Isaias 16 - Ti Biblia (1973)

Ti pannacadadael ti Moab.

¹ Paipanyo dagiti cordero a maipaay iti agturay iti daga manipud Sela inggana iti let-ang, agingga iti bantay ti anac a babai ti Sion.

² Ta isunto, cas cadagiti agtawtawataw a tumatayab, a cas mawarawara nga umoc, castadanto dagiti annac a babbai ti Moab cadagiti ballasiwan ti Arnon.

³ Mangbalacadca, tungpalem ti kinajusticia; pagbalinem ti linongmo iti matoon a cas maysa a rabii, ilingedmo dagiti naibelleng; dica liputan ti nagtalaw.

⁴ Makipagyanda coma kenca dagiti imbellengco; maipapan iti Moab, sica coma ti maysa nga abbong kencuana manipud iti rupa ti manangranggas. Ta ti managpalalo mapucaw, ti pannacarba sumardeng, dagiti mamarparigat maibusda iti daga.

⁵ Ket maysa a trono ti mabangonto iti kinamanangngaasi, ket maysa ti agtugawto kencuana iti kinapudno, iti tolda ni David, a mangocom, ken mangbiruc iti kinajusticia, ken nasingdat a mangaramid iti kinalinteg.

⁶ Nangngeganmi ti kinatangsit ti Moab, nga isu natangsit unay; iti met laeng palangguadna, ken ti kinatangsitna, ken ti pungtotna; dagiti panagpasindayawna awan ti capapaayanda.

⁷ Gapuna a ti Moab agdung-awto a maipuon iti Moab, agdung-awto ti tunggal maysa: dung-awanyonto ti tinapay a pasas ti Kir-hareseth, a nadadael a naikisap.

⁸ Ta dagiti taltalon ti Hesbon cumapuyda, ken ti uvas ti Sibma; dagiti appo dagiti nacion sinep-acda dagiti napili a sangsangana, a gimmaw-atda agingga iti Jaser met laeng; a naglicawlicawda iti let-ang; dagiti saringitna nagwawarada, bimmallaswda iti baybay.

⁹ Gapuna a makipagsangitacto iti panagsangit ti Jazer a maipuon iti uvas ti Sibma; sibugancanto cadagiti luluac, O Hesbon, ken Eleale: ta cadagiti bungbungam iti calgaw ken iti apitem isu ti nagpasagan ti ariwawa ti gubat.

¹⁰ Ket ti rag-o, ken ti ragsac naipanawda iti nabunga nga away; ken iti cauvasan awanto ti panagcancanta, awan met ti nacaragragsac a timec: awan ti agpaypayat a mangpayatto iti arac cadagiti pagpespesan ti uvas; pinasardengco ti riaw ti panagburas.

¹¹ Gapuna ti pusoc aguni a cas arpa a maipuon iti Moab, ken dagiti lalaemco a maipuon iti Kir-hareseth.

¹² Ket maaramidto, intono agparang ti Moab, intono mabannog iti nangato a disso, ken umayto iti santuariona nga agcararag, isu saanto a mangatiw.

¹³ Daytoy ti sao nga imbalicas ni Jehova a idi napalabas a pannawen a maipapan iti Moab.

¹⁴ Ngem ita ni Jehova sinaona, a kinunana, Iti bayat ti tallo a tawen, a cas cadagiti tawen ti maysa a mangmangged, ti dayag ti Moab maumumsinto, agraman amin a kinaaduna; ket ti matidda bassito unay ken awan ti capapaayanna.