Isaias 14 - Ti Biblia (1973)

Ti pannacaisubli ti Israel. Cancion ti panagballigida iti Babilonia. Padto a maipapan iti Filistia.

¹ Ta ni Jehova addanto caasina ken Jacob, ken pilienna pay ti Israel, ken pagtaengenna ida iti dagada met laeng: ket ti gangannaet tumiponto cadacuada, ket makicadduadanto iti balay ni Jacob.

² Ket dagiti tattao alaendanto ida, ken ipanda ida iti lugarda; ket ti balay ti Israel icutannanto ida iti daga ni Jehova, cas ad-adipen a lallaki ken babbai: ket cayawandanto dagiti nangcayaw cadacuada; ket iturayandanto dagiti namarparigat cadacuada.

³ Ket maaramidto iti aldaw a pannangted ni Jehova kenca iti panaginanam iti ladingitmo, ken iti riribucmo, ken iti narigat a panagservi a nacaipapilitam a nagservi.

⁴ Nga nalaemto daytoy a pangngarig a maibusor iti ari ti Babilonia, ket cunaemto, Anian a panagpatingga dagiti mamarparigat! ti ili a balitoc naggibusen!

⁵ Ni Jehova binungtolna ti sarucod ti managdacdakes, ti cetro dagiti agturturay;

⁶ A kinabilda iti pungtotda dagiti umili iti cancanayon a pang-or nga inturayanda dagiti nasnacion iti unget, a binuyogan ti panangidadanes nga awan ti nanglapped.

⁷ Ti isu-amin a daga aginana, ket natalna: tumpuarda nga agcancanta.

⁸ Wen, dagiti caycayo a parwa agragsacda kenca, ken dagiti cancantingen ti Libano, a cunaenda, Nanipud iti pannacaibabam, awan ti mannaga a sumang-at a bumusor cadacami.

⁹ Ti Tanem iti baba nagaraw a maipaay kenca a sumabet iti yaaymo; inriingannaca cadagiti natay, a dagiti amin met laeng a pangpangolo ti daga; pinatacderna dagiti ar-ari dagiti nasnacion manipud cadagiti tronoda.

¹⁰ Isuda amin sumungbatdanto ken cunadanto kenca, Kimmapuyca met aya a cas cadacami? nagbalinca aya a capadpadami?

¹¹ Ti pasindayagmo nayulog idiay Tanem, ken ti aweng dagiti violonmo: ti igges maiwaras iti sirocmo, ken dagiti igigges abungolandaca.

¹² Anian ti pannacatnagmo nanipud langit, O baggac, nga anac ti bigat! anian ti pannacakeltaymo a naipadaga, sica a pinagpacumbabam dagiti nasnacion!

¹³ Ket kinunam ita pusom, Agpangatoacto sadi langit, ibayogconto ti tronoc iti ngato dagiti bitbitwen ti Dios; ken agtugawacto iti bantay ti gimong, cadagiti caadayuan a paspaset ti amianan;

¹⁴ Agpangatoacto iti rabaw ti cangatoan dagiti ululep; ipadpadconto ti bagic ken Cangatoan.

¹⁵ Nupay casta sica maibabacanto ken Tanem, iti cauunegan a paspaset ti dariwangwang.

¹⁶ Dagiti macakita kenca tan-awandacanto, ot-otobendacanto, a cunaenda, Isu daytoy ti tao a pinagpigpigergerna ti daga, a nanggungon cadagiti pagpagarian;

¹⁷ Nga inaramidna ti lubong a cas maysa a let-ang, ken rineb-bana dagiti il-ilina, a dina bulosan dagiti balbalud a mapan iti balayda?

¹⁸ Amin dagiti ar-ari dagiti nasnacion, isuda amin maturogda iti dayag, tunggal maysa iti balayna met laeng.

¹⁹ Ngem sica maipalapalca manipud iti tanemmo a cas maysa a nacarimrimon a sanga, a cas cawes dagiti pinapatay, a sinalput ida ti campilan, a bumaba cadagiti batbato ti dariwangwang; a cas iti maysa a bangcay a nabaddebaddecan.

²⁰ Dicanto maitipon cadacuada iti pannacaitabon, agsipud ta dinadaelmo ti dagam, pinapataymo dagiti cailiam; ti bin-i dagiti managaramid ti dakes saanto a masarsarita iti agnanayon.

²¹ Agsaganacayo iti pagpapatayan a maipaay cadagiti annacna a gapu iti kinadakes dagiti ammada, tapno dida tumacder, ken agtagicua iti daga, ken mangpunno iti rabaw ti lubong cadagiti il-ili.

²² Ket tumacderacto a bumusor cadacuada, cuna ni Jehova dagiti buybuyot, ket pucawecto iti Babilonia ti nagan ken ti nabati, ken anac ken anac ti anac, cuna ni Jehova.

²³ Isu aramidecto met a tagicuaen dagiti babassit nga animal ken al-alog dagiti dandanum: ken isu sagadecto iti sagad ti panangrebba, cuna ni Jehova dagiti buybuyot.

²⁴ Ni Jehova dagiti buybuyot insapatana, a cunana, Pudno unay, a cas iti panangpanunotco, castanto ti maaramid; ken cas iti pinanggepco, casta ti mataginayonto:

²⁵ A burakecto ti Asirio iti dagac, ken iti rabaw dagiti banbantayco isu payatpayatec: iti casta ti sangolna agiccatto cadacuada, ket ti awitna agiccatto iti abagada.

²⁶ Isu daytoy ti panagem a naisagana a maipaay iti amin a daga; ken daytoy ti ima a nailayat iti rabaw ti amin a nacion.

²⁷ Ta ni Jehova dagiti buybuyot pinanggepna, ket asino ti mangawawanto? ket ti imana nailayat, ket asino ti mangcucotto?

²⁸ Idi tawen nga ipapatay ni ari Acaz adda idi daytoy nga awiten.

²⁹ Dica agragsac, O Filistia, sica amin, agsipud ta ti pang-or a nangabil kenca nabungtol; ta iti ramut ti uleg agtaudto ti maysa a carasaen, ket ti bungana isunto ti maysa a narungsot nga agtaytayab nga uleg.

³⁰ Ti inauna nga anac ti napanglaw agtaraonto, ket ti macurcurangan agiddanto a sitatalged; ket patayecto iti bisin ti ramutmo, ket ti mabati kenca mapapatayto.

³¹ Agtaguobca, O ruangan; agickisca, O ili, marunawca, O Filistia, sica amin; ta umay ti maysa nga asuc nga aggapu iti amianan, ket awan ti di agtuloy iti buyotna.

³² Ania ngarud ti isungbatto ti maysa cadagiti binaon ti nacion? A ni Jehova binangonna ti Sion, ket ti mapaladingit iti ilina agcamangto kencuana.