Isaias 17 - Ti Biblia (1973)

Ti padto a maipapan iti Damasco.

¹ Ti sagabaen ti Damasco. Adtoy, ti Damasco naiccat ti kinailina, ket isunto ti maysa a gabsuon ti narba.

² Dagiti il-ili ti Aroer nabaybay-anda; isuda maipaaydanto cadagiti ar-arban, nga agiddadanto, ket awanto ti mangbugtac cadacuada.

³ Ket mapucawto ti sarikedked ti Efraim, ken iti pagarian ti Damasco, ken ti matda iti Siria; isudanto ti cas iti dayag dagiti annac ti Israel, cuna ni Jehova dagiti buybuyot.

⁴ Ket maaramidto iti dayta nga aldaw, a ti dayag ni Jacob mapacapuyto, ken ti kinalucmeg ti lasagna agbalinto a nacottong.

⁵ Ket isunto ti cas la iti agan-ani no urnongenna ti sitatacder a trigo, ken rurosenna iti tackiagna dagiti dawa; wen, isu caslanto iti maysa no agadadas iti dawa iti tanap ti Refaim.

⁶ Nupay casta addanto pay matda nga adasen a cas iti panangwagwag iti cayo nga olivo, dua wenno tallo a bunga iti catayagan a murdong ti sanga, uppat wenno lima iti caalimpatocan a sanga ti nabunga a cayo, cuna ni Jehova, ti Dios ti Israel.

⁷ Iti dayta nga aldaw dagiti tattao bigbigendanto ti Namarsua cadacuada, ket dagiti matada agraemdanto iti Santo ti Israel.

⁸ Ket didanto cumita cadagiti al-altar, nga aramid dagiti im-imada; ket didanto met pagdayawan dagiti inaramid dagiti ramramayda, uray pay dagiti Asherim, wenno cadagiti ladawan ti init.

⁹ Iti dayta nga aldaw dagiti nalagda nga il-ilida casladanto cadagiti disso a nabaybay-an iti cabakiran ken iti tapaw ti bantay, a nabaybay-anda idi iti sangoanan dagiti annac ti Israel; ket isunto ti maysa a langalang.

¹⁰ Ta sica linipatam ti Dios a salacanmo, ken dica linaglagip ti bato ti pigsam, gapuna a nangimulaca cadagiti nacaay-ayo a mulmula, ket isu ti immulam cadagiti gangannaet a sarsaringit.

¹¹ Iti aldaw ti panagmulam, isu ti panangticubmo, ken iti agsapa pagsabongem ti bukelmo; ngem ti apit awanto iti aldaw ti rigat ken leddaang nga awanan ti inanama.

¹² Ay, ti ungor dagiti adu nga umili nga agungor a cas iti panagungor dagiti baybay; ken ti panagdarison dagiti nasnacion, nga agdarisonda a cas iti panagdarison dagiti napegges a dandanum!

¹³ Dagiti nasnacion agdarisonda a cas iti panagdarison dagiti adu a dandanum: ngem tubngarennanto ida, ket agtalawdanto nga umadayu, ken maabogto a cas iti taep dagiti banbantay iti sangoanan ti angin, ken cas iti agtaytayyec a tapoc iti sangoanan ti bagio.

¹⁴ Iti rumabii, adtoy, ti nacakigkigtot; ket no di pay bumigat awandan. Isu daytoy ti apag dagiti mangsamsam cadacami, ken ti gasat dagiti mangtacaw cadacami.