Isaias 20 - Ti Biblia (1973)

Ti padto a maipapan iti pannacacayaw ti Egipto ken Etiopia.

¹ Idi tawen nga yaay ni Tartan sadi Asdod idi isu imbaon ni Sargon nga ari ti Asiria, ken ginubatna ti Asdod ket innalana;

² Iti dayta a tiempo ni Jehova nagsao iti pannacaaramat ni Isaias nga anac ni Amoz, a kinunana, Inca, ket iccatem ti lupot a nakersang cadagiti lomom, ket iccatem dagiti zapatos iti sacam. Ket casta ti inaramidna, a nagnagna a silalamolamo ken sacasaca.

³ Ket ni Jehova kinunana, Cas iti pannagna ni adipenco nga Isaias a silalamolamo ken sacasaca bayat iti tallo a tawen a maipaay a pagilasinan ken pacasdaawan a maipanggep iti Egipto ken iti Etiopia;

⁴ Castanto ti ari ti Asiria ipanawna dagiti nacayawan ti Egipto, ken dagiti pannacaibelleng ti Etiopia, agtutubo ken lallacay, silalamolamo ken sacasaca, ken awan ti abbong ti patongda, a pacaibabainan ti Egipto.

⁵ Ket agcullayawdanto ken mariribucdanto, a gapu iti Etiopia nga inanamada, ken iti Egipto a dayagda.

⁶ Ket dagiti agnaed iti daga nga igid ti baybay cunaendanto iti dayta nga aldaw, Adtoy, castoy ti nanginanamaantayo, a nagcamangan tapno maispaltayo iti ari ti Asiria: ket, casano ti panagtalawtayo?