Isaias 23 - Ti Biblia (1973)

Ti padto a maipapan iti Tiro.

¹ Ti sagabaen ti Tiro. Aganug-ogcayo a sasacayan ti Tarsis; ta isu narba iti casta nga awan ti balay, awan ti sercan; manipud iti daga ti Kittim isu ti maipacdaar cadacuada.

² Agulimeccayo, dacayo nga agyan iti igid ti taaw, sica a dagiti agtagtagilaco ti Sidon, a bumallasiwda iti taaw, pinadackeldaca.

³ Ken cadagiti dadackel a dandanum ti bin-i ti Shihor, ti apit ti Nilo, isu idi ti gungunana, ken isu idi ti paglaclacoan dagiti nacion.

⁴ Mabainanca, O Sidon; ta ti taaw insaona, ti sarikedked ti taaw, kinunana, Saanac a nagpasical, ket diac met naganac, saanac met a nagtaraken cadagiti agtutubo a lallaki, ket diac met nangtagibi cadagiti virgen.

⁵ Intono dumteng ti damag sadi Egipto, lumdaangdanto a gapu iti damag ti Tiro.

⁶ Lumabascayo sadi Tarsis; agdung-awcayo dacayo nga agtaeng iti igid ti taaw.

⁷ Isu daytoy aya ti naragsac nga iliyo, a ti kinalacayna aggapu cadagiti al-aldaw idi ugma, a dagiti sacsacana net laeng isu ipanda nga aggangannaet iti adayu?

⁸ Asino ti nangiganuat itoy a maibusor iti Tiro, ti mangmangted cadagiti balangat, a dagiti agtagtagilaco kencuana piprincipeda, dagiti pagbaniagaenna isuda dagiti natatacneng a tattao iti daga?

⁹ Ni Jehova dagiti buybuyot inganuatna, a pangmulit iti kinatangsit ti amin a dayag, mangyeg iti pannacaumsi cadagiti isu-amin a natacneng ditoy daga.

¹⁰ Lumabasca a lasatem ti dagam a cas iti Nilo, O anac a babai ti Tarsis; ta awanen ti manglapped.

¹¹ Isu inyunnatna ti imana iti rabaw ti taaw, ginungonna dagiti pagpagarian: ni Jehova nangited ti bilin a maipanggep iti Canaan, a mangdadael cadagiti sarikedkedna.

¹² Ket kinunana, Dicanto agrag-on, O sica naparigat nga anac a virgen ti Sidon: tumacderca, bumallasiwca sadi Kittim; uray pay idiay awanto ti inanam.

¹³ Adtoy, ti daga dagiti Caldeo; daytoy nga ili napucaw; isu ti binangon ti Asirio a maipaay cadagiti agnaed iti let-ang; patacderenda dagiti torreda; dinupracda dagiti palaciona; isu rinebbada.

¹⁴ Aganug-ogcayo, dacayo a sasacayan ti Tarsis; ta naduprac ti sarikedkedyo.

¹⁵ Ken maaramidto iti dayta nga aldaw, a ti Tiro malipatanto bayat iti pitopulo a tawen, cas mayannurot cadagiti al-aldaw ti maysa nga ari: iti calpasan ti panaggibus dagiti pitopulo a tawen addanto iti Tiro ti cas iti canta ti balangcantis.

¹⁶ Mangalaca iti maysa nga arpa, inca licmuten ti ili, sica balangcantis a nalipatan; agtocarca iti nasam-it, agcantaca cadagiti adu a cancanta, tapno malagipdaca coma.

¹⁷ Ket maaramidto intono calpasan ti panaggibus dagiti pitopulo a tawen, a ni Jehova sarungcarannanto ti Tiro, ket isu agsublinto iti pakitangdananna, ken makiabangto cadagiti isu-amin a pagpagarian ti lubong iti rabaw ti daga.

¹⁸ Ket ti tagilacona ken tangdanna isudanto ti kinasanto ken ni Jehova: isu dinto maidulin ken maurnong; ta ti tagilacona maipaayto cadagiti agtaeng iti sangoanan ni Jehova, a canenda nga umanay, ken maipaay iti napaot a pagan-anay.