Isaias 2 - Ti Biblia (1973)

Ti sapasap a panagturay ni Jehova. Ti panagrucbab ti Israel cadagiti ladladawan rebbengna nga isardeng.

¹ Ti sirmata a nakita ni Isaias nga anac ni Amos a maipapan iti Juda ken Jerusalem.

² Ket maaramidto cadagiti maududi nga al-aldaw, a ti balay ni Jehova mabangonto iti rabaw dagiti banbantay, ket maibayogto a nangnangrona ngem cadagiti turturod; ket isu-amin a nacion agayusdanto agingga kencuana.

³ Ket adu dagiti inilin-ili a mapanto ken agcuna, Umaycayo, ket sumang-attayo iti bantay ni Jehova, iti balay ti Dios ni Jacob; ket isuronatayonto cadagiti dalanna, ke magnatayonto cadagiti danana: ta iti Sion ti rumuaranto ti linteg, ket iti Jerusalem ti rumuaranto ti sao ni Jehova.

⁴ Ket isu pagocommannanto dagiti nasnacion, ket kengannanto ti timaipapan cadagiti adu nga inilin-ili: ket pandayendanto dagiti camcampilanda a pagbalinen a dingding ti arado, ket dagiti picpicada pandayendanto a comcompay; ti maysa a nacion saannanto nga itag-ay ti campilan a maibusor iti nacion, ket didanto met adalenen iti pannakigubat uray caano.

⁵ O balay ni Jacob, umaycayo, ket magnatayo iti lawag ni Jehova.

⁶ Ta sica tinallicudam ti ilim, a balay ni Jacob, ta napnoda iti cadawyan iti daya, ken managbuyonda a cas cadagiti Filisteos, ket iyunnatda ti imada cadagiti annac dagiti gangannaet.

⁷ Ket ti dagada napno iti pirac ken balitoc, ket awan met ti inggana dagiti gamgamengda; ti dagada met napno cadagiti cabcabayo, awan met ti paggibusan dagiti lugluganda.

⁸ Ti daga met napno cadagiti didiosen; isuda agcararagda cadagiti aramid dagiti im-imada met laeng, nga inaramid dagiti ramramayda met laeng.

⁹ Ket ti nababa a tao maparucnoy, ket ti nangato a tao mapababa: gapuna a dica ida pacawanen.

¹⁰ Sumrecca iti bato, aglemmengca iti tapoc, manipud iti sangoanan ti pangkigtot ni Jehova, ken iti dayag ti kinatan-ocna.

¹¹ Ti napalangguad a panagkitkita ti tao mapaemmanto, ken ti kinatangsit dagiti tattao maparucbabto, ket ni Jehova laeng ti madaydayawto iti dayta nga aldaw.

¹² Ta addanto aldaw ni Jehova dagiti buybuyot a maipatay cadagiti isu-amin a natangsit ken napalangguad, ken cadagiti amin a maitantan-oc; ket mapaemmadanto.

¹³ Ken iti rabaw ti isu-amin a cancantingen ti Libano, a natayag ken maibaybayog, ken cadagiti amin a luglugo ti Basan,

¹⁴ Ken iti rabaw dagiti isu-amin a banbantay a natayag, ken iti isu-amin a turturod a nangato,

¹⁵ Ken iti rabaw ti tunggal torre a nangato, ken iti tunggal maysa cadagiti nasarikedkedan a bacud,

¹⁶ Ken cadagiti amin a sasacayan a taga Tarsis, ken iti amin a nacaay-ayo a paltuad.

¹⁷ Ket ti kinapalangguad ti tao maparucnoyto, ket ti kinatangsit dagiti tattao maipababanto; ket ni Jehova laeng ti maitan-octo iti dayta nga aldaw.

¹⁸ Ket dagiti didiosen maiccatdanto a maikisap.

¹⁹ Ket dagiti tattao sumrecdanto cadagiti rukib dagiti batbato, ken iti uneg dagiti abut ti daga, manipud iti sangoanan ti pangkigtot ni Jehova, ken manipud iti dayag ti kinadaegna, intono tumacder a simamannacabalin a manggungon iti daga.

²⁰ Iti dayta nga aldaw dagiti tattao ipalapaldanto cadagiti marabutit ken curarapnit dagiti didiosenda a pirac, ken didiosenda a balitoc, isuda nga inaramidda a maipaay cadacuada a pagcararagan;

²¹ A sumrecda cadagiti rukib dagiti batbato, ken iti uneg dagiti rengngat dagiti nakersang a bato, manipud iti sangoanan ti pangkigtot ni Jehova, ken iti dayag ti kinadaegna, intono tumacder a simamannacabalin a manggungon iti daga.

²² Bay-anyo ti tao, a ti angesna adda cadagiti abut iti agongna; ta ania ti pacaibilanganna?