Isaias 21 - Ti Biblia (1973)

Dagiti padpadto a maipapan iti Babilonia, Edom ken Arabia.

¹ Ti sagabaen a maipaay iti let-ang ti baybay. Cas ti panangcabil dagiti alipugpug iti Abagatan, casta daydiay aggapu iti let-ang aggapu iti nacaamamac a daga.

² Maysa a nacalcaldaang a sirmata ti maipalawag caniac; ti manangliliput a tao agaramid a sililiput, ket ti managdadael agdadael. Sumang-atca, O Elam; lumacubca, O Media; amin a sainnecna pinasardengco.

³ Gapuna a napno dagiti lomoc iti tuoc; dagiti ut-ut ginemgemandac, a cas cada giti ut-ut ti maysa a babai iti panagpasical: addaac a siuut-ut iti casta diac macangngeg; addaac a sicucullayaw iti casta diac macakita.

⁴ Ti pusoc agtibbayo, ti buteng kinigtotnac; ti apagsipnget a kinalicagumac napagbalin a macapigerger caniac.

⁵ Isaganada ti lamesaan, isaadda ti agwanawan, manganda, uminumda: tumacdercayo, daccayo a panguloen, sapsappoanyo ti calasag.

⁶ Castoy ti kinunana ti Apo caniac, Inca, mangisaadca iti maysa nga agwanawan; ibagana coma ti makitana.

⁷ Ket intono makitana ti maysa a buyot, tattao a sisasacay cadagiti cabayo a sagdudua caabay, maysa a pangen dagiti asno, maysa a pangen dagiti camello, timudenna a siaagawa unay ken siaannad.

⁸ Ket isu nagpuccaw a cas maysa a leon: O Apo, agtacderac nga agnanayon iti rabaw ti pagwanawanan iti aldaw, ket maisaadac nga agbantay nga agpatpatnag iti rabii;

⁹ Ket, adtoy, sumungad ti maysa a buyot dagiti tattao, sicacabayo a tattao a sagdudua caabay. Ket isu simmungbat ket kinunana, Narba, narba ti Babilonia; ket amin dagiti kinitikitan a ladladawan dagiti didiosna maburburacda a maipadaga.

¹⁰ O sica pagtaltagac, ket ti bukel iti cadsaarac! daydiay a nangngegco ken Jehova dagiti buybuyot, a Dios ti Israel, impaduyacyacco cadacayo.

¹¹ Ti sagabaen a maipaay iti Duma. Manipud Seir adda umawawag caniac, Agwanawan, adda aya aniaman iti rabii? Agwanawan, adda aya aniaman iti rabii?

¹² Ti agwanawan simmungbat, Ti bigat sumungad, ket casta met ti rabii: no cayatyonto ti dumamag, saludsodenyo: agsublicayo, ket umaycayo manen.

¹³ Ti sagabaen a maipaay iti Arabia. Iti cabakiran ti Arabia ti pagdagusanyonto, O dacayo nga agbaniaga a taga Dedanim.

¹⁴ Iti mawaw inyeganda ti danum; dagiti agtataeng iti daga ti Tema sinabetda agraman tinapayda dagiti nagtalaw.

¹⁵ Ta intalawanda dagiti campilan, dagiti naasut a campilan, ken ti sibibiat a ba-i, ken iti kinaranggas ti gubat.

¹⁶ Ta castoy ti kinuna ni Jehova caniac, Iti bayat ti macatawen, cas mayannurot cadagiti tawen ti maysa a mangmangged, amin a dayag ti Cedar maawanto;

¹⁷ Ket ti matidda iti bilang dagiti panaan, dagiti maingel a tattao cadagiti annac ti Cedar nataccondanto; ta sinao ni Jehova, a Dios ti Israel.