Hebreo 5 - Ti Biblia (1973)

Ti kinasacerdote ni Cristo.

¹ Ta isu-amin a cangatoan a padi, a mapili cadagiti tattao, matudingan a maipaay cadagiti tattao, cadagiti banbanag a maipanggep iti Dios, tapno mangidiaya cadagiti sagsagut ken castamet dadagiti datdaton gapu cadagiti basbasol;

² Maysa a macabalin coma a mangngaasi cadagiti nanengneng ken dagiti maal-lilaw, ta isu nalawlaw met iti kinalap-it;

³ Ket gapu itoy, rebbengna ti mangidaton gapu cadagiti basbasol maipoon iti ili ken castamet maipoon iti bagina met laeng.

⁴ Ket awan coma ti mangakem itoy a dayaw no di ti inayaban ti Dios, a cas ti pannacaayab ni Aaron.

⁵ Iti casta uray ni Cristo saanna nga indayaw ti bagina a nagakem a cangatoan a Padi no di ket daydiay nagsao kencuana: Sica ti Anacco, Itoy nga aldaw binukelca:

⁶ Cas met iti cunana iti sabali a paset: Sica ti padi, nga agnanayon, A cas iti kinapadi ni Melquisedec.

⁷ Isu, a cadagidi aldaw ti panaglasagna, idinto a nangidaton cadagiti carcararag ken dawdawat a nabuyugan iti nasged nga araraw ken lulua, iti daydiay macabalin idi a mangispal kencuana iti ipapatay; ket idinto a naipangag gapu iti nadiosan nga amacna,

⁸ Uray pay no isu ti Anac idi, naadalna ti panagtulnog gapu cadagiti banbanag a linac-amna;

⁹ Ket idinto a naaramid nga awan pagcuranganna, nagbalin nga isu ti nakinaramid ti agnanayon a pannacaisalacan cadagiti isu-amin nga agtulnog kencuana;

¹⁰ Ket ti Dios tinudinganna a kangatoan a padi cas iti kinapadi ni Melquisedec.

¹¹ Ket adda adu a sao-enmi a maipapan kencuana, ngem narigat nga ipalawag; agsipud ta nagbalincayo a ngelngel a dumngeg.

¹² Ta idinto a dacay coma ti manursuron, gapu iti cabayagyon, masapulyo manen ti mangisuro cadacayo, no ania dagiti pamunganayan a sursuroen cadagiti sasao ti Dios; ket nagbalincayo a cas la cadagiti macasapul ti gatas, a saan a ti taraon a nakired.

¹³ Ta tunggal maysa a mangaramat iti gatas, awan padpadasna iti sao ti kinalinteg; ta isu maysa nga ubing.

¹⁴ Ngem ti taraon a nakired maipaay cadagiti tattao a nataenganen; dagidiay a gapu iti pannacaasaasda, dagiti ricnada nairuamdan a mangilasin ti naimbag ken dakes.