Isaias 1 - Ti Biblia (1973)

Dagiti kinaulpit dagiti tattao ti Dios. Ti Dios saan a mapaayatan cadagiti datdaton ken lulualo. Sapulenna ti panagtulnog. Ti Sion nasukir ngem masbutto.

¹ Ti sirmata ni Isaias nga anac ni Amos, isu a nakitana a maipapan iti Juda ken Jerusalem, cadagiti al-aldaw daUzias, Jotam, Acaz ken Ezekias, nga ar-ari ti Juda.

² Denggenyo, O langlangit, ket timudem, O daga; ta ni Jehova nagsao: Nangtarakenac ken nangpadackelac cadagiti annac, ket simmukirda a maicaniwas caniac.

³ Ti vaca ammona ti makincucua kencuana, ket ti asno ammona ti pagpacanan ni apona; ngem ti Israel dina ammo, ti ilic saan nga agotob.

⁴ Ay nacion a managbasol, umili a nagbaclay iti kinadakes, maysa a caputotan dagiti managdacdakes, annac nga agaramid a sibaballicug unay! Isuda naglicudanda ni Jehova, isuda inuyuyawda ti Santo ti Israel, pimmusayda a timmalicud.

⁵ Apay a masaplitcayonto coma, ket adadda pay ti yaalsayo? ti amin nga olo masakit, ti amin a puso mapacsuyan.

⁶ Manipud iti dapan ti saca agingga iti olo met laeng awan ti kinasalun-at kencuana; no di ket sugsugat, ken litlitem, ken babbaro a sapsaplit: saanda a nacaem, saanda met a napatapatan ken dida met nasapsappoan iti lana.

⁷ Ti dagayo aglangalang: dagiti il-iliyo naururamda iti apuy; ti dagayo isu ti alun-unen dagiti gangannaet iti saclangyo, ket aglangalang, a cas narbec gapu cadagiti sangsangaili.

⁸ Ket ti anac a babai ti Sion mabaybay-an a cas sapaw iti cauvasan, cas maysa a calapaw iti minuyongan dagiti pepino, cas maysa nga ili a nalacub.

⁹ No coma no saan a nangitidda cadatayo ni Jehova dagiti buybuyot iti maysa a bassit unay a tidda, naipadatayo coma a cas iti Sodoma, datayo caslatayo coma iti Gomorra.

¹⁰ Denggenyo ti sao ni Jehova, dacayo nga agturturay iti Sodoma; timudenyo ti linteg ti Diostayo, dacayo a tattao ti Gomorra.

¹¹ Ania ti capapaayanna caniac ti kinaadu dagiti datdatonyo? cuna ni Jehova: addan caniac ti kinawadwad dagiti datdaton a mapuuran a lallaki a carnero, ken iti taba dagiti mapalucmeg nga an-animal; ket diac agrag-o iti dara dagiti vacvaca wenno dagiti cordero, wenno dagiti lallaki a calding.

¹² Intono umaycayo agparang iti saclangco, asino ti nagkiddaw iti daytoy cadagiti imayo a baddekenyo dagiti paraanganco?

¹³ Dicay mangyegen cadagiti datdaton nga ubbaw; ti incienso maysa a macarimon caniac; ti lutuad ken aldaw a panaginana, ti panaguurnong cadagiti gimgimong, diac maanusan ti kinadangkes ken nadaeg a gimong.

¹⁴ Dagiti lutuadyo ken dagiti fiestayo a maikeddeng guraen toy cararuac; macapulcocda caniac; mautoyanac nga agawawit cadacuada.

¹⁵ Ket intono itayagyo dagiti im-imayo, ilingedconto dagiti matac cadacayo; wen, intono agaramidcayo cadagiti adu a lualo, diacto ipangag: dagiti im-imayo napnoda iti dara.

¹⁶ Agbuggocayo, agdaluscayo; yadayuyo ti dakes cadagiti ar-aramidyo manipud iti sangoanan dagiti matac; agsardengcayo nga agaramid iti dakes.

¹⁷ Sursuroenyo ti agaramid iti naimbag; sapulenyo ti kinajusticia, saranayenyo dagiti maparigat, icalinteganyo dagiti ul-ulila, salacnibanyo ti balo a babai.

¹⁸ Umaycayo ita, ket agsusurottayo coma, cuna ni Jehova: uray no dagiti basbasolyo casda la coma iti escarlata, mapapudawdanto a cas la nieve; nupay no nalabbasitda a cas la carmesi, agbalindanto a cas la napudaw a de lana.

¹⁹ No agmayatcayo ken agtulnogcayo, canenyonto ti caimbagan iti daga:

²⁰ Ngem no paayenyo ken sumukircayo, maalun-uncayto iti campilan; ta ti ngiwat ni Jehova insaona.

²¹ Casano aya ti panagbalinna a balangcantis ti ili a matalec! isu a napno idi iti kinajusticia! ti kinalinteg nagtaeng idi kencuana, ngem ita managpapatay.

²² Ti piracmo nagbalin a rugit, ti aracmo nalaocan iti danum.

²³ Dagiti pangpanguloem managalsada, ken cadcadua ida dagiti mannanacaw; tunggal maysa cadacuada ayatenna ti panocsoc, ken surotsurotenna ti gunguna; dida icalintegan ti ul-ulila, ket di met dumanon cadacuada ti darum ti balo a babai.

²⁴ Gapuna a cuna ti Apo, a ni Jehova dagiti buybuyot, ti Mannacabalin ti Israel, Ah, bang-aracto ti bagic cadagiti casupadic bumalesacto cadagiti cabusorco;

²⁵ Ket iparabawconto manen ti imac kenca, ket gugoracto a talipupusen ti rugitmo, ken ibellengco amin a gampromo;

²⁶ Ket bangonecto manen dagiti ocomyo a cas idi unana ken dagiti consejerosmo a cas idi punganay: iti calpasanna managanancanto iti ili ti kinalinteg, ili a matalec.

²⁷ Ti Sion masbutto iti kinajusticia, ket dagiti napasurotna masbutdanto iti kinalinteg.

²⁸ Ngem ti pannacadadael dagiti managlabsing ken managbasol agcucuyogdanto, ket dagiti tumallicud ken Jehova marunawdanto.

²⁹ Ta isuda maibabaindanto cadagiti luglugo a kinalicagumanyo, ken mariribuccayto a gapu iti minuyungan a piniliyo.

³⁰ Ta cascayto la lugo nga agusaw ti bulongna, ken cas minuyongan nga awan danumna.

³¹ Ket ti napigsa caslanto iti lapnit, ket ti aramidna caslanto iti dalipato; agpadpadadanto a mapuuran, ket awanto ti mangiddep cadacuada.