Hebreo 3 - Ti Biblia (1973)

Nangatngato ni Cristo ngem ni Moises.—Peggad ti saan a panamati ken ti kinasukir.

¹ Gapuna, cacabsat a sasanto, a mairaman iti pannacaawis a nailangitan, panpanunutenyo ti Apostol ken Cangatoan a Padi ti pammatitayo, nga isu ni Jesus;

² Isu a nagtalcan daydi nangtuding kencuana, a cas met ken Moises iti isu-amin a balayna.

³ Ta daydi naibilang a maicari iti dacdackel a dayaw ngem ni Moises, a cas ti nangbangon iti balay, dacdackel ti dayawna ngem iti balay.

⁴ Ta amin a balay adda nangbangon, ngem ti nangbangon cadagiti isu-amin a banbanag isu ti Dios.

⁵ Ket ni Moises kinapudnoanna a napagtalcan idi iti isu-amin a balayna, cas maysa nga adipen a maipaay a pamanecnec cadagidiay banag a maipacaammonto idi;

⁶ Ngem ni Cristo cas maysa nga anac nga agaywan iti balayna; ket datayo ti balayna, no taginayonentayo ti bilegtayo ken ti ragsac ti pananginanamatayo, agingga iti panungpalan.

⁷ Gapuna, castoy ti cuna ti Espiritu Santo: Ita nga aldaw no mangngegyo ti timecna.

⁸ Saanyo a patangkenen degiti puspusoyo a cas idi pannacagargari, Cas idi aldaw ti pannacasulisog, idiay let-ang,

⁹ Idiay a nangsulisoganda caniac dagidi ammayo, gapu ti panangsuutda, Ket nakitada dagiti ar-raramidco iti uppat a pulo a tawen

¹⁰ Gapuna naglucsawac iti daydi a caputotan, Ket kinunac: Agnanayon a maisiasi ti pusoda: Ket dida naammoan dagiti daldalanco;

¹¹ Iti casta insapatac iti lucsawco: Saandanto a sumrec iti paginanaac.

¹² Kitaenyo ngarud, cacabsat, di la ket ta addanto iti siasinoman cadacayo, ti maysa a puso a dakes a saan a mamati, nga umadayu iti Dios a sibibiag:

¹³ No di ket, agbibinnalacadcayo, iti inaldaw, ita ta nasasao; Itoy nga aldaw: tapno saan a tumangken ti uray siasino cadacayo gapu iti panangallilaw ti basol:

¹⁴ Ta naaramidtayo a mairaman ken Cristo, no taginayonentayo a sititibker ti pamunganayan ti panagtalectayo agingga iti panungpalan:

¹⁵ Ita, ta masasao: Ita, no mangngegyo ti timecna, Saanyo a patangkenen dagiti puspusoyo, a cas idi pannacagargari.

¹⁶ Ta siasinoda dagidi, nga idinto ta nangngegda, ginargarida? Saanda aya nga isu-amin dagidi rimmuar idiay Egipto a nakicuyog ken Moises?

¹⁷ Ket siasino dagiti naglucsawanna iti uppat a pulo a tawen? Saan aya a dagidi nagbasol, a dagiti bangbangcayda napasagda idiay let-ang?

¹⁸ Ket siasino dagidi nangisapataanna a didanto sumrec iti paginanaanna no saan a dagiti di nagtulnog?

¹⁹ Ket makitatayo a dida nabalin ti simrec gapu iti dida panamati.