Isaias 15 - Ti Biblia (1973)

Ti padto a maipapan iti Moab.

¹ Ti sagabaen ti Moab. Ta iti maysa a rabii ti Ar ti Moab nadadael, ken napanawan; ta iti maysa a rabii ti Kir ti Moab nadadael ken naawan.

² Simmang-atda agingga iti Bayith, ken Dibon, cadagiti disso a nangato, tapno agsangit: ti Moab dungawanna ti Nebo, ken ti Medeba; iti amin nga oloda nagcalvo, amin nga imingda nakiskisan.

³ Cadagiti daldalanda baricsandanto dagiti bagbagida iti lupot a nakersang; cadagiti tuctoc ti balayda, ken cadagiti luglugarda a nalawa, agdung-awto tunggal maysa, agsangit iti napalalo.

⁴ Ket ti Hesbon ken ti Eleale agickisda; ti timecda mangngeg agingga iti Jahas met laeng: gapuna a dagiti nagigam a tattao ti Moab agriawda; ti cararuana agtayegteg iti unegna.

⁵ Ti pusoc agickis a gapu iti Moab; dagiti natacnengna tumarayda agingga ti Zoar, agingga iti Eglath-shelishiyah: ta iti sasang-atan ti Luhith sumang-atda a sisasangit; ta iti dalan ti Horonaim inriawda iti maysa nga ickis ti pannacarba.

⁶ Ta dagiti dandanum ti Nimrim maabbatdanto; ta ti root magangonto, ti naganus a root malaylayto, awanto ti banag a nalangto.

⁷ Gapuna a ti nagun-odanda a kinawadwad, ken ti inurnongd, ipandanto iti ballasiw ti waig dagiti caycayo a willow.

⁸ Ta ti ariwawa naglicmut cadagiti beddeng ti Moab; ti dung-awna dimmanon iti Eglaim, ken ti dung-awna dimmanon iti Beer-elim.

⁹ Ta dagiti dandanum ti Dimon napnoda iti dara; ta mangyegac pay idiay Dimon, iti maysa a leon iti rabaw dagiti macatalaw ti Moab, ken iti rabaw dagiti matda iti daga.