Isaias 22 - Ti Biblia (1973)

Ti pannacalacub ti Jerusalem. Ni Eliakim ti sumono ken ni Sebna.

¹ Ti sagabaen ti tanap ti sirmata. Ania aya ti napasamac kenca, ta nacaulican a naananay cadagiti toctoc ti balay?

² O sica a napno iti ariwawa, maysa a naariwawa nga ili, maysa a narag-o a pagilian; dagiti napapatay kenca saanda a napapatay iti campilan, ket saanda met a natay iti gubat.

³ Amin dagiti agtuturaymo nagtalawda a nagcucuyog, rineppet ida dagiti panaan; amin dagidi nasaracan a naggapu kenca nareppetda a nagtitipon; dagidiay nagtalaw iti adayu.

⁴ Gapuna a kinunac, Ibawingyo ti ikikitayo caniac, agsangitacto iti napait unay; dicayo agbannug a mangliwliwa caniac a gapu iti pannacarbec ti anac a babai ti ilic.

⁵ Ta isu ti maysa nga aldaw ti pannacariribuc, ken ti pannacaibaddebaddec, ken ti panagal-la-al-la, nga aggapu iti Apo, a ni Jehova dagiti buybuyot, iti tanap ti sirmata; maysa a pannacarba dagiti bacud, ken maysa a panagickis cadagiti banbantay.

⁶ Ket ti Elam innalana ti taguban, agraman luglugan dagiti tattao ken tattao a sicacabayo; ket ti Kir iniccatna ti abbong ti calasag.

⁷ Ket naaramid, a dagiti tanapmo a casayataan napnoda idi cadagiti luglugan, ket dagiti tattao a sicacabayo nagoornosda iti ruangan.

⁸ Ket isu iniccatna ti abbong ti Juda, ket sica sinukimatmo iti dayta nga aldaw iti pagidulinan cadagiti igigam idiay balay idiay cabakiran.

⁹ Ket nakitayo nga aduda; dagiti gut-baw ti ili ni David, ken inurnongyo dagiti dandanum ti nababbaba a tangke;

¹⁰ Ket binilangyo dagiti balbalay ti Jerusalem, ket rinacracyo dagiti balbalay a pangpalagda iti bacud;

¹¹ Nagaramidcayo met ti maysa a nalawa a tangke iti baet dagiti dua a bacud a maipaay iti danum ti daan a tangke. Ngem dicayo kimmita iti daydiay a nangaramid itoy, ket dicayo met pinadayawan daydiay a nagpanggep itoy idi nabaybayagen.

¹² Ket iti daydiay nga aldaw ti Apo, a ni Jehova dagiti buybuyot, nangayab iti panagsangit, ken iti panagdung-aw, ken ti panagcalvo ken ti panagbarikes iti lupot a nakersang:

¹³ Ket, adtoy, ti rag-o ken ragsac, ti panangparti cadagiti vacvaca ken carcarnero, pannangan iti lasag ken panaginum iti arac: mangantayo coma ken uminumtayo, ta intono bigat mataytayto.

¹⁴ Ket ni Jehova dagiti buybuyot impaltiingna cadagiti lapayagco, Pudno a daytoy a kinadangkes saan a mapacawan cadacayo agingga iti mataycayo, cuna ti Apo, ni Jehova dagiti buybuyot.

¹⁵ Castoy ti cuna ti Apo, a ni Jehova dagiti buybuyot, Inca, dumanonca itoy a tesorero, nga isu met laeng ni Sebna, a pangulo ti balay, ket cunaem,

¹⁶ Ania ti aramidem ditoy? ken asino ti caduam ditoy, a nangabutca ditoy iti maysa a tanem a maipaay kenca? isu mangcungcung iti maysa a tanem iti ngato, mangcungcung iti maysa a pagtaengan a maipaay kencuana iti uneg ti bato!

¹⁷ Adtoy, ni Jehova, a cas maysa a napigsa a tao, sipipigsanto a mangibelleng kenca; wen, lucutennacanto a nairut.

¹⁸ Patayyekennacanto a pudno unay, ken ipallangatocnaca a cas maysa a bola iti maysa a nalawa a daga; idiayto ti pacatayam, ken idiay ti pagyananto dagiti luglugan ti dayagmo, sica a pacaibabainan ti balay ni apom.

¹⁹ Ket iccatencanto manipud iti saadmo; ken manipud iti pagtaengam guyodencanto.

²⁰ Ket maaramidto iti dayta nga aldaw, nga ayabacto ni adipenco nga Eliakim nga anac a lalaki ni Hilcias:

²¹ Ket isu cawesacto iti pagananaymo, ken isu papigsaecto iti barikesmo, ken yawatconto ti turaymo cadagiti imana; ket agbalinto a maysa nga ama cadagiti agnaed sadi Jerusalem, ken iti balay ni Juda.

²² Ket ti tulbec ti balay ni David iparabawconto iti abagana, ket isu luctannanto, ket awanto ti mangirikep; ket ripcannanto, ken awanto ti manglucat.

²³ Ket isu ipasocconto a cas maysa a lanza iti natalged a disso; ket isunto ti pannacatrono ti dayag ti balay ni amana.

²⁴ Ket ibitindanto kencuana ti amin a dayag ti balay ni amana, putotna ken ti capututanna, isu-amin nga alicamen a babassit, manipud cadagiti copana agingga cadagiti amin a frascona.

²⁵ Iti dayta nga aldaw, cuna ni Jehova dagiti buybuyot, ti lanza a naipasoc iti natalged a disso agsaltonto, ket maputedto, ket matnagto; ket ti awit nga adda iti rabawna, maiccatto; ta isu ti sinao ni Jehova.