Hebreo 9 - Ti Biblia (1973)

Ti immuna a tulag.

¹ Ket pudno a daydi immuna a tulag adda met dagiti pagalagadanna iti panagservi iti Dios, ken iti santuariona a naidagaan.

² Ta maysa a tabernaculo naisagana; daydi immuna a naggianan ti candelero, ken ti lamisaan, ken ti tinapay a sidadaya; isu a managan ti Santo a disso.

³ Ket iti labes ti maicadua nga abbong, adda daydi tabernaculo a managan ti casasantoan dagiti nasantoan a disso;

⁴ A naggianan daydi incensario a balitoc ken ti lacasa ti tulag, a nacalupcupan amin nga aglicmut iti balitoc, a naggianan daydi banga a balitoc a nacaickan daydi mana, ken daydi nagsabong a sarucod ni Aaron, ken dagidi taptapi ti tulag;

⁵ Ken iti rabawna, dagiti querubin a nadayag, a manglinlinung idi tugaw ti asi ket cadagitoy a banbanag saanmi a mabalin ita a saritaen a saggaysa.

⁶ Ket idi dagitoy a banbanag naisaganada a castoy, dagiti papadi cancanayon a sumsumrecda idi immuna a tabernaculo, tungpalenda ti panagservi iti Dios;

⁷ Ngem idi maicadua, ti cangatoan a padi a maymaysa, maminsan ti macatawen; saan nga awan ti ikuyogna a dara, isu nga idatonna gapu kencuana met laeng, ken gapu cadagiti basbasol ti ili:

⁸ Nga impaawat daytoy ti Espiritu Santo, a saan pay a naiparang ti pagsercan, iti nasantoan a disso, bayat ti caadda a sitatacder ti umuna a tabernaculo;

⁹ Nga isu maysa a pangngarig iti aldaw nga agdama; ket cas mayannurot itoy maidayada dagiti sagut ken daton a dida mabalin no maipapan iti nakem, a palaingen nga awan pagcuranganna dagidi mangidaton iti panagservi iti Dios,

¹⁰ Idinto a pagalagadanda laeng a maipapan iti bagi (babaen dagiti sidsida ken in-inumen ken nadumaduma a kita ti panagbuggo) a naituyangda agingga iti aldaw ti pannacabalbaliw.

¹¹ Ngem idi nga immay ni Cristo, cangatoan a padi dagiti naimbag a banbanag nga umayto gapu iti dacdackel ken nasaysayaat a tabernaculo, a saan a naaramid babaen ti ima, cayatna a sao-en, saan nga itoy a pannacaparsua,

¹² Ket saan met a gapu iti dara dagiti toro a calding ken dagiti toro, a vaca no di ket gapu iti darana met laeng, simrec iti naminpinsan a maipaay iti agnanayonen idiay santo a disso a nagun-odanna ti agnanayon a pannacasubbot.

¹³ Ta no ti dara dagiti toro a calding ken dagiti toro a vaca ken ti dapo ti bumalasang a vaca, a naiwarsi cadagiti narugitan mamagsantoda a maipaay iti pannacagugor ti lasag:

¹⁴ Dinto nangnangrona pay ti dara ni Cristo, isu a gapu iti Espiritu nga agnanayon indatonna ti bagina nga awan tulawna iti Dios, dalusanna ti nakemyo cadagiti ar-aramid a natay, tapno agservicayo iti Dios a sibibiag?

¹⁵ Ket gapu itoy isu ti mangibabaet iti maysa a baro a tulag; ta idinto nga adda maysa a natay a maipuon iti pannacasubbot dagiti salsalungasing babaen daydi immuna a tulag, dagiti naayaban awatenda coma ti naicari a tawiden iti agnanayon.

¹⁶ Ta no adda testamento, masapul ti pacakitaan ti ipapatay ti nagtestar.

¹⁷ Ta ti testamento adda bilegna iti calpasan ti ipapatay; ta awan ti aniaman a pategna no sibibiag pay ti nagtestar.

¹⁸ Gapuna uray daydi immuna a tulag saan a naconsagrar nga awan dara.

¹⁹ Ta idinto a naiwarragawag ni Moises dagiti amin a bilbilin a mayannurot iti linteg cadagiti amin nga umili, innalana ti dara dagiti urbon a vaca a lalaki a napacuyogan ti danum ken dutdot a nalabaga ti carnero ken ti hisopo, ket winarsianna daydi pagbasaan met laeng ken dagidi isu-amin nga umili.

²⁰ A kinunana: Daytoy isu iti dara ti tulag nga imbilin ti Dios a maipapan cadacayo.

²¹ Casta met daydi tabernaculo ken dagidi isu-amin nga arruaten ti panagservi iti Dios, winarsianna met ida iti dara.

²² Ket cas mayalubog iti linteg, nganngani isu-amin a banag magugoranda iti dara; ket no awan ti dara a maiparucpoc, awan ti pannacasubbot.

²³ Masapul ngarud idi a dagiti catulad dagiti banbanag a nailangitan magugoranda cadagitoy a banbanag ngem dagiti banbanag a nailangitan magugoranda cadagiti daton a nasaysayaat ngem dagitoy.

²⁴ Ta saan a simrec ni Cristo iti maysa a Santo a disso nga inaramid ti ima, nga isu ti catulad ti napudno, no di ket idiay langit met laeng, tapno agparang ita iti sangoanan ti Dios gapu cadatayo:

²⁵ Ket saan met a masapul nga idatonna ti bagina iti mamin-adu, a cas iti cangatoan a padi sumrec iti tinao-en a mangipan iti dara ti sabali;

²⁶ Ta no saan coma a casta, nasapulna coma ti nagsagaba iti namin-adu nanipud idi pannacabangon toy lubong: ngem ita, naminpinsan laeng iti panungpalan adu a pannawen, isu naiparangarang a maipaay iti panangpucaw ti basol, gapu iti pannacaidaton ti bagina met laeng.

²⁷ Ket gapu ta naituding cadagiti tattao a matayda iti maminpinsan, ket inton malpas daytoy ti pannacaocom:

²⁸ Casta met ni Cristo, idinto a naidaton iti naminsan, tapno awitenna dagiti basbasol dagiti adu, ti maicadua agparangto saan a gapu iti basol, no di ket maipaay iti pannacaisalacan dagiti agur-uray kencuana.