Isaias 28 - Ti Biblia (1973)

Idarumna ti kinamammartec ti Efraim ken Juda. Ni Jehova ibilinna ti pannacarba ti Jerusalem. Ti pangngarig ti agtaltalon.

¹ Asi pay ti balangat ti kinatangsit dagiti managbarbartec ti Efraim, ken ti aglaylay a sabong ti nadayag a kinaimnasna, nga adda iti oloanan ti nataba a tanap dagiti adda a maitublac iti arac!

² Adtoy, ti Apo addaan maysa a mannacabalin ken napigsa; cas maysa a bagio ti uraro, maysa a bagio a mangracrac, cas iti layus dagiti dandanum a napegges nga aglippias, castanto ti panangigarangugongna iti daga babaen iti imana.

³ Ti balangat ti kinatangsit dagiti agbarbartec ti Efraim mapayatpayatto iti baba ti saca:

⁴ Ken ti agusaw a sabong ti nadaeg a kinaimnasna, nga adda iti oloanan ti nataba a tanap, isunto ti cas la iti bunga ti higos a maluom nga umuna iti sacbay ti calgaw; isu nga intono ti macakita kencuana mingminganna, iti bayat ti panangig-iggemna pay laeng isu canenna.

⁵ Iti dayta nga aldaw ni Jehova dagiti buybuyot agbalinto a balangat ti dayag, ken diadema ti kinaimnas, nga agpaay iti matda iti ilina;

⁶ Ken maysa nga espiritu ti kinajusticia iti daydiay agtugaw iti panangocom, ken pigsa cadagiti mamagtuckiad iti gubat iti ruangan.

⁷ Ken uray dagitoy agtiritirda a gapu iti arac, ken agibar-ibarda gapu iti naingel nga inumen; ti padi ken ti mammadto agtiritirda gapu iti naingel nga inumen, addada nga inalun-un ti arac; agibar-ibarda gapu iti naingel nga inumen, bumiddutda iti panagkita, agtibcolda iti panangocom.

⁸ Ta amin dagiti lamisaan napnoda iti sarua ken kinarugit, iti casta awan ti disso a nadalus.

⁹ Asino ti sursuroannanto iti pannacaammo? ken asino ti pangipaawatannanto iti paibaga? dagiti aya mapusot iti gatas, ken maisina cadagiti suso?

¹⁰ Ta isu ti alagaden a mainayon iti alagaden, Alagaden a mainayon iti alagaden; uged iti rabaw ti uged, uged a rutapan ti uged; sangcabassit ditoy, sangcabassit idiay.

¹¹ Saan, no di ket gapu cadagiti tattao dagiti bibig a gangannaet ken sabali a pagsasao ti pakisaonanto iti daytoy nga umili;

¹² Isu a nagcunaanna, Isu daytoy ti inana, mangtedcayo iti inana iti daydiay nabannog; ken isu daytoy ti pacabang-aran: nupay casta dida kinayat a dinengngeg.

¹³ Gapuna a ti sao ni Jehova isunto ti alagaden a mainayon iti alagaden, alagaden a mainayon iti alagaden cadacuada; uged iti rabaw ti uged, uged a rutapan ti uged; sangcabassit ditoy, sangcabassit idiay; tapno macapanda, ken maliadda a mapasag, ket mabettacda, ken masiloanda, ket matiliwda.

¹⁴ Gapuna a denggenyo ti sao ni Jehova, dacayo a managuyaw, a mangituray itoy nga umili nga adda iti Jerusalem.

¹⁵ Agsipud ta kinunayo, Dacami nakitulagcami ken patay, ken nakinomocami ken ni Tanem; intono lumasat ti aglayus a saplit, dinto dumteng cadacami; ta inaramidmi dagiti kinaulbod a pagcamanganmi, ken iti siroc ti kinatiri naglemmengcami:

¹⁶ Gapuna a castoy ti cuna ni Apo Jehova, Adtoy isaadco idiay Sion ti maysa a bato a maipaay a pamuon, maysa a napadas a bato, maysa a napateg a bato a panuli ti natibker a pamuon: ti mamati saanto nga agganat.

¹⁷ Ken aramidecto ti kinajusticia iti uged, ken ti kinalinteg iti tinnag; ket ti uraro itayabnanto ti pagcamangan dagiti kinaulbod, ket dagiti dandanum layusendanto ti paglemmengan.

¹⁸ Ket ti pannakitulagyo ken patay maawawanto, ken ti pannakinomoyo ken ni Tanem dinto agtalinaed; intono lumasat ti aglayus a saplit, dacayo mapayatpayatcayonto gapu kencuana.

¹⁹ Cas iti masansan nga ilalasatna, alaennacayto; ta biniganbigat a lumasatto, iti aldaw ken iti rabii: ket awanto sabali no di laeng ti kigtot a macaawat iti paibaga.

²⁰ Ta ti pagiddaan ab-ababa ngem iti daydiay tao nga agunnat kencuana; ket ti pagcumot ac-akikid ngem iti daydiay mangyules kencuana.

²¹ Ta ni Jehova tumacderto a cas idiay bantay Perasim, cas idiay tanap sadi Gabaon ti panagungetnanto; tapno maaramidna ti aramidna, ti aramidna a datdatlag, ken palabasenna ti aramidna, ti aramidna a datdatlag.

²² Ita ngarud dicayo aguy-uyaw, di la ket ta mapairut dagiti galutyo; ta maysa a bilin ti pannacarba iti amin a daga, ti nangngegco iti Apo, a ni Jehova dagiti buybuyot.

²³ Timudenyo, ken denggenyo ti tmecco; dumngegcayo, ket denggenyo ti saoc.

²⁴ Ti mangarado iti pagmulaan, agarado aya a cancanayon? cancanayon aya a luctanna ken palpalanna ti dagana?

²⁵ Intono mapalanasna ti rabawna, dinanto aya iwaris dagiti neguillas, ken ipurruac ti bukel ti comino, ken ilumlum ti trigo a binatbatog, ken ti cebada iti disso a natudingan, ken ti espelta iti igidna?

²⁶ Ta casta ti isuro a maiparbeng ken idalan ti Diosna kencuana.

²⁷ Ta dagiti neguillas saan ida nga iriken iti natirad nga al-o, ket saanto met a maitulid iti rabaw ti comino ti pilid ti carison; no di ket dagiti neguillas mabatbatda iti maysa a bislac, ket ti comino iti maysa a pangor.

²⁸ Ti bukel nga aramiden a tinapay isu ti gilingen; ta isu ti saan a lebbeken a cancanayon: ken uray ti pilid ti carisonna ken dagiti cabayona isu ti iwarada, nupay casta isu dina gilingen.

²⁹ Daytoy agtaud met laeng ken ni Jehova dagiti buybuyot, isu a pagsidsiddaawan a mamalacad, ken mangnibinibi iti kinasirib.