunana, Diac mabalin, ta naselloan:

¹² Ket ti libro nayawat iti daydiay saan a nasursuroan, a cunada, Dawatec kenca, basaem man daytoy; ket isu cunana, Saanac a nasursuroan.

¹³ Ket ti Apo kinunana, Agsipud ta daytoy nga umili umasidegda caniac ket iti ngiwatda ken cadagiti bibigda dayawendac, ngem dagiti pusoda inyadayuda caniac, ken ti panagbutengda caniac isu timaysa a bilin dagiti tattao a naisuro cadacuada;

¹⁴ Gapuna, adtoy, baliwacto nga aramiden ti maysa a nacascasdaaw nga aramid iti tengnga daytoy nga ili, maysa met laeng a nacascasdaaw nga aramid ken datdatlag; ket ti kinasirib dagiti tattaoda a mamasirib mapucawto, ken ti pannacaawat dagiti tattaoda a manakem mailemmengto.

¹⁵ Asi pay dagiti mangilemmeng cadagiti patigmaanda iti imatang ni Jehova, ket dagiti ar-aramidda addada iti sipnget, ken cunada, Asino ti macakita cadacami? ken asino ti macaammo cadacami?

¹⁶ Dacayo balinsuekenyo dagiti banbanag! Mapatganto aya ti agdamdamili a cas iti pila; a ti banag nga inaramidna cunaenna coma iti daydiay nangaramid kencuana, Isu saannac nga inaramid; wenno ti banag a binukel cunaenna iti nangbukel kencuana, Isu awan ti pannacaawatna?

¹⁷ Saan aya a bassit pay a canito, ket ti Libano agbalinto a maysa a nabunga a talon, ken ti nabunga a talon mapatganto a cas bakir?

¹⁸ Ket iti dayta nga aldaw ti tuleng mangngegnanto dagiti sasao ti libro, ken dagiti mata ti bulsec macakitadanto manipud itikinalidem ken kinasipnget.

¹⁹ Dagiti met naemma dumackelto ti rag-oda ken ni Jehova, ket dagiti napanglaw iti tengnga dagiti tattao agragsacdanto iti Santo ti Israel.

²⁰ Ta ti nacaamamac a tao mapucaw, ken ti managuyaw agsardeng, ken amin dagiti nasalucag a maipaay iti kinadangkes makeltaydan;

²¹ Dagiti mangpabasol iti maysa a tao iti maysa laeng a sao, ken mangipacat iti silo daydiay a mangtubngar idiay ruangan, ken killoenna ti nalinteg iti maysa a banag nga ubbaw.

²² Gapuna a castoy ti cuna ni Jehova, a nanubbot ken Abraham, a maipapan iti balay ni Jacob: Ni Jacob saanto itan a maibabain, ti rupana ita saanto met a bumsag.

²³ Ngem intono makitana dagiti annacna, nga aramid dagiti im-imac, iti tengngana, daydayawendanto ti naganco; wen, daydayawendanto ti Santo ni Jacob, ken agintecdanto iti panagbuteng iti Dios ti Israel.

²⁴ Dagidiay a maallilaw iti espiritu macaawatdanto, ken dagiti agtanabutob awatendanto ti sursuro.