Isaias 13 - Ti Biblia (1973)

Ti padto a maipapan iti pannacadadael ti Babilonia.

¹ Ti sagabaen ti Babilonia, a nakita ni Isaias nga anac ni Amoz.

² Ipatacderyo ti wagayway iti rabaw ti bantay a nadalus, ipigsayo ti agtimec cadacuada, ipayapayyo ti imayo, tapno sumrecda, cadagiti ruangan dagiti natacneng.

³ Binilinco dagiti pinagsantoc, wen, inayabac dagiti mamaingel a tattaoc a gapu iti pungtotco, dagiti met laeng agragragsac a mangipaspasindayaw caniac.

⁴ Ti daranudor ti umariwecwec cadagiti banbantay, a cas ti adu unay a tattao! ti daranudor ti maysa nga ariwawa dagiti pagpagarian dagiti nacion naguurnongda! Ni Jehova dagiti buybuyot urnongenna dagiti buybuyot a maipaay iti gubat.

⁵ Umayda manipud iti adayu a daga, manipud iti disso a caadayuan ti langit, ni met laeng Jehova, ken dagiti igigam ti lucsawna, a mangdadael iti isu-amin a daga.

⁶ Agdung-awcayo; ta ti aldaw ni Jehova dumteng; cas iti pannacadadael nga aggapu iti Mannacabalin-amin umayto.

⁷ Gapuna nga isu-amin nga im-ima cumapuydanto, ken tunggal puso ti tao marunawto:

⁸ Ket agcullayawdanto; dagiti tuoc ken ledleddaang tenglendanto ida; addadanto iti tuoc a cas iti maysa a babai nga agpaspasical: agkikinnitanto nga agmalmalanga ti maysa ken maysa; dagiti ruprupada rupanto a darang.

⁹ Adtoy, ti aldaw ni Jehova sumungad, naranggas, a buyogan ti pungtot ken narungsot nga unget: tapno paglangalangenna ti daga, ken mangdadael cadagiti managbasol iti nagtengngaanna.

¹⁰ Ta dagiti bitbitwen sadi langit ken dagiti purpuroc dagiti bitwenna didanto ipaay ti silengda; ti init agsipngetto iti iruruarna, ket ti bulan dinanto pagsilnagen ti lawagna.

¹¹ Ket dusaecto ti lubong a gapu iti kinadakesda, ken dagiti managdacdakes a gapu iti kinadangkesda: ket pasardengec ti kinapusong ti natangsit, ket ipababacto ti kinapalangguad ti nacabutbuteng.

¹² Aramidecto a ti maysa a lalaki natactaccon ngem iti nasudi a balitoc, uray ti maysa a lalaki natactaccon pay ngem iti balitoc a napasudi ti Ofir.

¹³ Gapuna a pagkintayegecto dagiti langlangit, ket ti daga mayalisto iti dissona, iti pungtot ni Jehova dagiti buybuyot, ken iti aldaw ti narungsot nga ungetna.

¹⁴ Ket maaramidto, a cas iti ugsa a maanupan, ken cas cadagiti carcarnero nga awan ti tao a mangaywan cadacuada, sumang-atdanto tunggal maysa a mapan ken cailianna, ken agtarayto ti tunggal maysa a mapan iti dagana met laeng.

¹⁵ Ket tunggal maysa a masaracan masalputto; ket tunggal maysa a matiliw mapasagto iti campilan.

¹⁶ Dagiti maladagada maitupacdanto iti sangoanan dagiti matada, maagawanto dagiti balbalayda, ken mapilitto dagiti assawada a babbai.

¹⁷ Adtoy, tignayecto dagiti Medos a bumusor cadacuada, isuda a di mangipateg itipirac, ket maipapan iti balitoc, saandanto nga agrag-o kencuana.

¹⁸ Ket dagiti ba-ida lasanglasangendanto dagiti agtutuboda a lallaki; ken awanto ti asida iti bunga ti aanacan; dagiti matada didanto mangigaga cadagiti ubbing.

¹⁹ Ket ti Babilonia, a dayaw dagiti pagpagarian, nga imnas ti kinatangsit dagiti Caldeos, isunto ti cas la idi panangrebba ti Dios iti Sodoma ken Gomorra.

²⁰ Isu dinto matagitaoanen uray caano, ket dinto met mataenganen manipud iti caputotan agingga iti caputotan: ti Arabe dinto met mangipatacder idiay iti toldana; dagiti agpaspastor didanto met pagiddaen idiay dagiti pangenda.

²¹ No di ket dagiti narungsot nga an-animal ti let-ang ti agidda idiay; ket dagiti balbalayda mapnodanto cadagiti nacaay-ay-ay a parsua: ket dagiti avestruz agtaengdanto idiay, ken dagiti calding nga atap agsaladanto idiay.

²² Ken dagiti lobo agickisdanto cadagiti castilloda, ken dagiti chacal cadagiti nacaay-ayo a palacio; ket ti tiempona umadani a dumteng, ket dagiti aldawna saandanto a mapaatiddug.