Isaias 18 - Ti Biblia (1973)

Maysa a padto a maipapan iti Etiopia.

¹ Ay, ti daga ti panagwaneswes dagiti paypayac, nga adda iti labes dagiti carcarayan sadi Etiopia;

² A mangibaon cadagiti embajadores iti baybay, iti sasacayan nga alupasi iti rabaw dagiti dandanum, a cunaenna, Incayo, dacayo a nasiglat a mabaon, iti maysa a nacion a nangato ken napalanas, iti maysa a pagilian a nacaamamac nanipud idi damoda ken agtultuloy, maysa a nacion a mangsupapac ken mangpayatpayat, a ti dagada madasigdasig cadagiti carcarayan!

³ Dacayo amin nga agtaeng iti lubong, ken dacayo nga agnaed iti daga, intono maitayag ti maysa a wagayway iti rabaw dagiti banbantay, kitaenyo; ken intono mapaguni ti tangguyob, denggenyo.

⁴ Ta castoy ti imbaga ni Jehova caniac, Agtalnaacto, ken matmatacto manipud iti pagnaedac, cas nalawag a pudot ti raniag ti init, cas maysa nga ulep ti linnaaw iti pudot ti panagapit.

⁵ Ta iti sacbay ti panagapit, intono malabesen ti panagsabong, ket ti sabong agbalin a bunga ti uvas nga agluom paadenna iti cumpay dagiti uggot, ken dagiti agrangpaya a sanga iccatennanto ken pucanennanto.

⁶ Mabaybay-andanto a naornong a maipaay cadagiti narawet a tumatayab cadagiti banbantay, ken cadagiti amin nga an-animal iti daga; ket dagiti narawet a tumatayab agyandanto cadacuada iti pannawen ti pudot, ket dagiti an-animal ti daga agyandanto cadacuada iti pannawen ti lam-ec.

⁷ Iti dayta a tiempo maysa a daton ti maidatagto ken Jehova dagiti buybuyot nga aggapu iti maysa a pagilian a nangato ken napalanas, nga aggapu met laeng iti umili a nacaalalinggec nanipud idi damona ken agtultuloy, maysa a nacion a mangsupapac ken mangpayatpayat, a ti dagada madasigdasig cadagiti carcarayan, ingana iti lugar ti nagan ni Jehova dagiti buybuyot, ti bantay Sion.