Isaias 19 - Ti Biblia (1973)

Ti padto a maipapan iti Egipto.

¹ Ti sagabaen ti Egipto. Adtoy, ni Jehova aglugan iti nasiglat nga ulep, ken umay iti Egipto: ket dagiti didiosen idiay Egipto agpigergerdanto iti sangoananna; ken ti puso ti Egipto marunawto iti tengngana.

² Ket tignayecto dagiti Egipcios a bumusor cadagiti Egipcios: ket isuda agcacabildanto tunggal maysa a maicaniwas ken cabsatna, ken tunggal maysa a maicaniwas ken carrubana; ili a maicaniwas iti ili, ken pagarian a maicaniwas iti pagarian.

³ Ket ti espiritu ti Egipto maawanto iti tengngana; ken dadaelecto ti pinanggepda: ket umumandanto cadagiti didiosen, ken cadagiti bagbaglanda, ken cadagiti mangnganito, ken cadagiti mammuyon.

⁴ Ket yawatconto dagiti Egipcios iti ima ti maysa nga apo a nadawel; ket maysa a narungsot nga ari ti mangiturayto cadacuada, cuna ti Apo, ni Jehova dagiti buybuyot.

⁵ Ket agcurangto dagiti dandanum iti baybay, ket ti carayan umes-esto ken mamagaan.

⁶ Ket dagiti carayan agbalindanto a nalibeg; dagiti ay-ayus ti Egipto umes-esto ket mamagaan; dagiti badobadoc ken dagiti tartarabang magangodanto.

⁷ Dagiti tantanap a carootan iti denna ti Nilo, iti igid ti Nilo, ken amin a namulaan a taltalon iti Nilo, agbalindanto a namaga, maipayugpugdanto, ket awandanton.

⁸ Ket dagiti mangngalap agladingitdanto, ken amin dagiti agbanniit iti Nilo, agdung-awdanto, ket dagiti mangiwayat iti iket cadagiti dandanum agcapuydanto.

⁹ Castamet dagiti agtrabajo iti sinaggaysay a lino ken dagiti agabel iti puraw a lupot, marirudanto:

¹⁰ Ket dagiti monmon ti Egipto mabungbungtoldanto; isu-amin dagiti mangmangged mapapulcocto iti cararuada.

¹¹ Dagiti panguloen ti Zoan napalalo ti kinamaagda, ti patigmaan dagiti casisiriban a consejero ni Faraon nagbalinda a nacuneng: casano ti panagcunayo ken Faraon, Siac ti anac ti masirib, anac dagidi cadaanan nga ar-ari?

¹² Sadino ti yanda ngarud dagiti tattaom a mamasirib? ket ibagada coma kenca ita; ket maammoanda coma dagiti gandat ni Jehova dagiti buybuyot a maipanggep iti Egipto.

¹³ Dagiti panguloen ti Zoan nagbalinda a maag, dagiti panguloen ti Memfis maallilawda; inyawawanda ti Egipto, isuda a bato a panuli cadagiti capcaputotanna.

¹⁴ Ni Jehova inlaocna ti maysa nga espiritu ti pangilkillo iti tengngana; ket inyawawanda ti Egipto iti tunggal aramidna, a cas maysa a nabartec a tao nga agibar-ibar iti panagbaccuarna.

¹⁵ Awanto met ti aniaman nga aramid a maipaay iti Egipto, a ti olo wenno ti ipus, ti sanga wenno ti badobadoc mabalinda nga aramiden.

¹⁶ Iti dayta nga aldaw dagiti lallaki ti Egipto casladanto la babbai; ket agpigergerdanto ken agbutengdanto iti panaggungon ti ima ni Jehova dagiti buybuyot, isa a pangbusorna cadacuada.

¹⁷ Ket ti daga ti Juda agbalinto a pagbutbutngan ti Egipto; ti tunggal maysa a pacaisaritaanna agbutengto, a gapu iti panggep ni Jehova dagiti buybuyot, a panggepenna a maibusor kencuana.

¹⁸ Iti dayta nga aldaw addanto lima nga il-ili daga ti Egipto nga agsao iti pagsasao ti Canaan, ket agsapatada ken ni Jehova dagiti buybuyot; ti maysa cadacuada managanto Ti ili ti pannacarba.

¹⁹ Iti dayta nga aldaw addanto maysa nga altar ken ni Jehova iti tengnga ti daga ti Egipto, ken maysa a monmon ken ni Jehova iti beddengna.

²⁰ Ket maipaayto a pagilasinan ken pangsacsi ken ni Jehova dagiti buybuyot iti daga ti Egipto; ta umawagdanto ken ni Jehova a gapu cadagiti namarigat, ken isu mangibaonto ti mangisalacan cadacuada, ken maysa a mangispal, ket isalacannanto ida.

²¹ Ket ni Jehova maipacaammonto iti Egipto, ket dagiti Egipcios bigbigendanto ni Jehova iti dayta nga aldaw: wen, agcararagdanto a buyugan ti sacrificio ken daton, ket agcaridanto ken ni Jehova, ket isu ti tungpalendanto.

²² Ket ni Jehova cabilennanto ti Egipto, mangcabil ken mangpaimbag; ket sumublidanto ken ni Jehova, ket isu ti pagdawatandanto ket pasalun-atennanto ida.

²³ Iti dayta nga aldaw addanto maysa a napatac a dalan nga aggapu iti Egipto nga agturong sadi Asiria, ket dagiti Asirios sumrecdanto iti Egipto, ket dagiti Egipcios iti Asiria; ket dagiti Egipcios agcararagdanto agraman cadagiti Asirios.

²⁴ Iti dayta nga aldaw ti Israel isunto ti maicatlo iti Egipto ken Asiria; maysa a bendicion iti tengnga ti daga;

²⁵ Agsipud ta ni Jehova dagiti buybuyot binendicionanna ida, a kinunana, Bendito coma ti ilic nga Egipto, ken ti Asiria nga aramid dagiti im-imac, ken ti Israel a cucuac.