Hebreo 7 - Ti Biblia (1973)

Nangatngato ni Cristo ngem ni Aaron.

¹ Ta daytoy Melquisedec, ari ti Salem, padi ti Dios a cangatoan unay, isu a nangsabet ken Abraham idi nagawid iti panangparmecna cadagidi arari, ket binendicionanna,

² Ket ni Abraham imbingayna met kencuana ti apagcapullo dagiti isu-amin, (ta umuna, ti caipapananna isu ti Ari ti linteg, ket sumaganad, Ari ti Salem, nga isu ti Ari ti talna;)

³ Awan amana, awan inana, awan ti capuonan ket awan ti pangrugian dagiti al-aldawna, wenno tungpal ti biagna, ngem naaramid nga umasping iti Anac ti Dios, agtaeng a padi iti agnanayon.

⁴ Ngem panunutenyo no casano a nagdackel daytoy idi, isu a nangtedan ni patriarca Abraham ti maysa nga apagcapul-lo dagiti casayaatan nga inabacna.

⁵ Ket pudno a dagiti dadduma cadagiti annac ni Levi nga immawat iti saad ti kinapadi adda lintegda nga umawat cadagiti apagcapul-lo cadagiti umili cas cunaen ti linteg; nalawlawag a pannao, umawatda cadagiti cacabsatda, uray pay no dagitoy nagtaudda met ken Abraham:

⁶ Ngem daydiay a ti capuonanna saan a maibilang cadacuada, inawatna dagiti apagcapul-lo ken Abraham, ket binendicionanna daydiay agicut cadagiti carcari.

⁷ Ngem awan ti aniaman a supiat, ti basbassit mabendicionan gapu iti dacdakel.

⁸ Ket ditoy dagiti tattao a matay, umawatda cadagiti apagcapul-lo; ngem idiay maysa, a sacsianda nga sibibiag.

⁹ Ket cas la cayatna a sawen, gapu ken Abraham, ni Levi met, nga umawat cadagiti apagcapul-lo nagbayad kencuana.

¹⁰ Ta ni Levi adda pay laeng iti lomo ni amana, nga Abraham idi nasaracan ni Melquisedec.

¹¹ No ngarud ti kinaananay adda iti kinapadi dagiti Levitas (ta gapu cadacuada dagiti umili inawatda ti linteg), ania pay ti pacasapulan ti pannacaadda ti sabali a kinapadi a cas iti kinapadi ni Melquisedec ket saan a naibilang cas iti kinapadi ni Aaron?

¹² Ta no agbalbaliw ti kinapadi masapul nga agbaliw met ti linteg.

¹³ Ta daydiay pacaigapuan a masarsarita dagitoy a banbanag, nagtaud iti sabali a tribu, a saan a naggapuan ti uray siasino nga agserservi iti altar.

¹⁴ Ta nalawag a ni Apotayo nagtaud iti Juda, tribu nga awan ti sinao ni Moises a maipapan cadagiti papadi.

¹⁵ Ket nalawlawag pay unay, no cas iti kinapadi ni Melquisedec tumaud ti sabali a padi,

¹⁶ A naaramid saan a cas iti linteg ti bilin a nainlasagan, no di ket cas iti pannacabalin ti maysa a biag nga awan tungpalna;

¹⁷ Ta maipapan kencuana mapanecnecan: Sica ti padi nga agnanayon Cas iti kinapadi ni Melquisedec.

¹⁸ Ti bilin nga immun-una, naucas gapu iti kinacapuyna ken kinaawan capapay-anna.

¹⁹ (Ta ti linteg awan ti inaramidna a naananay,) ket naipastrec ti maysa nga inanama a nasaysayaat, a gapu kencuana umasidegtayo iti Dios.

²⁰ Ken gapu ta saan a naaramid a padi nga awan sapata.

²¹ (Ta dagitoy pudno a naaramidda a papadi nga awan sapata; ngem daydiay babaen ti sapata, gapu iti daydi nagcuna ti maipapan kencuana: Sinapataan ti Apo ket saanto nga agbabawi: Sica ti padi nga agnanayon);

²² Iti casta ngarud nagbalin met ni Jesus a mangpatalged iti maysa a tulag a nasaysayaat.

²³ Ket pudno a dagidiay naaramid nga adu a papadi ta gapu iti ipapatay nalappedanda nga agtuloy.

²⁴ Ngem isu, agsipud ta agtalinaed iti agnanayon, adda kinapadina a di maipatawid.

²⁵ Gapuna, mabalinna met nga isalacan agingga iti awan pagcuranganna dagiti umasideg iti Dios gapu kencuana, ta isu agbiag nga agnanayon tapno ibabaetna ida.

²⁶ Ta castoy ti cangatoan a padi a naipaay cadatayo; Santo, awan basolna, di natulawan, adayu cadagiti managbasol, ket naaramid a nangatngato ngem cadagiti langlangit;

²⁷ Isu a saanna a masapul ti mangidaton iti inaldaw, umuna gapu cadagiti basbasolna met laeng, ket calpasanna gapu cadagiti basbasol ti umili; a cas inaramid dagiti cangatoan a padi; ta daytoy inaramidna iti namimpinsan a maipaay iti agnanayonen, idi indatonna ti bagina.

²⁸ Ta ti linteg tudinganna a cangatoan a padi dagiti tattao nga addaan kinacapuy; ngem ti sao ti panagsapata, iti calpasan ti linteg, tudinganna ti Anac, isu a naaramid nga awan pagcuranganna iti agnanayon.