Isaias 24 - Ti Biblia (1973)

Ti panangocom ni Jehova cadagiti nasnacion.

¹ Adtoy, ni Jehova aramidenna ti daga nga agongaong, ken aramidenna a langalang, ken isu balictadenna, ken iwarawarana dagiti agtaeng kencuana.

² Ket castanto, a no casano iti umili, casta met iti padi; no casano iti adippen, casta met iti apona, no casano iti tagabu a babbai, casta met iti apona a babai; no casano iti aggatang, casta met iti aglaco; no casano iti mamautang, casta met iti umutang; no casano iti manggun-od iti anac ti piracna, casta met iti mangted iti anac ti pirac kencuana.

³ Ti daga agongaongto unay, ken aglangalangto a naananay; ta ni Jehova insaona daytoy a sao.

⁴ Ti lubong agdung-aw ken aglabas, ti lubong malpes ken aglabas, dagiti nangato a tattao ti daga malpesdanto.

⁵ Ti lubong met narugitan babaen cadagiti agtaeng kencuana; agsipud ta naglabsingda cadagiti linteg, kinaniwasda dagiti bilbilin, rinacracda ti agnanayon a tulag.

⁶ Gapuna a ti panangilunod inalun-unna ti daga, ken dagiti agtaeng kencuana nasaracan ida a nacabasol: gapuna a dagiti agtataeng iti daga mapuuranda, ket bassit a tattao ti malabasan.

⁷ Ti baro nga arac agdung-aw, ti cayo ti uvas malpes, amin dagiti naragsac a puso agsainnecda.

⁸ Ti ragsac ti pandereta agsardeng, manungpal ti daranudor dagiti agragrag-o, ti ragsac ti arpa agsardeng.

⁹ Didanto uminum iti arac a buyogan ti maysa a canta; ti naingel nga inumen napaitto cadagiti manginum kencuana.

¹⁰ Ti maracrac nga ili marsuod; tunggal balay maripcan, tapno awan ti tao a macastrec.

¹¹ Adda maysa a panagickis cadagiti calcalsada a gapu iti arac; amin a rag-o agcudrep, ti ragsac ti daga pimmanawen.

¹² Panaglangalang isu ti mabati iti ili, ket ti ruangan maracrac a marba.

¹³ Ta castoyto iti tengnga ti lubong iti nagtetengngaan dagiti il-ili a cas iti pannacagungon ti maysa a cayo nga olivo, a cas iti panagadadas cadagiti bungbunga no ti panagburas nalpasen.

¹⁴ Dagitoy idackeldanto ti timecda, agriawdanto; maipaay iti kinadayag ni Jehova agickisda iti natbag manipud iti baybay.

¹⁵ Gapuna nga idaydayawyo ni Jehova iti daya, iti nagan met laeng ni Jehova, a Dios ti Israel cadagiti purpuro ti taaw.

¹⁶ Manipud caadayuan a paset ti daga nacangngegcami cadagiti cancanta: Dayaw iti nalinteg. Ngem kinunac, Cumpesac, cumpesac, asiac pay! ti manangliliput agaramid a sililiput unay; wen, ti manangliliput agaramid a sililiput unay.

¹⁷ Ti buteng, ken ti dariwangwang, ken ti silo, naiparabawda kenca, O agnaed iti daga.

¹⁸ Ket maaramidto, a ti agtalaw nga aggapu iti daranudor ti buteng matnagto iti dariwangwang; ket ti rumuar iti tengnga ti dariwangwang masiloanto; ta dagiti tawa sadi ngato nalucatanda, ken dagiti pamuon ti daga agkintayegda.

¹⁹ Ti daga maburac a matalipupus, ti daga mapisi nga agsina, ti daga magungon a napigsa unay.

²⁰ Ti daga agbarbariringto a cas maysa a tao a nabartec, ken maitoltolod nga agsublisubli a cas maysa nga indayon; ket dagiti labsingna dumagsento kencuana, ken mapasagto, ket saanto a bumangonen.

²¹ Ket maaramidto iti dayta nga aldaw, a ni Jehova dusaennanto ti buyot dagiti nangato iti ngato ken dagiti ar-ari ti daga iti rabaw ti daga.

²² Ket maurnongdanto, a cas cadagiti balbalud a maurnong iti dariwangwang, ken mapupocdanto iti pagbaludan; ket iti calpasan dagiti adu nga al-aldaw masarungcarandanto.

²³ Isunton ti pannacariribuc ti bulan, ket ti init mabainanto; ta ni Jehova dagiti buybuyot agarinto idiay bantay Sion, ken sadi Jerusalem; ket iti sangoanan dagiti panglacayenna addanto dayag.