Isaias 11 - Ti Biblia (1973)

Ti nalinteg a panagari ti sanga nga agtaud cadagiti ramut ni Jesse. Ni Jehova urnongennanto dagiti naiwarwara nga Israel.

¹ Ket addanto tumaud a maysa a saringit iti puon ni Jesse, ket ti maysa a sanga nga agtaud cadagiti ramutna agbunganto.

² Ket ti Espiritu ni Jehova agtaengto iti rabawna, ti espiritu ti kinasirib ken pannacaawat, ti espiritu ti pammatigmaan ken kinamaingel, ti espiritu ti pannacaammo ken ti panagbuteng ken ni Jehova.

³ Ket ti rag-ona isunto iti panagbuteng ken ni Jehova; ket saanto a mangocom a cas iti makita dagiti matana, ken saan met a mangipato a cas iti mangngeg dagiti lapayagna;

⁴ No di ket ocomennanto dagiti napanglaw a buyogan ti kinalinteg, ken mangipato a sililinteg a maipaay cadagiti napacumbaba ditoy daga; ket cabilennanto ti daga iti pang-or ti ngiwatna; ken gapu iti puyot dagiti bibigna patayennanto dagiti managdacdakes.

⁵ Ket ti kinalinteg isunto ti barikes ti siketna, ket ti kinamatalec isunto ti barikes ti lomona.

⁶ Ket ti lobo makipagnaedto iti cordero, ket ti leopardo makicaiddanto iti urbon a calding; ket ti urbon ti vaca ken ti urbon ti leon ken ti napalucmeg agcacaiddadanto; ket ti maysa nga ubing a bassit idalannanto ida.

⁷ Ti vaca ken ti oso agarabdanto; dagiti urbonda agcacaidadanto, ket ti leon manganto iti garami a cas iti vaca a lalaki.

⁸ Ket ti ubing nga agsuso agay-ayamto iti abut ti uleg, ket ti capuspusot nga ubing icautnanto ti imana iti rukib ti carasaen.

⁹ Didanto mangranggas wenno mangdadael iti amin a bantayco a nasantoan; ta ti daga mapnonto iti pannacaammo ken ni Jehova, a cas la dagiti dandanum sacnapanda ti baybay.

¹⁰ Ket maaramidto iti dayta nga aldaw, a ti ramut ni Jesse, a sitatacder nga apaay a maysa a wagayway cadagiti inilin-ili, isu ti sapulento dagiti nasnacion; ket ti paginanaanna nadayagto.

¹¹ Ket maaramidto iti dayta nga aldaw, a ti Apo isaadnanto manen ti imana iti maicadua a daras a mangsubbot iti matda iti ilina, dagiti maitiddanto nga aggapu iti Asiria, ken aggapu iti Egipto, ken aggapu iti Patros, ken aggapu iti Cus, ken aggapu iti Elam, ken aggapu iti Sinar, ken aggapu iti Amat, ken cadagiti purpuro ti baybay.

¹² Ket isu mangitayagto ti maysa a wagayway a maipaay cadagiti nasnacion, ken urnungennanto dagiti naiwarwara nga Israel, ken tiponenna nga agcaycaysa dagiti nasinasina ti Juda manipud cadagiti uppat a suli ti daga.

¹³ Ti apal met ti Efraim pumanawto, ket dagiti mangriribuc iti Juda madadaeldanto: ti Efraim dinanto apalan ti Juda, ket ti Juda dinanto riribuken ti Efraim.

¹⁴ Ket tumayabdanto nga agpababa iti rabaw ti abaga dagiti Filisteos iti laud; agcucuyogdanto a mangsamsam cadagiti annac ti daya: yunnatdanto dagiti im-imada iti rabaw ti Edom ken Moab; ket dagiti annac ni Ammon agtulnogdanto cadacuada.

¹⁵ Ket ni Jehova dadaelennanto a talipupusen ti dila ti baybay ti Egipto; ken iti macasinit nga anginna itayagnanto ti imana iti Carayan, ket cabilenna a pagcapitoen nga ayus, ket aramidenna a dagiti tattao macaballasiwda a simamaga ti sacada.

¹⁶ Ket addanto dalan a napatac a maipaay cadagiti mabati iti ilina, dagiti mabatinto nga aggapu iti Asiria; a cas la iti adda idi a maipaay iti Israel idi aldaw nga isasang-atna a rimmuar iti daga ti Egipto.