Hebreo 4 - Ti Biblia (1973)

Ti inana a magun-odan dagiti mamati.

¹ Agbutengcayo ngarud yantangay adda pay cari nga iseserrec iti paginanaan, di la ket ta adda uray siasino cadacayo nga agbanag a saan a macadanon.

² Ta pudno a naicascasaba met cadatayo ti naimbag a damag, a cas met cadacuada; ngem awan ti nagungunada iti sao a nangngegda, agsipud ta dagiti nacangngeg kencuana, dida namati.

³ Ta datayo nga namati sumrectayo: iti dayta nga inana, cas sinaona: Cas iti panangisapatac idi pannacapungtotco: Saandanto a sumrec iti inanac: uray dagiti ar-aramid naturposda nanipud idi pannacabangon ti lubong.

⁴ Ta iti maysa a paset castoy ti masasao a maipapan iti maicapito nga aldaw: Ket naginana ti Dios iti maicapito nga aldaw, cadagiti isu-amin nga ar-aramidna;

⁵ Ket ditoy masasao manen: Saandanto a sumrec iti inanac.

⁶ Iti casta, agsipud ta rumsua a dagiti dadduma sumrecdanto kencuana, ket dagidi nacaicascasabaan dagiti naimbag a damag idi damo saanda a simrec gapu iti kinasukirda,

⁷ Ibagana manen, ti maysa nga aldaw, a cunana babaen ni David: Ita nga aldaw, iti calpasan ti adu a tiempo, (cas adda a naisaon): Ita nga aldaw, no mangngegyo ti timecna, Dicayto patangkenen dagiti puspusoyo.

⁸ Ta no ni Josue intedna coma cadacuada ti panaginana, saanna coma a sasao-en iti calpasan daytoy, ti sabali nga aldaw.

⁹ Adda pay ngarud maysa a panaginana a maipaay iti ili ti Dios.

¹⁰ Ta ti simrec iti panaginana, isu met laeng ti simmardeng cadagiti ar-aramidna, a cas met ti Dios simmardeng cadagiti ar-aramidna.

¹¹ Umagawatay ngarud tapno sumrectayo iti daydiay a panaginana, tapno awan ti mapasag, a maitulad iti daydiay met la a kita ti kinasukir.

¹² Ta ti sao ti Dios nabiag ken napigsa, ket natadtadem ngem uray ania a campilan a dua ti tademna, ket dumanon nga agingga iti paglasinan ti cararua ken ti espiritu, wen, ken dagiti nagsusuupan ken pata ket nasiglat nga agilasin cadagiti panunot ken panagem ti puso.

¹³ Ket awan ti aniaman a parsua a saan a sipapanayag iti imatangna; no di ket, dagiti isu-amin a banag addada a lamolamo ken agdadata cadagiti mata daydiay a pagidatagantayo.

Dacdackel ni Cristo ngem dagiti cangatoan a sacerdote ti daan a tulag.

¹⁴ Idinto ngarud ta addaantayo ti maysa a dackel a cangatoan a padi, a limmabas cadagiti langlangit, ni Jesus, nga Anac ti Dios, salimetmetantayo coma a sititibker ti pammatitayo.

¹⁵ Ta awan cadatayo ti maysa a cangatoan a padi a di macabalin a mangricna cadagiti kinalap-ittayo, no di ti maysa a nasulisog iti isu-amin, a cas cadatayo ngem saan a nagbasol.

¹⁶ Umadanitay ngarud a sitatalged iti trono ti parabur awatentayo ti asi ken macasaractayo ti parabur; a tumulong cadatayo iti aldaw ti pannacasapul.