Hebreo 8 - Ti Biblia (1973)

Ti daan a tulag mapalabas; ni Cristo isu ti naaramat iti tulag a nasaysayaat ken agnanayon.

¹ Ti cangronaan, ngarud cadagiti banbanag a sasao-enmi, isu daytoy: Adda maysa a cangatoan a paditayo, a nagtugaw iti macanawan ti trono ti Ari idiay langit,

² Maysa a ministro ti altar ken iti napudno a tabernaculo, nga binangon ti Apo, saan a ti tao.

³ Ta tunggal cangatoan a padi natudingan tapno idatonna nga agpada dagiti sagut ken daton; gapuna masapul nga daytoy adda met idatonna.

⁴ Ngem no adda coma iti rabaw ti daga, saan coma a padi uray caano idinto nga adda dagiti mangidatdaton cadagiti sagsagut cas mayannurot iti linteg;

⁵ Isuda nga agservi a cas la pacakitaan ken aniniwan dagiti banbanag a nailangitan; a cas met ni Moises binalacadan ti Dios idi irugina a bangonen ti tabernaculo; ta cunana kencuana: Kitaem, ta aramidem coma dagiti isu-amin a banbanag cas iti paguadan a naipakita kenca idiay bantay.

⁶ Ngem ita isu nagunodanna ti maysa a panagaywan a nasaysayaat, a cas met ti panangibabaetna iti maysa a tulag a nasaysayaat, a nabangon cadagiti nasaysayaat a carcari.

⁷ Ta no daydi immun-una a tulag awan coma idi ti pagcurcuranganna, saan coma a nasapul ti pagsaadan ti maicadua.

⁸ Ta idinto a binabalawna ida, kinunana: Adtoy, nga umay dagiti aldaw, cuna ti Apo, A panangaramidconto iti balay ni Israel ken iti balay ni Juda ti maysa a tulag a baro;

⁹ Saan a cas iti tulag nga inaramidco cadagidi ammada Idi aldaw a panangibinco cadacuada, tapno iruarco ida idiay daga ti Egipto: Ket gapu ta saanda a nagtalinaed iti tulagco, Binaybay-ac ida, cuna ti Apo.

¹⁰ Ta daytoy ti tulag nga aramidecto iti balay ni Israel Inton malpas dagidiay nga aldaw, cuna ti Apo; Icabilconto dagiti linlintegco iti isipda, Ket isuratconto met ida iti pusoda; Ket siacto ti Diosda, Ket isudanto ti ilic:

¹¹ Ket didanto mangisuron tunggal maysa iti cailianna, Ket tunggal maysa iti cabsatna, a cunana: Ammoen ti Apo: Ta isuda amin maammoandacto, Manipud iti cabassitan agingga iti cadackelan cadacuada:

¹² Ta siac mangngaasiacto cadagiti kinadakesda. Ken diacto lagipenen dagiti basbasolda.

¹³ Idi cunana: Maysa a tulag a baro, padaanenna daydi immun-una. Ket ti dumaan ken lumaroy asidegen ti panaggibusna.