Isaias 27 - Ti Biblia (1973)

Ti cauvasan ni Jehova. Ti pannacadusa ken pannacaurnong ti Israel.

¹ Iti dayta nga aldaw ni Jehova babaen ti natangken ken dackel ken napigsa a campilan dusaennanto ti leviathan a nasiglat nga uleg, ken ti leviathan a calawikiw nga uleg; ken papatayennanto ti olimaw nga adda iti baybay.

² Iti dayta nga aldaw: maysa a cauvasan ti arac, isu ti icantaanyo.

³ Siac ni Jehova nga agaywan kencuana, isu sibugacto iti tungal canito: di la ket ta adda mangranggas kencuana, isu aywanacto iti rabii ken aldaw.

⁴ Ti pungtot awan caniac: dagiti casumba ken calunay bumusorda coma caniac iti gubat! magnaac coma iti rabawda puurac coma ida nga agtitipon.

⁵ Wenno saan isu cumpet coma iti pigsac, tapno makicappia coma caniac; wen, isu makicappia coma caniac.

⁶ Cadagiti al-aldaw nga umayto ni Jacob agramutto; ti Israel agsabongto ken agbuselto; ken punnoendanto cadagiti bungbunga ti rabaw ti amin a lubong;

⁷ Kinabilna ida aya iti cas panangcabilna cadagidi nangcabil cadacuada? wenno napapatayda aya a cas iti pannacapapatay dagiti pinapatayda?

⁸ Iti maitutop, intono pagtalawem ida, makisusicca cadacuada; isu iniccatna ida babaen ti napigsa a daranudor iti aldaw ti casaor.

⁹ Ngarud gapu itoy mapacawanto ti kinadangkes ni Jacob, ken daytoy amin ti pagbanagan ti panangiccat iti basolna: tapno aramidenna amin dagiti batbato ti altar a cas luc-ga a narumrumec, tapno dagiti Asherim ken dagiti ladawan ti init didanto tumacderen.

¹⁰ Ta ti nasarikedkedan nga ili agwaywayas, maysa a pagtaengan a napanawan ken binaybay-an, a caasping ti let-ang: idiay agarabto ti urbon ti vaca, ken agiddanto idiay, ken arabenna dagiti sangana.

¹¹ Intono dagiti sangana magangoda, masepacdanto; dagiti babbai umaydanto, ket puuranda ida; ta isu umili nga awan ti pannacaawatna: gapuna; a ti nangaramid cadacuada awanto ti caasina cadacuada, ken ti nangbukel cadacuada dinanto ipakitaan ida iti parabur.

¹² Ket maaramidto iti dayta nga aldaw, a ni Jehova ablatannanto ti bungana manipud iti layus ti Carayan agingga iti waig ti Egipto; ket dacayo maurnongcayto a saggaysa, O dacayo nga annac ti Israel.

¹³ Ket maaramidto iti dayta nga aldaw, a ti maysa a tangguyob a dackel mapuyotto; ket umaydanto dagiti nganngani madadaelen iti daga ti Asiria; ken dagiti naparuar iti daga ti Egipto; ket agdayawdanto ken ni Jehova idiay nasantoan a bantay sadi Jerusalem.